മോഹന്‍ലാലിനെ നായകനാക്കി പൃഥ്വിരാജ് സംവിധാനംചെയ്ത ലൂസിഫറിന്റെ രണ്ടാംഭാഗം എമ്പുരാന്റെ നിര്‍മാണത്തിലും വിതരണത്തിലും പങ്കാളിയായതിന് പിന്നാലെ പ്രതികരണവുമായി നിര്‍മാതാവ് ഗോകുലം ഗോപാലന്‍. തര്‍ക്കങ്ങള്‍ തീര്‍ത്ത് നല്ലതിലേക്ക് എത്തിക്കുവാന്‍ കഴിഞ്ഞതില്‍ ഏറെ സന്തോഷമുണ്ടെന്ന് ഗോകുലം ഗോപാലന്‍ ഫെയ്‌സ്ബുക്കില്‍ കുറിച്ചു. നേരത്തെ, പ്രഖ്യാപിച്ച മാര്‍ച്ച് 27-ന് തന്നെ സിനിമ റിലീസ് ചെയ്യുമെന്ന് അണിയറ പ്രവര്‍ത്തകര്‍ വ്യക്തമാക്കിയിരുന്നു.
‘നല്ലൊരു സിനിമ, അതിന്റെ സാങ്കേതിക തികവുകൊണ്ടും നിര്‍മാണ പാടവംകൊണ്ടും മികച്ചതായി നില്‍ക്കുമ്പോള്‍ ഏതൊരു പ്രതിസന്ധി വന്നാലും അത് അഭ്രപാളിയില്‍ എത്തിക്കാന്‍ വൈകരുത് എന്നതാണ് എന്റെ അഭിപ്രായം. തര്‍ക്കങ്ങള്‍ തീര്‍ത്ത് നല്ലതിലേക്ക് എത്തിക്കുവാന്‍ കഴിഞ്ഞതില്‍ ഏറെ സന്തോഷം. സിനിമ പ്രേമികള്‍ ആവേശത്തോടെ കാത്തിരിക്കുന്ന ‘എമ്പുരാന്‍’ തീരുമാനിച്ച തിയ്യതിയില്‍ തന്നെ റിലീസ് ചെയ്യാന്‍ പറ്റുമെന്ന വിശ്വാസമുണ്ട്’, എന്നായിരുന്നു ഗോകുലം ഗോപാലന്‍ ഫെയ്‌സ്ബുക്കില്‍ കുറിച്ചത്.
മലയാളം, തമിഴ്, തെലുങ്ക്, ഹിന്ദി, കന്നഡ ഭാഷകളില്‍ ഗ്ലോബല്‍ റിലീസായാണ് ചിത്രം തിയ്യറ്ററുകളില്‍ എത്തുന്നത്. 27-ന് രാവിലെ ആറിനാണ് ആദ്യപ്രദര്‍ശം. 2019 ല്‍ റിലീസ് ചെയ്ത ബ്ലോക്ക്ബസ്റ്റര്‍ ചിത്രം ലൂസിഫറിന്റെ രണ്ടാം ഭാഗമായി എത്തുന്ന എമ്പുരാന്‍ നിര്‍മ്മിച്ചിരിക്കുന്നത്, ലൈക്ക പ്രൊഡക്ഷന്‍സ്, ആശീര്‍വാദ് സിനിമാസ്, ശ്രീ ഗോകുലം മൂവീസ് എന്നിവയുടെ ബാനറില്‍ സുഭാസ്‌കരന്‍, ആന്റണി പെരുമ്പാവൂര്‍, ഗോകുലം ഗോപാലന്‍ എന്നിവര്‍ ചേര്‍ന്നാണ്. മൂന്നു ഭാഗങ്ങളായി കഥ പറയുന്ന ഒരു സിനിമാ സീരിസിന്റെ രണ്ടാം ഭാഗമാണ് എമ്പുരാന്‍.
ഖുറേഷി-അബ്രാം / സ്റ്റീഫന്‍ നെടുമ്പള്ളി എന്ന പ്രധാന കഥാപാത്രമായി മോഹന്‍ലാല്‍ അഭിനയിക്കുന്ന ചിത്രത്തില്‍ പൃഥ്വിരാജ്, മഞ്ജു വാര്യര്‍, ടൊവിനോ തോമസ്, ഇന്ദ്രജിത് സുകുമാരന്‍, സുരാജ് വെഞ്ഞാറമൂട്, ജെറോം ഫ്‌ലിന്‍, ബൈജു , സായ്കുമാര്‍, ആന്‍ഡ്രിയ ടിവാടര്‍, അഭിമന്യു സിങ്, സാനിയ ഇയ്യപ്പന്‍, ഫാസില്‍, സച്ചിന്‍ ഖഡ്കര്‍, നൈല ഉഷ, ജിജു ജോണ്‍, നന്ദു, മുരുകന്‍ മാര്‍ട്ടിന്‍, ശിവജി ഗുരുവായൂര്‍, മണിക്കുട്ടന്‍, അനീഷ് ജി മേനോന്‍, ശിവദ, അലക്‌സ് ഒനീല്‍, എറിക് എബണി, കാര്‍ത്തികേയ ദേവ്, മിഹയേല് നോവിക്കോവ്, കിഷോര്‍, സുകാന്ത്, ബെഹ്സാദ് ഖാന്‍, നിഖാത് ഖാന്‍, സത്യജിത് ശര്‍മ്മ, നയന്‍ ഭട്ട്, ശുഭാംഗി, ജൈസ് ജോസ് തുടങ്ങി വമ്പന്‍ താരനിരയാണ് അണിനിരക്കുന്നത്. ഗെയിം ഓഫ് ത്രോണ്‍സിലൂടെ ലോക പ്രശസ്തനായ ജെറോം ഫ്ളിന്നിന്റെ സാന്നിധ്യം ചിത്രത്തിന്റെ താരനിരക്ക് നല്‍കിയത് ഒരു ഇന്റര്‍നാഷണല്‍ അപ്പീലാണ്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
