കഥാപാത്രത്തിന്റെ പൂർണതയ്ക്കുവേണ്ടി എന്തും ചെയ്യാൻ തയ്യാറാവുന്ന നടനാണ് വിക്രം. അന്യനിലും പിതാമകനിലും കാശിയിലും ദൈവത്തിരുമകളിലുമെല്ലാം പ്രേക്ഷകർ ഇക്കാര്യം നേരിട്ടുകണ്ടതാണ്. പുറത്തിറങ്ങാനിരിക്കുന്ന തങ്കലാന്റെ ഇതുവരെ വന്ന അപ്ഡേഷനുകളെല്ലാം നോക്കിയാലും ഞെട്ടിക്കാൻ തന്നെയാണ് വിക്രമിന്റെ തീരുമാനം. ചിത്രത്തേക്കുറിച്ച് ചിയാൻ പുറത്തുവിട്ട ഒരു വിവരം പ്രേക്ഷകരെ ഒന്നടങ്കം ഞെട്ടിച്ചിരുന്നു.
കോലാർ സ്വർണ ഖനിയുടെ പശ്ചാത്തലത്തിൽ പാ രഞ്ജിത് ഒരുക്കുന്ന പീരിയോഡിക്കൽ ആക്ഷൻ ചിത്രമാണ് തങ്കലാൻ. കോലാർ സ്വർണ ഖനിയുടെ തുടക്കകാലത്ത് നടന്ന സംഘർഷഭരിതമായ സംഭവങ്ങളാണ് ചിത്രത്തിൽ സംവിധായകൻ പാ രഞ്ജിത് ഒരുക്കിവെച്ചിരിക്കുന്നതെന്നാണ് ടീസറും പോസ്റ്ററുകളും നൽകുന്ന സൂചന. ചിത്രത്തിൽ തനിക്ക് സംഭാഷണങ്ങളൊന്നുമില്ലെന്ന് തങ്കലാന്റെ തെലുങ്ക് ടീസർ ലോഞ്ചിനിടെ വിക്രം പറഞ്ഞിരുന്നു.
സംഭാഷണങ്ങൾക്കുപകരം പ്രത്യേകതരം ശബ്ദങ്ങളും അലർച്ചയുമൊക്കെയാണ് തനിക്കുള്ളതെന്നുമുള്ള അദ്ദേഹത്തിന്റെ വാക്കുകൾ ആരാധകരിൽ ഒരേസമയം കൗതുകവും ആശയക്കുഴപ്പവും തീർത്തിരുന്നു. എന്നാൽ ഇപ്പോൾ ഈ വിഷയത്തിൽ വ്യക്തതവരുത്തിയിരിക്കുകയാണ് താരത്തിന്റെ മാനേജർ സൂര്യനാരായണൻ. ഒരു റിപ്പോർട്ടറുടെ ചോദ്യത്തിന് മറുപടിയായി തമാശയായാണ് വിക്രം തനിക്ക് തങ്കലാനിൽ സംഭാഷണങ്ങളില്ലെന്ന് പറഞ്ഞതെന്ന് മാനേജർ വ്യക്തതവരുത്തി. ടീസറിൽ തനിക്ക് സംഭാഷണങ്ങളില്ലെന്നാണ് വിക്രം ഉദ്ദേശിച്ചതെന്നും സൂര്യനാരായണൻ കൂട്ടിച്ചേർത്തു.
ബാലയുടെ സംവിധാനത്തിൽ 2003-ൽ പുറത്തുവന്ന പിതാമകൻ എന്ന ചിത്രത്തിലും വിക്രമിന് സംഭാഷണങ്ങൾ ഉണ്ടായിരുന്നില്ല. സിത്തൻ എന്ന ഈ കഥാപാത്രത്തിലൂടെ മികച്ച നടനുള്ള ദേശീയ പുരസ്കാരവും അദ്ദേഹത്തെ തേടിയെത്തി.
പാർവതി തിരുവോത്തും മാളവികാ മോഹനനുമാണ് നായികമാർ. പശുപതി, ഹരികൃഷ്ണൻ അൻപുദുരൈ, പ്രീതി കരൺ, മുത്തുകുമാർ തുടങ്ങിയവരാണ് മറ്റ് അഭിനേതാക്കൾ. നച്ചത്തിരം നഗർകിറത് എന്ന ചിത്രത്തിന് ശേഷം പാ രഞ്ജിത് സംവിധാനം ചെയ്യുന്ന ചിത്രമാണ് തങ്കലാൻ. സംവിധായകൻ പാ രഞ്ജിത്തും തമിഴ് പ്രഭും ചേർന്നാണ് തിരക്കഥ രചിച്ചിരിക്കുന്നത്. കഥാപാത്രത്തിനായുള്ള വിക്രമിന്റെ തയ്യാറെടുപ്പുകൾ ഉൾക്കൊള്ളിച്ചുകൊണ്ടുള്ള മേക്കിങ് വീഡിയോ നേരത്തേ പുറത്തിറക്കിയിരുന്നു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
അഴകിയ പെരിയവൻ സംഭാഷണവും എ കിഷോർ കുമാർ ഛായാഗ്രഹണവും നിർവഹിക്കുന്നു. എസ്.എസ്. മൂർത്തിയാണ് കലാ സംവിധാനം. ജി.വി പ്രകാശ് കുമാറാണ് സംഗീതസംവിധാനം. കെ.യു. ഉമാദേവി, അരിവ്, മൗനൻ യാത്രിഗൻ എന്നിവരുടേതാണ് വരികൾ. നീലം പ്രൊഡക്ഷൻസും സ്റ്റുഡിയോ ഗ്രീനിന്റെ ബാനറിൽ കെ.ഇ. ജ്ഞാനവേൽ രാജയും ചേർന്നാണ് ചിത്രം നിർമിക്കുന്നത്. 2024 ജനുവരി 26-ന് തമിഴ്, മലയാളം, തെലുങ്ക്, കന്നഡ, ഹിന്ദി ഭാഷകളിലായി തങ്കലാൻ തിയേറ്ററുകളിലെത്തും.
