ഫഹദ് ഫാസിൽ, അമിതാഭ് ബച്ചൻ, റാണ; തലൈവർ 170-യിലെ താരനിര പുറത്ത്

രജനികാന്ത്-ജ്ഞാനവേൽ ചിത്രത്തിന്റെ താരനിരയേക്കുറിച്ചുള്ള തുടരെത്തുടരെയുള്ള അപ്ഡേറ്റുകളാണ് രണ്ടുദിവസമായി വന്നുകൊണ്ടിരിക്കുന്നത്. മൂന്നുപേരുടെ വിവരങ്ങളാണ് ചൊവ്വാഴ്ച പുറത്തുവന്നത്. ലൈക്ക പ്രൊഡക്ഷൻസ് പുറത്തുവിട്ടിരിക്കുന്ന വിവരങ്ങൾ പ്രകാരം അമിതാഭ് ബച്ചൻ, ഫഹദ് ഫാസിൽ, റാണ ദ​ഗ്ഗുബട്ടി എന്നിവർ ചിത്രത്തിൽ പ്രധാനവേഷങ്ങളിലുണ്ടാവും.

32 വർഷങ്ങൾക്കു ശേഷമാണ് അമിതാഭ് ബച്ചനും രജനികാന്തും ഒരുമിച്ചഭിനയിക്കുന്നത്. 1991-ൽ ഹം എന്ന ചിത്രത്തിലാണ് ഇരുവരും അവസാനമായി ഒരുമിച്ചഭിനയിച്ചത്. തെലുങ്കിൽ പ്രഭാസ് നായകനാവുന്ന പ്രോജക്റ്റ് കെയിലും അമിതാഭ് ബച്ചൻ അഭിനയിക്കുന്നുണ്ട്. അതേസമയം ഫഹദ് ഫാസിലും റാണയും രജനികാന്തിനൊപ്പം ആദ്യമായാണ് അഭിനയിക്കുന്നത്.

മഞ്ജു വാര്യർ, ദുഷാരാ വിജയൻ, റിതിക സിം​ഗ് എന്നിവരാണ് ചിത്രത്തിലെ നായികമാർ. ഇവരുടെ പോസ്റ്ററുകൾ ലൈക്ക പ്രൊഡക്ഷൻസ് കഴിഞ്ഞദിവസം പുറത്തുവിട്ടിരുന്നു.

അതേസമയം ഈ ചിത്രത്തിന്റെ ചിത്രീകരണവുമായി ബന്ധപ്പെട്ട് രജനികാന്ത് തിരുവനന്തപുരത്തെത്തി. നല്ല സന്ദേശം ഉൾക്കൊള്ളുന്ന ബി​ഗ് ബജറ്റ് ചിത്രമായിരിക്കും ഇതെന്നാണ് ചെന്നൈയിൽ നിന്ന് പുറപ്പെടുംമുമ്പ് അദ്ദേഹം മാധ്യമങ്ങളോട് പ്രതികരിച്ചത്. അനിരുദ്ധ് ആണ് തലൈവർ 170-യുടെ സം​ഗീതസംവിധാനം.