അജു വര്‍ഗീസ്, നീരജ് മാധവ്, ഗൗരി ജി കിഷന്‍ എന്നിവര്‍ പ്രധാന വേഷത്തിലെത്തുന്ന ‘ലവ് അണ്ടര്‍ കണ്‍സ്ട്രക്ഷന്‍’ ട്രെയിലര്‍ പുറത്ത്. ഡിസ്‌നി ഹോട്സ്റ്റാറിന്റെ ആറാമത്തെ മലയാളം സീരീസാണിത്. പ്രണയവും കോമഡിയും കോര്‍ത്തിണക്കിയ ഈ സീരീസിന്റെ ട്രെയിലര്‍ ഇതിനോടകംതന്നെ ഒട്ടേറെ മുന്‍നിര താരങ്ങള്‍ സാമൂഹിക മാധ്യമത്തില്‍ പങ്കുവെച്ചിട്ടുണ്ട്. കേരള ക്രൈം ഫയല്‍സ്, പേരില്ലൂര്‍ പ്രീമിയര്‍ ലീഗ്, മാസ്റ്റര്‍പീസ് നാഗേന്ദ്രന്‍സ് ഹണിമൂണ്‍, 1000 ബേബീസ് എന്നീ ഹിറ്റ് സീരീസുകള്‍ക്ക് ശേഷമാണ് ഡിസ്‌നി ഹോട്സ്റ്റാര്‍ പുതിയ സീരീസുമായി എത്തുന്നത്.
ഒരു ചെറുപ്പക്കാരന്റെ സ്വപ്നമായ വീട്, അതിനൊപ്പം ജീവിതത്തിലെത്തിയ പ്രണയം, ഇത് രണ്ടും ഒരുമിച്ച് മുന്നോട്ടുകൊണ്ടുപോകാനുള്ള ശ്രമത്തിനിടെ നേരിടുന്ന സമ്മര്‍ദങ്ങളാണ് ഈ കോമഡി വെബ് സീരീസില്‍ പ്രമേയമാകുന്നത്. നര്‍മ പശ്ചാത്തലത്തിലൊരുങ്ങുന്ന സീരീസ് ഫെബ്രുവരി 28-ന് സ്ട്രീമിങ് ആരംഭിക്കും. വാശി എന്ന ചിത്രത്തിലൂടെ ശ്രദ്ധേയനായ വിഷ്ണു ജി. രാഘവാണ് ലവ് അണ്ടര്‍ കണ്‍സ്ട്രക്ഷന്റെ രചനയും സംവിധാനവും നിര്‍വഹിച്ചത്.
ആനന്ദ് മന്മഥന്‍, കിരണ്‍ പീതാംബരന്‍, സഹീര്‍ മുഹമ്മദ്, ഗംഗ മീര, ആന്‍ സലിം, തങ്കം മോഹന്‍, മഞ്ജുശ്രീ നായര്‍ എന്നിവരും സീരീസിലെ പ്രധാന കഥാപാത്രങ്ങളായി എത്തുന്നു. സംഗീതസംവിധാനം ഗോപി സുന്ദറാണ്. രജപുത്ര വിഷ്വല്‍ മീഡിയയുടെ ബാനറില്‍ എം. രഞ്ജിത്ത് നിര്‍മിച്ചിരിക്കുന്ന റൊമാന്റിക് കോമഡി വിഭാഗത്തില്‍പ്പെടുന്ന സീരീസിന്റെ എക്‌സിക്യൂട്ടീവ് പ്രൊഡ്യൂസര്‍ അവന്തിക രഞ്ജിത്താണ്. പി.ആര്‍.ഒ: റോജിന്‍ കെ. റോയ്. മാര്‍ക്കറ്റിങ്: ടാഗ് 360 ഡിഗ്രി.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
