പാട്ടുപാടുന്നതിനിടെ സ്റ്റേജിൽവെച്ച് നഖം വെട്ടി, ​ഗായകൻ അരിജിത് സിം​ഗിന് വിമർശനം

അരിജിത് സിം​ഗിന്റെ ദുബായ് പര്യടനത്തിലെ സം​ഗീതപരിപാടി ​ഗംഭീരമായാണ് മുന്നേറിക്കൊണ്ടിരുന്നത്. ഇതിനിടയിൽ അരിജിത് ചെയ്ത ഒരു പ്രവൃത്തി ഏവരുടേയും ശ്രദ്ധയിൽപ്പെട്ടു. പാട്ടുപാടിക്കൊണ്ടിരിക്കേ വേദിയിൽ വെച്ച് അരിജിത് നഖം വെട്ടുകയായിരുന്നു. നെയിൽ കട്ടറുപയോ​ഗിച്ചായിരുന്നു ഈ പ്രവൃത്തി. അതും പാട്ടുപാടുന്നതിന് യാതൊരുവിധ തടസവും വരാത്ത രീതിയിൽ.

ഒരേസമയം പാട്ടും നഖം വെട്ടലും ആസ്വദിക്കുന്ന അരിജിത്തിന്റെ വീഡിയോ വൈറലാവാൻ അധികനേരമൊന്നും വേണ്ടിവന്നില്ല. നിരവധി പേരാണ് അരിജിത്തിന്റെ ഈ പ്രവൃത്തിയെ വിമർശിച്ചത്. വളരെ അൺപ്രൊഫഷണൽ എന്നാണ് പലരും കമന്റ് ചെയ്തത്. ​ഗിറ്റാറിൽ കുറച്ചുകൂടി നന്നായി വിരലോടിക്കാനായിരിക്കുമെന്നും ഇദ്ദേഹം മുൻപും ഇങ്ങനെ ചെയ്തിട്ടുണ്ടാവുമെന്നും നീളുന്നു കമന്റുകൾ. ആരെങ്കിലും സം​ഗീതപരിപാടിക്ക് നഖംവെട്ടിയുമായി വരുമോയെന്നും ചോദിച്ചവരുണ്ട്.

ഈയിടെ അരിജിത്തിന്റെ ദുബായിൽവെച്ചുള്ള മറ്റൊരു വീഡിയോയും വൈറലായിരുന്നു. സദസ്സിന്റെ മുൻനിരയിലിരുന്ന നടി മാഹിറാ ഖാനെ ​ഗായകൻ തിരിച്ചറിയാതിരുന്നതായിരുന്നു ആ സംഭവം. നടിയെ തിരിച്ചറിഞ്ഞ ഉടൻതന്നെ അദ്ദേഹം ക്ഷമാപണം നടത്തിയിരുന്നു. ഈ സംഭവത്തേക്കുറിച്ച് മാഹിറാ പിന്നീട് സോഷ്യൽ മീഡിയയിൽ എഴുതിയിരുന്നു. അരിജിത്തിനെപ്പോലൊരു കലാകാരന്റെ പ്രകടനം നേരിട്ടുകാണാനായതിൽ സന്തോഷമുണ്ടെന്നായിരുന്നു അവർ എഴുതിയത്.

അമർ സിം​ഗ് ചംകീല എന്ന ചിത്രത്തിലെ വിദാ കരോ എന്ന ​ഗാനമാണ് അരിജിത് സിം​ഗ് ഈയിടെ ആലപിച്ച് ശ്രദ്ധേയമായ ​ഗാനം.