ചുരുങ്ങിയ കാലവും സിനിമകളുംകൊണ്ട് പ്രേക്ഷകരുടെ മനസിൽ ഇടംപിടിച്ച കന്നഡ നടനും സംവിധായകനുമാണ് റിഷഭ് ഷെട്ടി. താൻ സിനിമയിലേക്കുവരാൻപ്രചോദനമായ വ്യക്തികളിൽ ഏറ്റവും പ്രധാനപ്പെട്ട ഒരാൾ തമിഴ് സൂപ്പർതാരമായ വിക്രം ആണെന്ന് പലപ്പോഴും റിഷഭ് പറഞ്ഞിട്ടുണ്ട്. ഇപ്പോഴിതാ തന്റെ പ്രിയതാരത്തെ നേരിൽക്കണ്ടതിന്റെ സന്തോഷത്തിലാണ് റിഷഭ് ഇപ്പോൾ.
തങ്കലാൻ എന്ന ചിത്രത്തിന്റെ പ്രചാരണത്തിന് കഴിഞ്ഞദിവസം വിക്രം ബെംഗളൂരുവിലെത്തിയിരുന്നു. ഇതിനിടയിലായിരുന്നു റിഷഭ് ഷെട്ടിയും ചിയാനും തമ്മിൽ കണ്ടത്. ഏറ്റവും ഭാഗ്യമുള്ള ഒരാളെന്നാണ് റിഷഭ് കൂടിക്കാഴ്ചയ്ക്ക് ശേഷം സ്വയം വിശേഷിപ്പിച്ചത്. എല്ലാവരേയും പ്രചോദിപ്പിക്കുന്നതിന് വിക്രമിനോട് നന്ദിയും പറഞ്ഞു അദ്ദേഹം.
“നടനാവാനുള്ള എന്റെ യാത്രയിൽ എപ്പോഴും പ്രചോദനമായിരുന്നത് വിക്രം സാർ ആയിരുന്നു. 24 വർഷത്തെ കാത്തിരിപ്പിനുശേഷം എന്റെ ആരാധനാമൂർത്തിയെ ഇന്ന് നേരിൽക്കാണുമ്പോൾ തോന്നുന്നത് ഭൂമിയിലെ ഏറ്റവും ഭാഗ്യവാനായ വ്യക്തി ഞാനാണെന്നാണ്. എന്നെപ്പോലുള്ള നിരവധി നടന്മാർക്ക് പ്രചോദനമാകുന്നതിന് നന്ദി. തങ്കലാന് എല്ലാവിധ ഭാവുകങ്ങളും നേരുന്നു, ലവ് യു.” ഡ്രീം കം ട്രൂ എന്ന ഹാഷ്ടാഗിനൊപ്പം റിഷഭ് കുറിച്ചതിങ്ങനെ.
നിലവിൽ കാന്താര എന്ന ചിത്രത്തിന്റെ പ്രീക്വൽ ഒരുക്കുന്ന തിരക്കിലാണ് റിഷഭ് ഷെട്ടി. കാന്താരാ എ ലെജൻഡ് – ചാപ്റ്റർ 1 എന്നാണ് ചിത്രത്തിന്റെ പേര്. ഹോംബാലെ ഫിലിംസിന്റെ ബാനറിൽ വിജയ് കിരാഗണ്ടൂ‍ർ ആണ് വൻ ബജറ്റിൽ ഒരുങ്ങുന്ന ചിത്രത്തിന്റെ നിർമ്മാണം. കന്നഡ, ഹിന്ദി, തമിഴ്, തെലുങ്ക്, മലയാളം, ബംഗാളി, ഇംഗ്ലീഷ് എന്നീ ഏഴു ഭാഷകളിൽ ആണ് കാന്താരാ എ ലെജൻഡ് റിലീസ് ചെയ്യുന്നത്.
കോലാര്‍ സ്വര്‍ണഖനി പശ്ചാത്തലമായി അണിയിച്ചൊരുക്കിയ പീരിയോഡിക്കല്‍ ആക്ഷന്‍ ചിത്രമാണ് ‘തങ്കലാന്’. സ്വര്‍ണഖനനത്തിനായി ബ്രിട്ടീഷുകാര്‍ ഒരു ഗ്രാമത്തിലേക്ക് വരുന്നതിനെ തുടര്‍ന്നുണ്ടാകുന്ന സംഭവവികാസങ്ങളാണ് ‘തങ്കലാ’ന്റെ പ്രമേയം. ആഗസ്റ്റ് 15-ന് തമിഴ്, മലയാളം, തെലുങ്ക്, കന്നഡ, ഹിന്ദി ഭാഷകളിലായി ‘തങ്കലാന്’ തിയേറ്ററുകളിലെത്തും. പാർവതി, മാളവിക മോഹനൻ, പശുപതി, ഹരികൃഷ്ണന്‍ അന്‍പുദുരൈ, പ്രീതി കരണ്‍, മുത്തുകുമാര്‍ തുടങ്ങിയവരാണ് മറ്റ് അഭിനേതാക്കള്‍.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
