മമ്മൂട്ടിയുടെ പിറന്നാള്‍ ദിനത്തില്‍ വികാരനിര്‍ഭരമായ കുറിപ്പ് പങ്കുവച്ച് നടന്‍ ഇര്‍ഷാദ് അലി. നിറക്കൂട്ട് റിലീസ് ചെയ്തത് തന്റെ പിതാവ് വിടപറഞ്ഞ സമയത്തായിരുന്നുവെന്നും അദ്ദേഹത്തിന്റെ നാല്‍പ്പത് കഴിയും മുന്‍പ് ആരുമറിയാതെ സിനിമ കാണാന്‍ പോയതും ഓര്‍ത്തെടുക്കുകയാണ് ഇര്‍ഷാദ്. പിന്നീട് വര്‍ഷങ്ങള്‍ക്ക് ശേഷം തന്റെ ഉമ്മ മരിച്ചപ്പോള്‍ മമ്മൂട്ടി വന്നത് ഒരു ചരിത്ര സംഭവമായിരുന്നുവെന്ന് ഇര്‍ഷാദ് പറയുന്നു.
ഉപ്പ മരിച്ച ഓര്‍മ്മ പോലും ഒരു സിനിമാക്കഥയായാണ് എപ്പോഴും തികട്ടി വരിക. പൂവച്ചല്‍ ഖാദറിന്റെ ‘പൂമാനമേ ഒരു രാഗമേഘം താ’ എന്ന പാട്ട് കേള്‍ക്കുമ്പോള്‍ എനിക്കതോര്‍മ്മ വരും. അക്കൊല്ലത്തെ ഏറ്റവും വലിയ ഹിറ്റ് പടമായിരുന്നു. ഡെന്നിസ് ജോസഫിന്റെ തിരക്കഥയില്‍ ജോഷിയെടുത്ത മമ്മൂക്കയുടെ ‘നിറക്കൂട്ട് ‘. അന്നത്തെ എന്റെ ഭ്രാന്തുകളില്‍ ഒന്നാമതാണ് മമ്മൂക്ക. ഫാനെന്നൊന്നും പറഞ്ഞാല്‍ പോര, മമ്മൂട്ടി എന്റെ രക്തത്തില്‍ അലിഞ്ഞ കാലമാണത്.
ഉപ്പ മരിച്ചതൊന്നും ജൂബിലി പ്രോഡക്ഷന്‍സിനു അറിഞ്ഞു കൂടല്ലോ. നിറക്കൂട്ട് റിലീസായി, നാല്‍പ്പത് കഴിയാതെ എങ്ങോട്ടും തിരിയാന്‍ പറ്റില്ല. മകനാണ്, നാല്‍പ്പത് വലിയ ചടങ്ങാണ്. എത്ര സ്വയം പറഞ്ഞു മനസിലാക്കാന്‍ ശ്രമിച്ചിട്ടും മമ്മൂക്ക ഉള്ളില്‍ നിന്ന് വിളിച്ചുകൊണ്ടേയിരുന്നു, ‘ നിനക്കെന്നെ കാണണ്ടേ? ഒന്ന് വന്നേച്ചും പോടാ. ഉപ്പയ്ക് അതൊക്കെ മനസിലാവും’. നാല്‍പ്പത് വിളിക്കാന്‍ കുടുംബ വീടുകളില്‍ പോകണം. മുതിര്‍ന്നവര്‍ ഉണ്ടെങ്കിലും, ചില സ്ഥലങ്ങളില്‍ പറയാനുള്ള ജോലി വാശിപിടിച്ചു വാങ്ങി പുറത്ത് ചാടി. അങ്ങനെ പോയാണ് നിറക്കൂട്ട് കാണുന്നത്.
ഒരുപാടുകൊല്ലങ്ങള്‍ക്കിപ്പുറം ഉമ്മ മരിച്ച ദിവസം ഞാനതൊക്കെ വീണ്ടുമോര്‍ത്തു. ഉമ്മയ്ക്ക് കാന്‍സറായിരുന്നു. അത് തിരിച്ചറിഞ്ഞ ദിവസം ഞാനെടുത്ത ഒരു പടമുണ്ട്. ഇപ്പോഴും എപ്പോഴും എന്നേക്കും എന്നെ കരയിക്കുന്ന പടം. ഉമ്മ പോയി, നാലു മണിക്കാണ് മയ്യത്തെടുത്തത്. കബറടക്കം കഴിഞ്ഞു തിരിച്ചു വന്നപ്പോഴാണ് മമ്മൂക്ക വന്നത്. ആന്റോ ജോസഫും മമ്മൂക്കയും. സിനിമാക്കാര്‍ പലരും അന്നവിടെ ഉണ്ട്. പക്ഷെ മമ്മൂക്കയുടെ വരവ് അങ്ങനെയല്ല. അതൊരു ചരിത്ര ദൗത്യമാണ്. എനിക്ക് പറയണമെന്നുണ്ടായിരുന്നു, ”മമ്മൂക്കാ, ഉപ്പ മരിച്ചു നല്‍പ്പത് തികയും മുന്‍പ് നിങ്ങളെ കാണാന്‍ മരണ വീട്ടില്‍ നിന്നും ചാടിപ്പോയ ഒരൊമ്പതാം ക്ലാസുകാരനുണ്ട്. അവന്റെയുമ്മയുടെ മയ്യത്തടക്കിയ നേരത്ത് നിങ്ങള്‍ വരാതെങ്ങനെയാണ് !’ എന്ന്.
പ്രിയപ്പെട്ട മമ്മുക്കാക്ക് ഒരായിരം ജന്മദിനാശംസകള്‍
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
