ലോക അര്‍ബുദ ദിനത്തില്‍ അമ്മയുടെ കാന്‍സര്‍ വിവരം പങ്കുവെച്ച് നടന്‍ സുനില്‍ സൂര്യ. ആറ് മാസം മുന്‍പ് വരെ അല്പം ഷുഗറും പ്രഷറും മാത്രം ഉണ്ടായിരുന്ന എന്റെ അമ്മയ്ക്ക് പ്രതീക്ഷിക്കാതെയാണ് അര്‍ബുദം ബാധിച്ചെന്ന വിവരം അറിഞ്ഞത്. പക്ഷെ ഞാനും അമ്മയും ഡബിള്‍ സ്‌ട്രോങ്ങാണ്. ട്രീറ്റ്‌മെന്റ് നടക്കുന്നതിനാല്‍ അമ്മയുടെ പ്രായം വെച്ച് പ്രതിരോധ ശേഷി കുറയാന്‍ സാധ്യത വളരെ ഏറെയാണ്. അതിനാല്‍ സന്ദര്‍ശകരെ അനുവദിക്കരുത് എന്നാണ് ഡോക്ടര്‍മാര്‍ അറിയിച്ചിരിക്കുന്നത്. പ്രിയപ്പെട്ടവര്‍ സഹകരിക്കണമെന്ന് സുനില്‍ സൂര്യ ഫെയ്‌സ്ബുക്കില്‍ കുറിച്ചു. തിങ്കളാഴ്ച നിശ്ചയം, മുകള്‍പരപ്പ് തുടങ്ങിയ ചിത്രങ്ങളിലൂടേയും സീരിസുകളിലൂടേയും ശ്രദ്ധേയനായ നടനാണ് സുനില്‍ സൂര്യ.
ഫെയ്‌സ്ബുക്ക് കുറിപ്പ്
ഇന്ന് 2025 ഫെബ്രുവരി 4 ലോക കാന്‍സര്‍ ദിനമാണല്ലോ? പുതുവര്‍ഷ ദിനത്തില്‍ തന്നെ ക്യാമറയ്ക്ക് മുന്നില്‍ നില്‍ക്കാന്‍ സാധിച്ചപ്പോള്‍ ഈ വര്‍ഷം മുതല്‍ നല്ല കാര്യങ്ങള്‍ സംഭവിക്കും എന്ന് ഞാന്‍ കരുതിയെങ്കിലും തെറ്റിപ്പോയി . ആറ് മാസം മുന്‍പ് വരെ അല്പം ഷുഗറും, പ്രഷറും മാത്രം ഉണ്ടായിരുന്ന എന്റെ അമ്മയ്ക്ക് പ്രതീക്ഷിക്കാതെ അര്‍ബുതം ഉണ്ടെന്ന സത്യം മറ നീക്കി പുറത്തു വന്നു.’പക്ഷെ ഞാനും അമ്മയും സ്‌ട്രോങ്ങ് ആണ്, ഡബിള്‍ സ്‌ട്രോങ്ങ്. ഒപ്പം കുടുംബവും, ബന്ധുക്കളും,കൂട്ടുകാരും ഡോക്ടര്‍മ്മാരും എല്ലാവരും അമ്മയ്ക്കൊപ്പം ഉണ്ട്. മരുന്നിനൊപ്പം അമ്മയ്ക്ക് മാനസിക പിന്തുണ നല്‍കുക എന്നതാണ് പ്രധാനം എന്ന് ഈ വേളയില്‍ ഞാന്‍ മനസ്സിലാക്കുന്നു. യുണൈറ്റഡ് ബൈ യുണീക്ക്’ എന്നതാണ് ഈ വര്‍ഷത്തെ ക്യാന്‍സര്‍ തീം’പക്ഷെ അമ്മ പറയുന്നത് ‘അതിനേക്കാള്‍ നല്ലത് വേറെ ഒന്നുണ്ട്.
‘പോയാല്‍ ഒരു കോഴി, കിട്ടിയാല്‍ ഒരു മുട്ട’ നീ ഫേസ്ബുക്കില്‍ കുറിച്ചോ എന്നാണ്. അതാണ് രോഗം ഉണ്ടെന്ന് അറിഞ്ഞ ശേഷം അമ്മയുടെ ഒരു ലൈന്‍. എങ്കിലും അമ്മ അനുഭവിക്കുന്ന വേദന പറഞ്ഞറിയിക്കാന്‍ പറ്റാത്തതാണ്. ആര്‍ക്കും ഈ രോഗം വരരുതേ എന്ന് ആത്മാര്‍ത്ഥമായി പ്രാര്‍ത്ഥിക്കുന്നു.മരുന്നും, ഭക്ഷണവും, വെള്ളവും, എല്ലാം അമ്മയ്ക്ക് മുറയ്ക്ക് നല്‍കുന്നുവെങ്കിലും ട്രീറ്റ്‌മെന്റ് നടക്കുന്നതിനാല്‍ അമ്മയുടെ പ്രായം വെച്ച് പ്രതിരോധ ശേഷി കുറയാന്‍ സാധ്യത വളരെ ഏറെയാണ്. അതിനാല്‍ സന്ദര്‍ശകരെ അനുവദിക്കരുത് എന്നാണ് ഡോക്ടര്‍മ്മാര്‍ അറിയിച്ചിരിക്കുന്നത്. ആയതിനാല്‍ ഇതൊരു അറിയിപ്പായി കണ്ട് പ്രിയപ്പെട്ടവര്‍ സഹകരിക്കുമല്ലോ. ഒപ്പം നിങ്ങളുടെ പ്രാര്‍ത്ഥനകളും ഉണ്ടാവണം.
നന്ദി
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
