ജോഫിന്‍ ചാക്കോയുടെ സംവിധാനത്തില്‍ ആസിഫ് അലിയും അനശ്വര രാജനും പ്രധാനകഥാപാത്രങ്ങളിലെത്തുന്ന രേഖാചിത്രം വ്യാഴാഴ്ച തിയേറ്ററുകളിലെത്തുകയാണ്. ഇപ്പോഴിതാ റിലീസിന് മണിക്കൂറുകള്‍ മാത്രം ബാക്കിനില്‍ക്കെ ചിത്രത്തില്‍ ആരാധകര്‍ക്കായി ഒരു സര്‍പ്രൈസ് ഒളിപ്പിച്ചിട്ടുണ്ടെന്ന് പറയുകയാണ് ആസിഫലി. രേഖാചിത്രത്തില്‍ മമ്മൂട്ടിയുണ്ടോയെന്ന ചോദ്യത്തിനുള്ള മറുപടിയാണ് താരം സാമൂഹികമാധ്യമങ്ങളില്‍ കുറിച്ചത്.
ചിത്രത്തില്‍ മമ്മൂട്ടിയുണ്ടോയെന്ന് വ്യക്തമായ ഉത്തരം നല്‍കുന്നില്ലെങ്കിലും ആരാധകര്‍ നിരാശരാകില്ലെന്നും ഒരു കുഞ്ഞു സര്‍പ്രൈസ് ഒളിഞ്ഞുകിടക്കുന്നുണ്ടെന്നും ആസിഫ് അലി പറയുന്നു.
“രേഖാചിത്രം’ എന്ന എന്റെ ഏറ്റവും പുതിയ ചിത്രം നാളെ തിയറ്ററുകളിലെത്തുകയാണ്. ഈ സിനിമയില്‍ മമ്മൂക്കയുണ്ടോ എന്ന ചോദ്യവും, ഉത്തരം തേടിയുള്ള സോഷ്യല്‍ മീഡിയ ചര്‍ച്ചകള്‍ നിങ്ങളെയൊക്കെ പോലെ തന്നെ ഞാനും കാണുന്നുണ്ട്. അതിനു നേരിട്ടൊരു മറുപടി തരാന്‍ ഈ ചിത്രത്തില്‍ അഭിനയിച്ച ഒരു നടന്‍ എന്ന നിലയില്‍ തല്‍ക്കാലം എനിക്ക് കഴിയില്ല. എങ്കിലും ഈ ചിത്രത്തില്‍ മമ്മൂക്കയെ പ്രതീക്ഷിക്കുന്നവര്‍ ആരും തന്നെ നിരാശരാവില്ല എന്ന് ഞാന്‍ ഉറപ്പ് തരുന്നു.നിങ്ങളെ കാത്ത് ഒരു കുഞ്ഞു സര്‍പ്രൈസ് ഈ സിനിമയില്‍ ഒളിഞ്ഞു കിടപ്പുണ്ട്. സിനിമയുടെ റിലീസ് കാത്തു നില്‍ക്കുന്ന ഈ രാത്രിയില്‍, നിങ്ങളെല്ലാവരുടെയും മുന്നില്‍ വച്ച് തന്നെ പറയണ്ട മറ്റൊരു കാര്യമുണ്ട് – അത് മമ്മൂട്ടി എന്ന മഹാനടനോടും, ഒരുപക്ഷെ അതിലേറെ, ഞാന്‍ ഒരുപാട് സ്‌നേഹിക്കുകയൂം ബഹുമാനിക്കുകയും ചെയ്യുന്ന മമ്മൂക്ക എന്ന വ്യക്തിയോടും ഉള്ള എന്റെ നന്ദിയാണ്. കാരണം അദ്ദേഹത്തിന്റെ സമ്മതവും, അനുഗ്രഹവും, അദ്ദേഹം തന്ന ധൈര്യവും, ഞങ്ങളോടും ഈ സിനിമയോടും അദ്ദേഹം കാണിച്ച തുറന്ന മനസ്സും ഇല്ലാതെ, ഒരിക്കലും ഈ സിനിമ സംഭവിക്കില്ലായിരുന്നു. ഈ സിനിമയിലെന്ന പോലെ, എന്റെ കരിയറിലും, ദിശാബോധവും ധൈര്യവും തന്ന ഒരു നെടുംതൂണായി അദ്ദേഹത്തിന്റെ പ്രെസെന്‍സ് എന്നുമുണ്ടായിരുന്നു. ഒരു സോഷ്യല്‍ മീഡിയ പോസ്റ്റില്‍ പറഞ്ഞാല്‍ തീരുന്നതല്ല, എന്നാലും മമ്മൂക്ക – എന്റെ മനസ്സും ഉള്ളും നിറഞ്ഞ നന്ദി”, ആസിഫ് അലി കുറിച്ചു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
