പാട്ടെന്ന് കേട്ടാലേ രജിനി സാറിന് ഭയമാണ്, ടെൻഷനടിച്ച് അനങ്ങാതെ ഒറ്റ നിൽപ്പാണ് -പ്രഭുദേവ

രജിനികാന്തിന് നൃത്തംചെയ്യുന്നത് ഭയമാണെന്നാണ് പ്രഭുദേവ വെളിപ്പെടുത്തിയത്. ബിഹൈൻഡ് വുഡ്സിന് അനുവദിച്ച അഭിമുഖത്തിലാണ് താരം ഇക്കാര്യം പറഞ്ഞത്. നൃത്തസംവിധായകരോട് രജിനിക്ക് വലിയ ബഹുമാനമാണെന്നും എല്ലാവർക്കും അദ്ദേഹത്തെ ഇഷ്ടമാണെന്നും പ്രഭുദേവ കൂട്ടിച്ചേർത്തു.

എപ്പോഴും സന്തോഷത്തോടെ നടക്കുന്നയാളാണ് രജിനി സാർ. പക്ഷേ പാട്ട് എന്നുകേട്ടാൽ റോബോട്ടിനേ പോലെയാവും. കാലിൽ ഒരു പത്തിരുപത് കിലോ കെട്ടിവെച്ചാൽ എങ്ങനെയുണ്ടാവും എന്നതുപോലെ. ഭയങ്കര ടെൻഷനായിരിക്കും ആ സമയങ്ങളിൽ. എന്തിനാണ് ഇങ്ങനെ ടെൻഷനടിക്കുന്നതെന്ന് ഞാൻ ചോദിച്ചിട്ടുണ്ട്. അറിയില്ല, പാട്ടെന്നുകേട്ടാൽ അപ്പോൾ ടെൻഷനാവും എന്നായിരിക്കും സാറിന്റെ മറുപടി. പ്രഭുദേവ പറഞ്ഞു.

നൃത്തസംവിധായകരുടെയടുത്ത് നല്ല ബഹുമാനത്തോടെയാണ് രജിനി നിൽക്കാറുള്ളതെന്ന് പ്രഭുദേവ ചൂണ്ടിക്കാട്ടി. അദ്ദേഹത്തിന് എല്ലാവരേയും ഇഷ്ടമാണ്. തിരിച്ചും അങ്ങനെതന്നെയാണ്. എപ്പോഴും ജോളിയായിരിക്കുന്ന വളരെ ലാളിത്യം നിറഞ്ഞയാളാണ് രജിനികാന്തെന്നും പ്രഭുദേവ പറയുന്നു.

ടി.ജെ. ജ്ഞാനവേൽ, ലോകേഷ് കനകരാജ് എന്നിവർ സംവിധാനം ചെയ്യുന്ന ചിത്രങ്ങളാണ് രജനികാന്തിന്റേതായി വരാനുള്ളത്.