ട്രെയിലറും ഒരു ഗാനവും പുറത്തിറങ്ങി 13 വര്‍ഷമാണ് വിശാല്‍ നായകനാകുന്ന മദഗജരാജ എന്ന ചിത്രം തിയേറ്ററുകളില്‍ എത്തുന്നതിനായി അദ്ദേഹത്തിന്റെ ആരാധകര്‍ക്ക് കാത്തിരിക്കേണ്ടി വന്നത്. 2013-ല്‍ ഇറങ്ങേണ്ട ചിത്രം 2025-ല്‍ റിലീസ് ചെയ്യുമ്പോള്‍ വലിയ ആവേശത്തിലാണ് വിശാല്‍ ആരാധകര്‍. എന്നാല്‍, സിനിമയുടെ പ്രൊമോഷന്‍ പരിപാടിക്കായി എത്തിയ വിശാലിന്റെ ആരോഗ്യാവസ്ഥ വലിയ ആശങ്കയാണ് ആരാധകരില്‍ ഉണ്ടാക്കിയിരിക്കുന്നത്.
ആരോഗ്യ പ്രശ്‌നങ്ങള്‍ നേരിടുന്നതിനിടെയാണ് അദ്ദേഹം പ്രൊമോഷന്‍ പരിപാടികള്‍ക്കായി എത്തിയതെന്നാണ് വിവരം. വിറയലോടെ മൈക്ക് പിടിച്ചുസംസാരിക്കുന്ന വിശാലാണ് വീഡിയോയിലുള്ളത്. ഇതോടെ താരത്തിന്റെ ആരോഗ്യപ്രശ്നത്തിൽ ആശങ്കയറിയിച്ച് നിരവധിപേർ കമന്റ് ചെയ്തു. എന്നാൽ കടുത്ത പനിയും അതേതുടര്‍ന്നുള്ള വിറയലുമാണ് വിശാലിന്റെ ആരോഗ്യാവസ്ഥയ്ക്ക് പിന്നിലെന്നാണ് റിപ്പോർട്ടുകൾ. സിനിമയെ കുറിച്ച് സംസാരിച്ച് തുടങ്ങിയെങ്കിലും മോശം ആരോഗ്യാവസ്ഥയെ തുടര്‍ന്ന് അത് പൂര്‍ത്തിയാക്കാന്‍ അദ്ദേഹത്തിന് സാധിക്കുന്നില്ലെന്ന് വീ‍ഡിയോയിൽ കാണാം.
ആരോഗ്യ പ്രശ്‌നങ്ങള്‍ അലട്ടുമ്പോഴും അദ്ദേഹം സിനിമയുടെ പ്രൊമോഷനായി എത്തി. ഇതാണ് ഡെഡിക്കേഷന്‍ എന്നുള്ള തരത്തിലാണ് കുറിപ്പുകളെല്ലാം. പെട്ടെന്ന് സുഖം പ്രാപിക്കട്ടെയെന്ന ആശംസകളുടെ വലിയ നിരയാണ് സാമൂഹിക മാധ്യമങ്ങളില്‍ നിറയുന്നത്.
തമിഴിലെ ഈ വര്‍ഷത്തെ പ്രധാന തിയേറ്റര്‍ റിലീസാണ് വിശാല്‍ നായകനായ മദഗജരാജ. 2013-ല്‍ തിയേറ്ററുകളിലെത്തേണ്ട ചിത്രമാണ് ഒരു വ്യാഴവട്ടത്തിനുശേഷം റിലീസിനൊരുങ്ങുന്നത്. സുന്ദര്‍ സി സംവിധാനം ചെയ്ത ചിത്രം ഈ മാസം 12-ന് തിയേറ്ററുകളിലെത്തും. 2011-ല്‍ മദഗജരാജയുടെ ട്രെയിലറും ഒരു ഗാനവും പുറത്തുവന്നിരുന്നു. 2013-ല്‍ റിലീസ് ചെയ്യേണ്ടിയിരുന്നെങ്കിലും സാമ്പത്തിക പ്രശ്‌നംമൂലം റിലീസ് നീളുകയായിരുന്നു. ഇതിനിടെ വിശാലും സുന്ദര്‍.സിയും അവരുടേതായി നിരവധി ചിത്രങ്ങളും ചെയ്തു.
അഞ്ജലിയും വരലക്ഷ്മി ശരത്കുമാറുമാണ് നായികമാര്‍. സോനു സൂദ് വില്ലന്‍ വേഷത്തിലെത്തുന്നു. സതീഷ്, അന്തരിച്ച നടന്മാരായ മയില്‍സാമി, മനോബാല എന്നിവരും സുപ്രധാന വേഷങ്ങളിലുണ്ട്. വിജയ് ആന്റണിയാണ് സംഗീത സംവിധാനം. ചിത്രത്തിനായി വിശാല്‍ ഒരു ഗാനം ആലപിച്ചിട്ടുണ്ട്. റിച്ചാര്‍ഡ്.എം.നാഥന്‍ ഛായാഗ്രഹണവും പ്രവീണ്‍ കെ.എല്‍, എന്‍.ബി.ശ്രീകാന്ത് എന്നിവര്‍ എഡിറ്റിങ്ങും നിര്‍വഹിച്ചിരിക്കുന്നു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
