ഹോയ് ഹോയ് പാട്ട് ഇനി കേൾക്കാനാവില്ല; ചാഹത് ഫത്തേ അലി ഖാന്റെ വൈറൽ ​ഗാനം യൂട്യൂബ് നീക്കംചെയ്തു

വ്യാഴാഴ്ചയാണ് ഖാന്റെ ​ഗാനം യൂട്യൂബിൽനിന്ന് നീക്കിയത്. പാകിസ്താനുപുറമേ ഇന്ത്യ, ബം​ഗ്ലാദേശ് തുടങ്ങിയ രാജ്യങ്ങളിലും ​ഗാനം ചർച്ചയായിരുന്നു. 28 മില്ല്യൺ പേരായിരുന്നു ​ഗാനം ഇതുവരെ കണ്ടത്. ടോക്ക് ഷോകളിലൂടെയും മറ്റും ശ്രദ്ധേയനായ ചാഹത് മുൻ ക്രിക്കറ്റ് താരം കൂടിയാണ്. നിരവധി മീമുകളിലൂടെ പ്രശസ്തനായ ആളാണ് ചാഹത് ഫത്തേ അലി ഖാൻ.

1973-ൽ പുറത്തിറങ്ങിയ ‘ബനാർസി തഗ്’ എന്ന ചിത്രത്തിലെ ഗാനമാണ് ‘ബഡോ ബാഡി’. ഈ പാട്ടിന്റെ ഒരു ഭാഗമാണ് ചാഹത് ഖാൻ തന്റെ ശൈലിയിലാക്കി പാടിയത്. കവർ സോങ് ഒരുക്കി ഒരു ക്ലാസിക് ഗാനത്തെ നശിപ്പിച്ചു എന്നടതക്കം നിരവധി വിമർശനങ്ങളാണ് പിന്നീട് ഉയർന്നുവന്നിരുന്നത്. എങ്കിലും റീൽസിലടക്കം ഈ പാട്ട് ട്രെൻഡായിരുന്നു.

വജ്ധാൻ റാവു റംഘാർ എന്ന മോഡലാണ് ​ഗാനരം​ഗത്തിൽ ചാഹത്തിനൊപ്പം പ്രത്യക്ഷപ്പെട്ടത്. ​ഗാനരം​ഗത്തിൽ അഭിനയിച്ചതിന് നിരവധി പേരാണ് തനിക്കെതിരെ വിമർശനവുമായെത്തിയതെന്ന് ഈയിടെ ഒരു അഭിമുഖത്തിൽ അവർ പറഞ്ഞിരുന്നു. ഈ ​ഗാനം തന്റെ കരിയർ നശിപ്പിക്കുകയാണെന്നും വസ്ത്രം വാങ്ങാൻപോലും പണമില്ലാതിരുന്ന അവസ്ഥയിലാണ് ഈ ​ഗാനത്തിൽ അഭിനയിച്ചതെന്നും അവർ പറഞ്ഞിരുന്നു.

കാഷിഫ് റാണ എന്നാണ് 56-കാരനായ ചാഹത് ഫത്തേ അലി ഖാന്റെ യഥാർത്ഥ പേര്. ലാഹോറാണ് സ്വദേശം. 2020-ൽ കോവിഡ് കാലത്താണ് ഇദ്ദേഹം പ്രശസ്തിയിലേക്കുയർന്നത്.