ഹണി റോസ് ഒരു മനുഷ്യ സ്ത്രീയാണെന്ന പരിഗണനപോലും നല്‍കാതെയാണ് ബോബി ചെമ്മണ്ണൂര്‍ പെരുമാറിയതെന്ന് നടിയും സാമൂഹ്യപ്രവര്‍ത്തകയുമായ മാലാ പാര്‍വതി. വേദിയില്‍ കയറ്റിനിര്‍ത്തി അപമാനിച്ച് ഒരു തമാശ വസ്തുവാക്കി മാറ്റി സാമൂഹിക മാധ്യമങ്ങള്‍ക്ക് ഇട്ടുകൊടുത്തു. ഇതിനെതിരെ ഹണി റോസ് പൊരുതാന്‍ തീരുമാനിച്ചത് വലിയ കാര്യമാണെന്നും മാലാ പാര്‍വതി മാതൃഭൂമി ന്യൂസിനോട് പ്രതികരിച്ചു. ഹണി റോസിന്റെ പരാതിയില്‍ ബോബി ചെമ്മണ്ണൂരിനെ പോലീസ് കസ്റ്റഡിയിലെടുത്തതിന് പിന്നാലെയാണ് മാലാ പാര്‍വതിയുടെ പ്രതികരണം.
‘ഹണി സാധാരണ ഒരാള്‍ക്കെതിരെയല്ല പരാതി കൊടുത്തത്. അവരെ ഒരു പരിപാടിക്ക് വിളിച്ചുകൊണ്ടുപോയി വേദിയില്‍ നിര്‍ത്തി അപമാനിക്കുകയാണ് ചെയ്തത്. എന്നിട്ട് ഒരു മനുഷ്യനാണെന്ന പരിഗണനപോലും നല്‍കാതെ എന്തു വേണമെങ്കിലും പറഞ്ഞോളൂ എന്ന തരത്തില്‍ ആളുകള്‍ക്ക് ഇട്ടുകൊടുത്തു. പുരുഷനാണോ സ്ത്രീയാണോ എന്നതല്ല. ഒരു മനുഷ്യനാണെന്ന പരിഗണനപോലും നല്‍കിയില്ല. കോമഡി വസ്തുവാക്കി കൊത്തിപ്പറിക്കാനായി ഇട്ടുകൊടുത്തു. അവരെ പറയാനുള്ള കാര്യങ്ങളും ഇട്ടുകൊടുത്തു. പണത്തിന്റേയും പ്രതാപത്തിന്റേയും സമൂഹത്തിലെ ബന്ധങ്ങളുടേയും അടിസ്ഥാനത്തില്‍ ഏറ്റവും മുകളില്‍ നില്‍ക്കുന്ന ഒരാളാണ് ഇത് ചെയ്തത്. അങ്ങനെ ചെയ്യുമ്പോള്‍ ആ കുട്ടി അയാള്‍ക്കെതിരെ പൊരുതാന്‍ തയ്യാറായി എന്നത് വലിയ കാര്യമാണ്. സമൂഹത്തിന്റെ മുന്നില്‍ മോശമായ കാര്യങ്ങളൊക്കെ അയാള്‍ സാധാരണ കാര്യങ്ങളാക്കി മാറ്റി.
ഹണി റോസിനെ മാത്രമല്ല, ചായക്കടയിലെ ഒരു മനുഷ്യനെ കിട്ടിയാല്‍പോലും ദ്വയാര്‍ഥ പ്രയോഗങ്ങളോടെ പുച്ഛിക്കുന്ന വ്യക്തിയാണ്. അദ്ദേഹം മാത്രമാണ് ഒരു പുരുഷന്‍ എന്നും ബാക്കിയുള്ളവര്‍ മുഴുവന്‍ മ്ലേച്ചന്‍മാര്‍ എന്ന നിലയ്ക്കും എല്ലാവരേയും കളിയാക്കുന്ന വ്യക്തിയാണ് അയാള്‍. പല ആളുകളും അത് തമാശയായാണ് കണ്ടത്. എന്താണ് നര്‍മം എന്നുള്ളതിനെ കുറിച്ചുള്ള അബദ്ധ ധാരണ കൂടി അതിനകത്തുണ്ടെന്ന് തോന്നുന്നു. പണ്ടെല്ലാം ടോയ്‌ലറ്റില്‍ എഴുതിവെയ്ക്കാറില്ലേ അതേ മാനസികാവസ്ഥയാണ്. നിയമത്തില്‍ എല്ലാവരും വിശ്വസിക്കുന്നു. എത്രത്തോളം കൂടെ നില്‍ക്കും എന്ന് കണ്ടറിയണം. വേഗത്തില്‍ പോലീസ് നടപടി സ്വീകരിച്ചതില്‍ ഒരുപാട് സന്തോഷമുണ്ട്.’-മാലാ പാര്‍വതി വ്യക്തമാക്കി.
ബോബി ചെമ്മണ്ണൂര്‍ അശ്ലീല അധിക്ഷേപങ്ങള്‍ നടത്തിയെന്ന ഹണി റോസിന്റെ പരാതിയില്‍ വയനാട്ടില്‍വെച്ചാണ് പോലീസ് ബോബി ചെമ്മണ്ണൂരിനെ അറസ്റ്റ് ചെയ്തത്. സ്ത്രീകള്‍ക്കുനേരെ അശ്ലീല പരാമര്‍ശം നടത്തുക, അത്തരം പരാമര്‍ശങ്ങള്‍ സാമൂഹികമാധ്യമങ്ങളിലൂടെ പ്രചരിപ്പിക്കുക എന്നീ കുറ്റകൃത്യങ്ങളാണ് ബോബി ചെമ്മണ്ണൂരിനെതിരെ ചുമത്തിയിരിക്കുന്നത്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
