'തമിഴ് ചിത്രങ്ങളെക്കാൾ നന്നായി തമിഴ്നാട്ടിൽ ''മഞ്ഞുമ്മൽ ബോയ്സ്'' ഓടുന്നു'; പ്രശംസിച്ച് സംവിധായകർ

‘തമിഴ്നാട്ടിൽ മഞ്ഞുമ്മൽ ബോയ്സിനെ എല്ലാവരും ആഘോഷമാക്കുകയാണ്. നായകൻ-നായിക പ്രണയകഥകൾ ചെയ്തുകൊണ്ടിരിക്കുന്ന സമയത്ത് നായികയേയില്ലാതെ ഒരുകൂട്ടം ചെറുപ്പക്കാരെ വെച്ച് ഒരു പടം വന്നു. ആ ചിത്രം തമിഴ്നാട്ടിൽ തമിഴ് ചിത്രങ്ങളെക്കാൾ നന്നായി ഓടിക്കൊണ്ടിരിക്കുന്നു. തമിഴർക്ക് ഭാഷയൊരു പ്രശ്നമല്ല, കലയാണ് പ്രധാനം. നല്ല കലയെ ജനങ്ങൾ പിന്തുണയ്ക്കും’, വെങ്കട് പ്രഭു പറഞ്ഞു.

ഓരോ താരങ്ങൾക്ക് പ്രത്യേക ​ഗാനം എന്നൊന്നും വേർതിരിക്കാതെ വളരെ സിംപിളായി ഒരുക്കിയ ചിത്രമാണ് മഞ്ഞുമ്മൽ ബോയ്സ് എന്ന് പാ രഞ്ജിത്ത് പറഞ്ഞു. ക്ലെെമാക്സിൽ ഒരു ​ഗാനം കൊണ്ട് പ്രേക്ഷകരെ ചിത്രം വെെകാരികമായി സ്പർശിച്ചുവെന്നും അദ്ദേഹം കൂട്ടിച്ചേർത്തു.

ചിദംബരം സംവിധാനം ചെയ്ത ‘മഞ്ഞുമ്മൽ ബോയ്സ്’ ബോക്സോഫീസിൽ കുതിപ്പ് തുടരുകയാണ്. ആ​ഗോളതലത്തിൽ ചിത്രം 100 കോടി പിന്നിട്ടുകഴിഞ്ഞുവെന്നാണ് റിപ്പോർട്ടുകൾ. തമിഴ്നാട്ടിലും മികച്ച പ്രതികരണമാണ് ചിത്രത്തിന് ലഭിക്കുന്നത്. ഇതുവരെ തമിഴ്നാട്ടിൽ നിന്നുമാത്രം ചിത്രം 15 കോടിയിലധികം നേടിയെന്നാണ് റിപ്പോർട്ടുകൾ. തമിഴ്നാട്ടിൽ നിന്നും പത്തുകോടി രൂപ കളക്ഷൻ നേടുന്ന ആദ്യ മലയാള ചിത്രമാണിത്. ഓൺലെെൻ ടിക്കറ്റ് വിൽപ്പനയിലും ചിത്രം വൻകുതിപ്പ് നടത്തുകയാണ്.

ഫെബ്രുവരി 22-ന് തിയേറ്ററുകളിലെത്തിയ ചിത്രം ‘ഗുണാ കേവ്സ്’ ഉം അതിനോടനുബന്ധിച്ച് നടന്ന യഥാർഥ സംഭവത്തെയും ആസ്പദമാക്കി ഒരുക്കിയ ‌ഒരു സർവൈവൽ ത്രില്ലറാണ്. സൗബിൻ ഷാഹിർ, ശ്രീനാഥ് ഭാസി, ബാലു വർഗീസ്, ഗണപതി, ലാൽ ജൂനിയർ, ചന്തു സലീംകുമാർ, അഭിറാം രാധാകൃഷ്ണൻ, ദീപക് പറമ്പോൽ, ഖാലിദ് റഹ്‌മാൻ, അരുൺ കുര്യൻ, വിഷ്ണു രഘു തുടങ്ങിയവർ കേന്ദ്ര കഥാപാത്രങ്ങളെ അവതരിപ്പിക്കുന്ന ‘മഞ്ഞുമ്മൽ ബോയ്സ്’ കേരളത്തിലും തമിഴ്‌നാട്ടിലുമായാണ് ചിത്രികരിച്ചത്.

പറവ ഫിലിംസും ശ്രീ ഗോകുലം മൂവിസും ചേർന്ന് പ്രേക്ഷകർക്ക് മുന്നിലെത്തിക്കുന്ന ചിത്രത്തിന്റെ വേൾഡ് വൈഡ് ഡിസ്ട്രിബ്യുഷൻ ശ്രീ ഗോകുലം മൂവിസിന് വേണ്ടി ഡ്രീം ബിഗ് ഫിലിംസാണ് നിർവഹിക്കുന്നത്. ബാബു ഷാഹിർ, സൗബിൻ ഷാഹിർ, ഷോൺ ആന്റണി എന്നിവരാണ് നിർമ്മാതാക്കൾ.