അങ്ങനെ അവർ കണ്ടുമുട്ടി; സുരക്ഷാ ഉദ്യോ​ഗസ്ഥൻ തള്ളിവീഴ്ത്തിയ ആരാധകനെ ചേർത്തുപിടിച്ച് നാ​ഗാർജുന

ധനുഷിനൊപ്പമുള്ള കുബേര എന്ന ചിത്രത്തിന്റെ ഷൂട്ടിങ്ങിനായാണ് നാ​ഗാർജുന മുംബൈയിലെത്തിയത്. ഇതിനിടയിലാണ് ധനുഷിന്റെയും നാ​ഗാർജുനയുടേയും സാന്നിധ്യത്തിൽ ഭിന്നശേഷിക്കാരനായ ആരാധകനെ സുരക്ഷാ ഉദ്യോ​ഗസ്ഥൻ തള്ളിവീഴ്ത്തിയത്. ബുധനാഴ്ച ഇതേ ആരാധകനെ ചേർത്തുപിടിക്കുകയും കുശലമന്വേഷിക്കുകയും ചെയ്തു നാ​ഗാർജുന. രണ്ടുദിവസം മുൻപ് സംഭവിച്ചത് തന്റെ ഭാ​ഗത്തുനിന്നുണ്ടായ തെറ്റല്ലെന്ന് അദ്ദേഹം ആരാധകനോടുപറഞ്ഞു.

നിരവധി പേരാണ് ഈ വിഷയത്തിൽ നാ​ഗാർജുനയ്ക്ക് കയ്യടികളുമായെത്തിയത്. സോഷ്യൽ മീഡിയയുടെ ശക്തിയാണിതെന്നാണ് ഒരാൾ അഭിപ്രായപ്പെട്ടത്. നാ​ഗാർജുന വളരെ എളിമയുള്ള വ്യക്തിയാണെന്ന് മറ്റൊരാൾ പറഞ്ഞു. അതേസമയം അദ്ദേഹത്തെ എതിർക്കുന്നവരും നിരവധിയാണ്. ആ സമയത്തായിരുന്നു നാ​ഗാർജുന ആരാധകനെ ചേർത്തുപിടിക്കേണ്ടിയിരുന്നതെന്നും ഇപ്പോഴത്തേത് വെറുതേ ആളെക്കാണിക്കാൻ വേണ്ടിയാണെന്നുമാണ് ഇവരുടെ പക്ഷം.

രണ്ടുദിവസം മുൻപ് നടന്ന സംഭവത്തിൽ നാ​ഗാർജുന അന്നുതന്നെ ഖേദം പ്രകടിപ്പിച്ചിരുന്നു. ഇതൊരിക്കലും നടക്കരുതായിരുന്നു. ആ മാന്യവ്യക്തിയോട് താൻ മാപ്പുചോദിക്കുന്നു. ഭാവിയിൽ ഇങ്ങനെ സംഭവിക്കാതിരിക്കാൻവേണ്ട മുൻകരുതലുകളെടുക്കും എന്നായിരുന്നു നാ​ഗാർജുന പറഞ്ഞത്. വിജയ് ബിന്നി സംവിധാനം ചെയ്ത നാ സാമി രം​ഗാ ആണ് നാ​ഗാർജുനയുടേതായി ഒടുവിൽ പുറത്തിറങ്ങിയ ചിത്രം.