പ്രഖ്യാപനം മുതൽ മലയാളി പ്രേക്ഷകര്‍ ഏറ്റവുമധികം ആകാംക്ഷയോടെ കാത്തിരിക്കുന്ന ചിത്രങ്ങളിൽ ഒന്നാണ് ബ്ലെസ്സി സംവിധാനം ചെയ്യുന്ന മലയാളത്തിന്റെ സ്വന്തം ‘ആടുജീവിതം’. 2024-ലെ മാതൃഭൂമി ലിറ്ററേച്ചർ ഫെസ്റ്റിവലിൽ, ‘ആടുജീവിതം’ നോവലിന്റെ രചയിതാവ് ബെന്യാമിനും അതേ നോവലിൻ്റെ ചലച്ചിത്രാവിഷ്‌കാരത്തിൻ്റെ സംവിധായകനുമായ ബ്ലെസിയും മലയാള സിനിമയും സാഹിത്യവും തമ്മിലുള്ള ബന്ധത്തെക്കുറിച്ച് സംസാരിച്ചു.
അതേ വേദിയില്‍ വെച്ച് ചിത്രത്തിലെ നായകനായ പൃഥ്വിരാജ് സുകുമാരൻ്റെ ടീം 2020 മാർച്ചിൽ കോവിഡ്-19 മഹാവ്യാധിയുടെ ആദ്യ നാളുകളിൽ ജോർദാനിലെ വാദി റം എന്ന പ്രദേശം വഴി ആടുജീവിതത്തിന്റെ അണിയറപ്രവര്‍ത്തകര്‍ നടത്തിയ യാത്രയുടെ പിന്നണി വീഡിയോ സദസ്സിനു മുന്നില്‍ അവതരിപ്പിച്ചു. വിവിധ രാജ്യക്കാരായ അണിയറപ്രവര്‍ത്തകര്‍ വിഷമതകള്‍ക്കിടയിലും മരുഭൂമിയ്ക്കു നടുവില്‍ ഒറ്റക്കെട്ടായി നിന്ന് കളിച്ചും ചിരിച്ചും ആഘോഷിച്ചും സമയം ചെലവഴിച്ചിരുന്ന കാഴ്ച ഈ വീഡിയോയില്‍ കാണാം.
വീഡിയോയില്‍ ചിത്രത്തിനായുള്ള തൻ്റെ അസാധാരണമായ ട്രാന്‍സ്ഫര്‍മേഷനെക്കുറിച്ചും, ഷൂട്ടിംഗ് ആരംഭിക്കുന്നതിന് മുമ്പ് ആ പുരോഗതി നഷ്ടപ്പെടുമോ എന്ന ഭയത്തെക്കുറിച്ചും പൃഥ്വിരാജ് സംസാരിച്ചു, “ബ്ലെസി സാറിൻ്റെ ഏറ്റവും വലിയ ആശങ്ക എൻ്റെ 8 മാസത്തെ അദ്ധ്വാനത്തിന്റെ ഫലമായ ഫിസിക്കല്‍ ട്രാന്‍സ്ഫര്‍മേഷന്‍ പാഴായിപ്പോവുമോ എന്നതായിരുന്നു. അത് പാഴായിപ്പോവാതെ പ്രയോജനപ്പെടുത്തേണ്ടതുണ്ടായിരുന്നു.
ജോർദാനിലേക്ക് പോകുന്നതിന് മുമ്പത്തെ രണ്ടാഴ്ച ഞാൻ ഓസ്ട്രിയയിൽ വിവമേർ എന്ന സ്ഥലത്തായിരുന്നു, ആവും വിധം സ്വന്തം ശരീരം കഥാപാത്രത്തിന് കൂടുതല്‍ യോജിച്ചതാക്കി എടുക്കാന്‍. പക്ഷേ പെട്ടെന്ന്, അപ്രതീക്ഷിതമായി കോവിഡ് 19 ഒരു പകർച്ചവ്യാധിയായി പ്രഖ്യാപിക്കപ്പെട്ടു.
ബ്ലെസി സാർ എന്നോട് എപ്പോഴും ആശങ്ക പ്രകടിപ്പിക്കുമായിരുന്നു, ‘രാജൂ, ഞങ്ങൾ ഇത് ഷൂട്ട് ചെയ്യാൻ തീരുമാനിക്കുമ്പോഴെല്ലാം നിങ്ങൾ വീണ്ടും ഇത്രയേറെ കഷ്ടപ്പെടേണ്ടിവരും, നിങ്ങളുടെ മുഴുവൻ ഫിസിക്കല്‍ ട്രാന്‍സ്ഫര്‍മേഷനും വീണ്ടും ചെയ്യേണ്ടിവരും.” അദ്ദേഹം ഇതുതന്നെയായിരുന്നു ഓരോ രാത്രിയും എന്നോട് ചോദിച്ചിരുന്നത്. അപ്പോള്‍ എൻ്റെ മറുപടി, ‘ബ്ലെസി സർ, നമുക്ക് വേറെ വഴിയുണ്ടോ’ എന്നായിരുന്നു.
പക്ഷേ ഒടുവില്‍ എനിക്കാ അവസ്ഥ നേരിടേണ്ടിവന്നു. ” മുമ്പൊരിക്കലും കണ്ടിട്ടില്ലാത്ത മഹാവ്യാധിയുടെ നടുവിൽ സിനിമാസംഘത്തിനൊപ്പം കുടുങ്ങിയതിൻ്റെ അനുഭവം പങ്കുവെച്ചുകൊണ്ട് ബ്ലെസി പറഞ്ഞു, “സ്വപ്‌നങ്ങളുമായി ഈ മരുഭൂമിയിൽ എത്തിയ ഞങ്ങളുടെ ആവേശം കോവിഡ്-19 എന്ന മഹാമാരി ലോകത്തെ ബാധിച്ചതിനെ കുറിച്ചറിഞ്ഞപ്പോൾ ഭയമായി മാറി.
അറുപതോളം ദിവസം ഞങ്ങൾ ഈ മരുഭൂമിയിൽ ഒറ്റപ്പെട്ടു. 2020 മാർച്ച് 9-നായിരുന്നു ആയിരുന്നു ഞങ്ങളുടെ രണ്ടാം ഷെഡ്യൂൾ ഷൂട്ട് ചെയ്യാൻ ഞങ്ങൾ ജോർദാനിൽ ഇറങ്ങിയത്.
അന്നുമുതല്‍ ഓരോ ദിവസവും ഞങ്ങൾക്ക് വെല്ലുവിളി നിറഞ്ഞതായിരുന്നു. ദുഷ്‌കരമായ സമയങ്ങളിൽ ഒരുമിച്ച് നിൽക്കാനുള്ള ധൈര്യമാണ് ഈ സിനിമ ഞങ്ങളുടെ ടീമിലെ എല്ലാ ചെറിയ അംഗങ്ങളെയും പഠിപ്പിച്ചത്, അത് എനിക്ക് ഏറ്റവും വിശേഷപ്പെട്ട
കാര്യമായി തോന്നുന്നു.” പൃഥ്വിരാജിന്റെ കരിയറിലെ തന്നെ ഏറ്റവും വലിയ സിനിമയാണ് ആടുജീവിതം. ഓസ്‌കാർ അവാർഡ് ജേതാക്കളായ എ ആർ റഹ്‌മാൻ സംഗീതവും റസൂൽ പൂക്കുട്ടി ശബ്ദമിശ്രണവും നിർവഹിക്കുന്ന ചിത്രത്തിൽ പൃഥ്വിരാജിന്റെ നായികയായെത്തുന്നത് അമല പോളാണ്.
വിഷ്വൽ റൊമാൻസിന്റെ ബാനറിലാണ് ചിത്രം എത്തുന്നത്. ജിമ്മി ജീൻ ലൂയിസ് (ഹോളിവുഡ് നടൻ), കെ ആർ ഗോകുൽ, പ്രശസ്ത അറബ് അഭിനേതാക്കളായ താലിബ് അൽ ബലൂഷി, റിക്കബി എന്നിവരാണ് ചിത്രത്തിലെ മറ്റുപ്രധാന കഥാപാത്രങ്ങളെ അവതരിപ്പിക്കുന്നത്.
മലയാളത്തിനു പുറമേ ഹിന്ദി, തമിഴ്, തെലുങ്ക്, കന്നഡ എന്നീ ഭാഷകളിലും ചിത്രം ഒരുങ്ങുന്നുണ്ട്. സുനിൽ കെ.എസ് ആണ് ഛായാഗ്രഹണം, എഡിറ്റിംഗ് ശ്രീകർ പ്രസാദ്, ഡിജിറ്റൽ മാർക്കറ്റിംഗ്: ഒബ്സ്‌ക്യൂറ എന്റർടൈൻമെന്റ്സ്, പിആർഒ: ആതിര ദിൽജിത്ത്.
ആടുജീവിതം ഏപ്രില്‍ 10-ന് ലോകമെമ്പാടുമുള്ള തിയേറ്ററുകളില്‍ റിലീസ് ചെയ്യും. …
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
