'ഒട്ടകത്തിന്റെ കണ്ണിലെ നജീബ്'; പ്രേക്ഷകരെ ഞെട്ടിച്ച ആ ഷോട്ടിനുപിന്നിലെ കഥപറഞ്ഞ് പൃഥ്വി

‘എങ്ങനെയെങ്കിലും ഷൂട്ട് ഒന്ന് തീരണേ എന്ന് കരുതുമ്പോൾപ്പോലും ഒരു ഷോട്ട് മാത്രം എടുത്ത ദിവസങ്ങളുണ്ട്. ബ്ലെസിച്ചേട്ടനും ക്യാമറാമാൻ സുനിലും പോയി എല്ലാം സെറ്റ് ചെയ്ത് മരുഭൂമിയിൽ ഒരു പ്രത്യേക ലൈറ്റ് കണ്ടീഷൻ വരാൻ കാത്തിരിക്കും. അവർ നിശ്ചയിച്ച സ്ഥലത്ത് ചെന്നിരുന്ന് മണിക്കൂറുകളോളം കാത്തിരുന്ന് ഷോട്ടെടുത്ത് ലൈറ്റ് പോയെന്നുപറഞ്ഞ് പാക്കപ്പ് ചെയ്ത ദിവസങ്ങൾ ഇത്രയും പ്രശ്നങ്ങൾക്കിടയിലുണ്ടായിട്ടുണ്ട്.

ഒരു ഒട്ടകത്തിന്റെ കണ്ണ് മാക്രോ ലെൻസുവെച്ച് ഷൂട്ട് ചെയ്ത രം​ഗമുണ്ട് സിനിമയിൽ. ഞാൻ മൃ​ഗങ്ങളോട് യാത്രപറയുന്ന സീനാണ്. പുസ്തകം വായിച്ചവർക്ക് അറിയാം. ആ സമയമായപ്പോഴേക്കും അവയൊക്കെ നമ്മളുമായി ഇണങ്ങിയിരുന്നു. കൂട്ടത്തിൽ കാണാൻ ഭം​ഗിയുള്ള ഒരു ഒട്ടകമുണ്ട്. പുള്ളിക്കാരനെയാണ് ഈ ഷോട്ടിന് നിർത്തിയിരിക്കുന്നത്. ഒട്ടകത്തിന് ഭക്ഷണം ഇട്ടുകൊടുത്ത് ഞാൻ യാത്ര പറയുമ്പോൾ ഒട്ടകം എഴുന്നേറ്റുനിന്ന് എന്നെയൊന്ന് നോക്കി. അതുകണ്ട് ബ്ലെസിച്ചേട്ടൻ പറഞ്ഞു അതുകൊള്ളാം, ഇനി ഒട്ടകത്തിന്റെ പ്രതികരണം ഒന്നെടുക്കാമെന്ന്.

ഒരു ദിവസം വൈകീട്ട് നാല് നാലര മണിക്കാണ് എന്റെ ഷോട്ടെടുത്തത്. ആ സമയത്ത് വേണമല്ലോ ഒട്ടകത്തിന്റെയും ഷോട്ടെടുക്കാൻ. എത്രയോ ദിവസങ്ങൾ മൂന്നരയാവുമ്പോൾ ഷൂട്ട് നിർത്തിയശേഷം ക്യാമറയുമായി ഒട്ടകത്തിന്റെ മുന്നിൽച്ചെന്ന് നിൽക്കും. എട്ട് ദിവസമൊക്കെ എടുത്തിട്ടാണ് നിങ്ങൾ ഇപ്പോൾ കാണുന്ന ആ റിഫ്ളക്ഷൻ ഷോട്ട് കിട്ടിയത്. അങ്ങനെയൊരു സിനിമ ചിത്രീകരിക്കാൻ സാധിച്ചു എന്നത് എനിക്ക് വലിയൊരു ഭാ​​ഗ്യവും അഭിമാനവുമുള്ള കാര്യമായി തോന്നുന്നു.’ പൃഥ്വി പറഞ്ഞു.

ബെന്യാമിന്റെ വിഖ്യാത നോവലിനെ അടിസ്ഥാനമാക്കിയൊരുക്കിയിരിക്കുന്ന ചിത്രം ഈ മാസം 28-നാണ് റിലീസ് ചെയ്യുന്നത്. ചിത്രത്തിലെ ആദ്യ​ഗാനം പുറത്തുവന്നിരിക്കുകയാണ് ഇപ്പോൾ. എ.ആർ. റഹ്മാനാണ് ചിത്രത്തിന്റെ സം​ഗീതസംവിധാനം.