വയനാടിന് കൈത്താങ്ങുമായി നസ്രിയയും ഫഹദും; 25 ലക്ഷം രൂപ ധനസഹായം

“വയനാടിന്റെ അവസ്ഥയില്‍ ദുഖം തോന്നുന്നു. സര്‍ക്കാറിന്റെ നേതൃത്വത്തില്‍ ദുരിതാശ്വാസ പ്രവര്‍ത്തകരും സംഘടനകളും സൈന്യവും ജനങ്ങളും നടത്തുന്ന രക്ഷാപ്രവര്‍ത്തനങ്ങള്‍ അഭിനന്ദനം അര്‍ഹിക്കുന്നു. നമ്മുടെ ജനങ്ങളുടെ അര്‍പ്പണബോധവും പ്രതിസന്ധികളെ തരണം ചെയ്യാനുമുള്ള കഴിവ് പ്രചോദനം നല്‍കുന്നതാണ്. ഈ അവസരത്തില്‍ ദുരിതാശ്വാസ പ്രവര്‍ത്തനങ്ങള്‍ക്ക് പിന്തുണ പ്രഖ്യാപിക്കുന്നു. അതിനായി മുഖ്യമന്ത്രിയുടെ ദുരിതാശ്വാസനിധിയിലേക്ക് 25 ലക്ഷം സംഭാവന ചെയ്യുന്നു- വാര്‍ത്താകുറിപ്പില്‍ നസ്രിയയും ഫഹദും വ്യക്തമാക്കി. മനസ്സും പ്രാര്‍ഥനയും ജനങ്ങള്‍ക്കൊപ്പമാണെന്ന് ഇരുവരും കൂട്ടിച്ചേര്‍ത്തു.

നടന്‍മാരായ മമ്മൂട്ടിയും ദുല്‍ഖര്‍ സല്‍മാനും ദുരിതാശ്വാസ നിധിയിലേക്ക് സംഭാവന ചെയ്തു. എറണാകുളം കടവന്ത്ര റീജണല്‍ സ്‌പോര്‍ട്ട്‌സ് സെന്ററിലെ വയനാട് ദുരിതാശ്വാസ സഹായ ശേഖരണ കേന്ദ്രത്തില്‍ എത്തിയാണ് മമ്മൂട്ടി സഹായം ഏല്‍പ്പിച്ചത്. സഹായധന ചെക്കുകള്‍ മമ്മൂട്ടിയില്‍നിന്ന് മന്ത്രി പി.രാജീവും ജില്ലാ കളക്ടര്‍ എന്‍.എസ്.കെ. ഉമേഷും ചേര്‍ന്ന് ഏറ്റുവാങ്ങി. മമ്മൂട്ടി 20 ലക്ഷം രൂപയും മകന്‍ ദുല്‍ഖര്‍ സല്‍മാന്‍ 15 ലക്ഷം രൂപയും സംഭാവനയായി നല്‍കി.

നേരത്തെ അന്യഭാഷാ താരങ്ങളും സഹായവുമായി എത്തിയിരുന്നു. സൂര്യ, കാര്‍ത്തി, ജ്യോതിക, രശ്മിക മന്ദാന എന്നിവരാണ് ഇപ്പോള്‍ ദുരിതാശ്വാസ പ്രവര്‍ത്തനങ്ങള്‍ക്കുള്ള സാമ്പത്തികസഹായം വാഗ്ദാനംചെയ്ത് രംഗത്തെത്തിയത്. നടന്‍ വിക്രം മുഖ്യമന്ത്രിയുടെ ദുരിതാശ്വാസ നിധിയിലേക്ക് 20 ലക്ഷം രൂപ സംഭാവന ചെയ്തതിന് പിന്നാലെയാണിപ്പോള്‍ കൂടുതല്‍ താരങ്ങള്‍ സഹായവുമായി രംഗത്തെത്തിയത്.

മുഖ്യമന്ത്രിയുടെ ദുരിതാശ്വാസ നിധിയിലേക്ക് 50 ലക്ഷം രൂപയാണ് സൂര്യയും കാര്‍ത്തിയും ജ്യോതികയും ചേര്‍ന്ന് നല്‍കിയത്. ഹൃദയം തകര്‍ന്നുപോകുന്നു എന്നാണ് സൂര്യ വയനാട്ടിലെ ദുരന്തത്തോട് പ്രതികരിച്ചത്. വാര്‍ത്ത കണ്ടപ്പോള്‍ ഹൃദയം നുറുങ്ങിപ്പോയെന്നാണ് രശ്മിക സോഷ്യല്‍ മീഡിയയില്‍ കുറിച്ചത്. ഭീകരമാണീ അവസ്ഥ. ദുരിതബാധിതരുടെ കുടുംബങ്ങള്‍ക്കായി പ്രാര്‍ത്ഥിക്കുന്നുവെന്നും രശ്മിക എഴുതി. 10 ലക്ഷം രൂപ മുഖ്യമന്ത്രിയുടെ ദുരിതാശ്വാസനിധിയിലേക്ക് താരം സംഭാവന ചെയ്തിട്ടുണ്ടെന്ന് ദേശീയ മാധ്യമങ്ങള്‍ റിപ്പോര്‍ട്ട് ചെയ്തു.