വലിയ റിലീസുകളുമില്ല, കാണാൻ ആളും വരുന്നില്ല; തെലങ്കാനയിൽ തിയേറ്ററുകൾ രണ്ടാഴ്ച അടച്ചിടും

വലിയ ചിത്രങ്ങളില്ലാത്തതും മോശം വരുമാനവുമാണ് തിയേറ്ററുകൾ അടച്ചിടുന്നതിലേക്ക് തെലങ്കാനയിലെ തിയേറ്ററുമകളെ നയിച്ചത്. ഇപ്പോൾ പുരോ​ഗമിച്ചുകൊണ്ടിരിക്കുന്ന ഇന്ത്യൻ പ്രീമിയർ ലീ​ഗും നടക്കാനിരിക്കുന്ന ലോക്സഭാ തിരഞ്ഞെടുപ്പും പ്രേക്ഷകരെ തിയേറ്ററുകളിലേക്കെത്തിക്കുന്നതിൽനിന്ന് പിന്തിരിപ്പിച്ചു എന്നാണ് വിലയിരുത്തൽ. പത്ത് മുതൽ പതിനഞ്ച് ദിവസംവരെയാണ് തിയേറ്ററുകൾ അടച്ചിടുകയെന്ന് തെലങ്കാന തിയേറ്റർ അസോസിയേഷൻ അറിയിച്ചു.

റിപ്പോർട്ടുകളനുസരിച്ച് മേയ് 26-നോ 31-നോ ആകും ഇനി തിയേറ്ററുകൾ വീണ്ടും തുറന്ന് പ്രവർത്തിക്കുക. തെലങ്കാനയിലും ആന്ധ്രാപ്രദേശിലും ആയിരക്കണക്കിന് തിയേറ്ററുകൾ ഉണ്ട്. മുൻവർഷങ്ങളിലെല്ലാം തിയേറ്ററുകളിൽ ആളുകളെക്കൊണ്ട് നിറഞ്ഞിരിക്കുന്ന സമയമാണ് വേനൽക്കാലം. എന്നാൽ 2024-ലെ ഇക്കഴിഞ്ഞ കുറച്ചുമാസങ്ങൾ പല തിയേറ്റർ ഉടമകൾക്കും, പ്രത്യേകിച്ച് സിംഗിൾ സ്‌ക്രീനുകൾക്ക് കഠിനമായിരുന്നു. ബിഗ് ബജറ്റ് സിനിമകൾ വിജയിക്കുന്നതിൽ പരാജയപ്പെട്ടപ്പോൾ, ചെറുകിട, ഇടത്തരം ബജറ്റ് ചിത്രങ്ങൾ അപ്രസക്തമാവുകയുംചെയ്തു.

മേയ് 31-ന് റിലീസാവുന്ന, വിശ്വക് സെൻ നായകനാവുന്ന ​ഗ്യാങ്സ് ഓഫ് ​ഗോദാവരി എന്ന ചിത്രത്തിലേക്കാണ് ഏവരുടേയും കണ്ണ്. പ്രഭാസ് നായകനാവുന്ന കൽക്കി, അല്ലു അർജുൻ ചിത്രം പുഷ്പ, കമൽ ഹാസൻ മുഖ്യവേഷത്തിലെത്തുന്ന ഇന്ത്യൻ 2, രാം ചരൺ നായകനാവുന്ന ​ഗെയിം ചേഞ്ചർ എന്നിവയെല്ലാം വരും മാസങ്ങളിൽ തിയേറ്ററുകളിലെത്തുന്നുണ്ട്. ഈ ചിത്രങ്ങളിലൂടെ ഇപ്പോഴത്തെ പ്രതിസന്ധി മറികടക്കാനാവും എന്നാണ് തെലങ്കാനയിലെ തിയേറ്ററുടമകൾ പ്രതീക്ഷിക്കുന്നത്.