അഡള്‍ട്ട് വീഡിയോ കണ്ടന്റുകള്‍ സ്ട്രീം ചെയ്യുന്ന ഒടിടി പ്ലാറ്റ്‌ഫോമാണ് ഉല്ലു. വിഭു അഗര്‍വാള്‍ സിഇഒയായ ഉല്ലു, പുരാണ ഭക്തി കണ്ടന്റുകള്‍ക്കായി പ്ലാറ്റ്‌ഫോം ലോഞ്ച് ചെയ്യുന്നു. ഉല്ലുവിനെതിരേ കടുത്ത വിമര്‍ശനം ഉയര്‍ന്ന സാഹചര്യത്തിലാണ് ഈ നീക്കമെന്ന് റിപ്പോര്‍ട്ടുകളുണ്ട്. ഹരി ഓം എന്ന് പേരിട്ടിരിക്കുന്ന പ്ലാറ്റ് ഫോം 2024 ജൂണില്‍ ആരംഭിക്കും. എല്ലാ പ്രായക്കാര്‍ക്കുമായുള്ള ഭക്തി പുരാണ ഉള്ളടക്കങ്ങളാണ് ഈ പ്ലാറ്റ്‌ഫോമില്‍ വരാന്‍ പോകുന്നതെന്നാണ് വിഭു അഗര്‍വാള്‍ പറയുന്നത്.
വീഡിയോ, ഓഡിയോ ഫോര്‍മാറ്റുകളിലുള്ള ഭജനകള്‍, ഭക്തിഗാനങ്ങള്‍ എന്നിവ ഇവിടെ ലഭ്യമാകും. ഒപ്പം തന്നെ മുതിര്‍ന്ന പൗരന്മാര്‍ക്കും കുട്ടികള്‍ക്കും ചെറുപ്പക്കാര്‍ക്കും 20-ലധികം പുരാണ ഷോകളും ഇതില്‍ ഒരുങ്ങുന്നുണ്ട്. പുരാണവുമായി ബന്ധപ്പെട്ട ആനിമേറ്റഡ് സീരിസുകളും ഇതില്‍ ഉണ്ടാകും. യു റേറ്റഡ് കണ്ടന്റുകള്‍ മാത്രമേ പ്രദര്‍ശിപ്പിക്കു.
നമ്മുടെ വേരുകള്‍, സംസ്‌കാരം, പാരമ്പര്യം, പൈതൃകം എന്നിവയെക്കുറിച്ച് അഭിമാനവും ആദരവും വളര്‍ത്തിയെടുക്കേണ്ടത് അത്യാവശ്യമാണ്. ഇന്ത്യക്കാരെന്ന നിലയില്‍, ഇന്ത്യന്‍ പുരാണങ്ങളോടും മിത്തുകളോടുമുള്ള ജനങ്ങളുടെ താല്‍പ്പര്യം തിരിച്ചറിഞ്ഞാണ് ലോകമെമ്പാടുമുള്ള പ്രേക്ഷകര്‍ക്കായി ഹരി ഓം രൂപകല്‍പ്പന ചെയ്തിരിക്കുന്നത്- അഗര്‍വാള്‍ പ്രസ്താവനയില്‍ പറഞ്ഞു.
ശ്രീ തിരുപ്പതി ബാലാജി, മാതാ സരസ്വതി, ഛായാ ഗ്രാഹ് രാഹു കേതു, ജയ് ജഗന്നാഥ്, കൈകേയി കേ റാം, മാ ലക്ഷ്മി തുടങ്ങിയ നിരവധി സീരിസുകള്‍ ഒരുങ്ങുന്നുണ്ട്. പ്രശസ്തരായ അഭിനേതാക്കള്‍ ഇവയുടെ ഭാഗമാകുമെന്നും അഗര്‍വാള്‍ കൂട്ടിച്ചേര്‍ത്തു.
കഴിഞ്ഞ ഫെബ്രുവരിയില്‍ ഉല്ലു ഡിജിറ്റല്‍ ഐപിഒ വഴി ഫണ്ട് സമാഹരിക്കാനുള്ള അപേക്ഷ സെബിക്ക് നല്‍കിയിരുന്നു. അതേ സമയം പരാതികളെ തുടര്‍ന്ന് കോര്‍പ്പറേറ്റ് കാര്യ മന്ത്രാലയവും സെബിയും ഇലക്ട്രോണിക്സ് ആന്‍ഡ് ഇന്‍ഫര്‍മേഷന്‍ ടെക്നോളജി മന്ത്രാലയവും ഉല്ലുവിനെതിരെ അന്വേഷണം ആരംഭിക്കുകയും ചെയ്തു. ഈ വിവാദങ്ങള്‍ക്കിടയിലാണ് ഭക്തി പ്ലാറ്റ്‌ഫോം പ്രഖ്യാപിച്ചത്.
അശ്ലീല ഉള്ളടക്കം പ്രദര്‍ശിപ്പിച്ചതിന് ഒടിടി ആപ്പുകളും സോഷ്യല്‍ മീഡിയാ പ്ലാറ്റ്ഫോമുകളും അടുത്തിടെ കേന്ദ്രസര്‍ക്കാര്‍ നിരോധിച്ചിരുന്നു. മലയാളം ഒടിടി ആപ്പായ യെസ്മ ഉള്‍പ്പടെ 18 പ്ലാറ്റ്ഫോമുകളാണ് കേന്ദ്ര വാര്‍ത്താ വിതരണ മന്ത്രാലയം നിരോധിച്ചത്. ഇതോടൊപ്പം 19 വെബ്സൈറ്റുകള്‍, 10 ആപ്പുകള്‍ (ഏഴ് എണ്ണം ഗൂഗിള്‍ പ്ലേസ്റ്റോറില്‍ നിന്നും 3 എണ്ണം ആപ്പിള്‍ ആപ്പ്സ്റ്റോറില്‍ നിന്നും) 57 സോഷ്യല്‍ മീഡിയാ അക്കൗണ്ടുകളും നിരോധിച്ചു. സിനിമകളും ഹ്രസ്വചിത്രങ്ങളുമാണ് ഇത്തരം പ്ലാറ്റ്ഫോമുകളിലൂടെ സ്ട്രീം ചെയ്യുന്നത്. ഉള്ളടക്കത്തിന്റെ ഒരു പ്രധാന ഭാഗം അശ്ലീലവും സ്ത്രീകളെ അപമാനിക്കുന്ന രീതിയില്‍ ചിത്രീകരിക്കുന്നു എന്നതും ചൂണ്ടിക്കാട്ടിയായിരുന്നു നിരോധനം. എന്നാല്‍ ഈ പട്ടികയില്‍ ഉല്ലു ഉള്‍പ്പെട്ടിരുന്നില്ല. പിന്നീട് ഫണ്ട് സമാഹരിക്കാനുള്ള അപേക്ഷ സമര്‍പ്പിച്ച ശേഷമാണ് ഉല്ലുവിനെതിരേ അന്വേഷണം ആരംഭിച്ചത്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
