വിടപറഞ്ഞിട്ട് 16 കൊല്ലം, അപ്പൻ ഈ ലോകത്തില്ല എന്നുപറയുമ്പോൾ പലരും ഞെട്ടുന്നു- ജീക്കു ജെയിംസ്

‘ഇന്ന് അപ്പന്റെ ജന്മദിനമാണ്. വർഷങ്ങൾ ഇത്രയുമായിട്ടും മലയാളികളുടെ മനസ്സിൽനിന്ന് മാറാതെ നിൽക്കുന്ന ഒരുപിടി കഥാപാത്രങ്ങൾ ചെയ്തതുകൊണ്ടാവാം, ഇന്നും അറിയുന്ന പലരും അപ്പൻ ഈ ലോകത്തില്ല എന്നുപറയുമ്പോൾ ഞെട്ടുന്നത്‌. ഈ ലോകത്തോട് വിടപറഞ്ഞിട്ടു 16 കൊല്ലം ആയെങ്കിലും ആളുകളുടെ മനസ്സിൽ മായാതെ കിടക്കുന്ന ഒരു പിടി നല്ല കഥാപാത്രങ്ങൾ..

ഒരിക്കലും മറക്കാത്ത ഈ കഥാപാത്രങ്ങൾ സമ്മാനിച്ച സിനിമയിലെ സുഹൃത്തുക്കളോട് നന്ദി പറയുന്നു. ഈ ലോകത്തുനിന്ന് വിട്ടുപോയെങ്കിലും ഇപ്പോഴും കൂടെയുണ്ട് എന്ന് ഞാനും വിശ്വസിക്കുന്നു.. ജീക്കു കുറിച്ചു.

മീശമാധവൻ, പെരുവണ്ണാപുരത്തെ വിശേഷങ്ങൾ, പത്രം, ഒരു മറവത്തൂർ കനവ് തുടങ്ങി150 ഓളം ചിത്രങ്ങളിൽ ജെയിംസ് ചാക്കോ അഭിനയിച്ചിട്ടുണ്ട്. മീശമാധവന്‍ എന്ന ചിത്രത്തിലെ പട്ടാളം പുരുഷു ഇന്നും മലയാളികളുടെ പ്രിയപ്പെട്ട കഥാപാത്രമാണ്. 1955 ഒക്ടോബർ 16-ന്, തിരുവനന്തപുരത്താണ് ജെയിംസ് ചാക്കോ ജനിച്ചത്. ആർട്ട് ആൻഡ് പ്രൊഡക്ഷൻ മാനേജരായാണ് സിനിമയിലെത്തുന്നത്. നെടുമുടി വേണുവിന്റെ മാനേജരായും പ്രവർത്തിച്ചിട്ടുണ്ട്. 2007 ജൂൺ 14-നാണ് ജെയിംസ് ചാക്കോ ലോകത്തോട് വിടപറഞ്ഞത്.