ആളുകൾക്ക് കൂടുതലിഷ്ടം കാർത്തിയെ, എനിക്ക് അസൂയ തോന്നുന്നു -സൂര്യ

രാജു മുരുകൻ സംവിധാനം ചെയ്യുന്ന ജപ്പാൻ ആണ് കാർത്തിയുടെ 25-ാം ചിത്രമായി തിയേറ്ററുകളിലെത്തുന്നത്. ഇതിനുമുന്നോടിയായി കാർത്തി 25 എന്നുപേരിട്ട ആഘോഷം ചെന്നൈയിൽ നടന്നിരുന്നു. ഈ പരിപാടിയിൽ തമിഴ് ചലച്ചിത്രലോകത്തുനിന്നും നിരവധി പ്രമുഖർ പങ്കെടുത്തിരുന്നു. എങ്കിലും സൂര്യയായിരുന്നു പ്രധാന ആകർഷണം. തനിക്ക് കാർത്തിയോട് ആസൂയയാണെന്നാണ് വേദിയിൽ സംസാരിക്കവേ സൂര്യ തമാശയായി പറഞ്ഞത്. തന്നേക്കാളും പ്രേക്ഷകർക്ക് ഇഷ്ടം കാർത്തിയോടാണെന്നതാണ് അതിന് കാരണമെന്നും സൂര്യ പറഞ്ഞു.

“എന്നേക്കാളും ആളുകൾക്കിഷ്ടം കാർത്തിയോടാണെന്ന് കേൾക്കുമ്പോൾ എനിക്ക് അസൂയ തോന്നാറുണ്ട്. ക്ഷേത്രങ്ങളിലും വിമാനത്താവളങ്ങളിലും എല്ലായിടത്തും ആളുകൾ എന്റെ അടുക്കൽ വരുന്നു. അവർ എന്നെക്കാൾ അവനെ എങ്ങനെ ഇഷ്ടപ്പെടുന്നുവെന്ന് എന്നോട് പറയുന്നു. കാർത്തിക്ക് വേണമെങ്കിൽ ഇപ്പോൾ 50 സിനിമകൾ ചെയ്യാനാവുമായിരുന്നു. എന്നാൽ ചെയ്ത ഓരോ ചിത്രത്തിനും ആവശ്യമായ സമയവും പരിശ്രമവും അദ്ദേഹം നൽകി. അതുകൊണ്ടാണ് നമ്മൾ ഇപ്പോൾ കാർത്തിയുടെ 25-ാം ചിത്രം ആഘോഷിക്കുന്നത്. ‘പരുത്തിവീരൻ’, ‘നാൻ മഹാൻ അല്ല’ പോലെ രണ്ട് തലത്തിൽ നിൽക്കുന്ന ചിത്രങ്ങളെ അദ്ദേഹം എങ്ങനെ ചെയ്തു എന്ന് ഞാൻ ഇപ്പോഴും ആലോചിച്ച് വിസ്മയിക്കുന്നുണ്ട്. ഞങ്ങളുടെ യാത്രകൾ തികച്ചും വ്യത്യസ്തമാണെന്ന് സ്ഥിരീകരിക്കപ്പെട്ടിരിക്കുന്നു.” സൂര്യ പറഞ്ഞു.

രാജു മുരുകൻ രചനയും സംവിധാനവും നിർവഹിക്കുന്ന ഈ സിനിമയിൽ നായികയാവുന്നത് അനു ഇമ്മാനുവലാണ്. ഡ്രീം വാരിയർ പിക്ചർസിൻ്റെ ബാനറിൽ എസ്.ആർ.പ്രകാശ് ബാബു, എസ്.ആർ.പ്രഭു എന്നിവർ നിർമ്മിക്കുന്ന ആറാമത്തെ കാർത്തി ചിത്രമാണ് ‘ ജപ്പാൻ ‘. തെലുങ്ക് നടൻ സുനിൽ ഈ സിനിമയിൽ മുഖ്യ കഥാപാത്രത്തെ അവതരിപ്പിക്കുന്നു. ഗോലി സോഡ, കടുക് എന്നീ സിനിമകൾ സംവിധാനം ചെയ്ത് ശ്രദ്ധേയനായ ഛായാഗ്രാഹകൻ വിജയ് മിൽട്ടനും മറ്റൊരു പ്രധാന കഥാപാത്രത്തെ അവതരിപ്പിക്കുന്നുണ്ട്.

രവി വർമ്മനാണ് ഛായഗ്രാഹകൻ. ജി. വി. പ്രകാശ് കുമാറാണ് സംഗീത സംവിധായകൻ. അനൽ അരസ് ഒരുക്കുന്ന ആക്ഷൻ രംഗങ്ങൾ ചിത്രത്തിൻ്റെ ഹൈ ലൈറ്റ് ആണ്. വ്യത്യസ്തമായ രൂപഭാവത്തിലുള്ള നായക കഥാപാത്രത്തെയാണ് കാർത്തി അവതരിപ്പിക്കുന്നത്. തമിഴ്നാട്, കേരളം ഉൾപ്പെടെ വിവിധ സംസ്ഥാനങ്ങളിലായിട്ടാണ് ‘ ജപ്പാൻ ‘ ചിത്രീകരിച്ചിരിക്കുന്നത്. ഈ മാസം പത്തിന് ചിത്രം തിയേറ്ററുകളിലെത്തും.