ആരോഗ്യ – ടേം ഇൻഷുറൻസ് പോളിസി പ്രീമിയത്തിൽ ഇനി ജിഎസ്ടി ഇല്ല, ഇപ്പോൾ വാങ്ങണോ അതോ കാത്തിരിക്കണോ, നിങ്ങള്‍ക്ക് നേട്ടമാക്കാം, ഇങ്ങനെ

ഇനി ആരോഗ്യ ഇൻഷുറൻസും ടേം ഇൻഷുറൻസും എടുത്താൽ അതിന്റെ പ്രീമിയത്തിന്മേൽ ജിഎസ്ടി ഉണ്ടാകില്ല. ഇതിലൂടെ 18% വരെ ലാഭം നേടാൻ സാധിക്കുമെന്നത് വലിയ സാമ്പത്തിക സഹായമാണ്.

എന്നാൽ ഇത് പൂർണമായും യഥാർത്ഥ്യമാകുമോ? ഈ നേട്ടം ചില കാര്യങ്ങളെ ആശ്രയിച്ചിരിക്കുന്നു – പോളിസി എടുത്ത തീയതി, കവറേജ് ആരംഭിക്കുന്ന സമയം, നിങ്ങൾ പുതിയ പോളിസി വാങ്ങുകയാണോ, നിലവിലെ പോളിസി പുതുക്കുകയാണോ, മൾട്ടി-വർഷ പ്ലാനിലാണോ തുടങ്ങിയവയൊക്കെ കണക്കിലെടുക്കേണ്ട ഘടകങ്ങളാണ്.

നിങ്ങളുടെ റിസ്‌ക് കവറേജ് 22 സെപ്റ്റംബറിന് മുൻപ് ആരംഭിച്ചാൽ, പേപ്പർവർക്കുകൾ പിന്നെയായാലും ജിഎസ്ടി ബാധകമാകും. ഇപ്പോൾ ഇൻഷുറൻസ് കമ്പനികൾ ഇൻപുട്ട് ടാക്സ് ക്രെഡിറ്റ് (Input Tax Credit) നഷ്ടം സ്വന്തം ചെലവിൽ വഹിക്കുന്നുണ്ട്. 
പുതിയ പോളിസി വാങ്ങുന്നവർക്ക് എന്ത് സംഭവിക്കും?
പുതിയ പോളിസി വാങ്ങുമ്പോൾ, ചില ഇൻഷുറൻസ് കമ്പനികൾ സെപ്റ്റംബർ 22ന് മുൻപ് പണം അടയ്ക്കാൻ അനുവദിക്കും, എന്നാൽ പോളിസി ഇഷ്യൂ ചെയ്യുന്നതും റിസ്‌ക് ആരംഭിക്കുന്നതും അതിന് ശേഷമാവും.

ഇങ്ങനെ ചെയ്താൽ ജിഎസ്ടി ഒഴിവാക്കൽ ആനുകൂല്യം ലഭിക്കും. എന്നാൽ, ഇതിൽ ഒരു റിസ്ക് ഉണ്ട് – കാത്തിരിക്കുന്ന ഇടവേളയിൽ നിങ്ങൾക്ക് കവറേജ് ഉണ്ടാകില്ല.

അതായത്, പണം ലാഭിക്കാനാകുമ്പോഴും ഇടക്കാലത്ത് അപകട സാധ്യത നേരിടേണ്ടിവരും.
റിന്യൂവലുകൾ എങ്ങനെ ആയിരിക്കും?
ആരോഗ്യ ഇൻഷുറൻസിൽ, ചിലപ്പോൾ പോളിസിയുടമകളെ 22ന് ശേഷം പണം അടയ്ക്കാൻ അനുവദിച്ചാൽ അങ്ങനെ ജിഎസ്ടി ഒഴിവാക്കൽ ആനുകൂല്യം ലഭിക്കും.

എന്നാൽ, ആ സമയത്ത് നിങ്ങൾ ഇൻഷുറൻസ് കവറേജ് ഉണ്ടാകുകയില്ല.
ടേം ഇൻഷുറൻസിൽ കാര്യങ്ങൾ കുറച്ച് കർശനമാണ് – റിസ്‌ക് തുടങ്ങുന്ന തീയതി റിന്യൂവൽ തീയതിയോട് ബന്ധിപ്പിച്ചിരിക്കുന്നു. അതിനാൽ, ആ തീയതി സെപ്റ്റംബർ 22ന് മുൻപാണെങ്കിൽ, നിങ്ങൾ ഗ്രേസ് പീരിയഡിൽ പണം അടച്ചാലും ജിഎസ്ടി ബാധകമാണ്.

എന്നാൽ, റിന്യൂവൽ തീയതി 22ന് ശേഷമാണെങ്കിൽ നിങ്ങൾ ഇതിനകം പണം അടച്ചെങ്കിൽ ഇൻഷുറൻസ് കമ്പനികൾ ജിഎസ്ടി തിരികെ നൽകുമെന്നാണ് കരുതുന്നത്.
ഫ്രീ-ലുക്ക് പീരിയഡും മൾട്ടി-വർഷ പ്ലാനുകളും
നിങ്ങൾ ഇപ്പോഴും ഫ്രീ-ലുക്ക് പീരിയഡിൽ (പോളിസി വാങ്ങിയതിന് ശേഷം ആവശ്യമില്ലെന്ന് തോന്നിയാൽ റദ്ദാക്കാനാകുന്ന കാലയളവ്) ആണെങ്കിൽ, പോളിസി റദ്ദാക്കി 22ന് ശേഷം വീണ്ടും വാങ്ങാം. അങ്ങനെ ചെയ്താൽ ജിഎസ്ടി ഒഴിവാക്കാനാകും, പക്ഷേ അനുബന്ധ ചാർജുകളും ഇടക്കാല കവറേജും നഷ്ടമാകും.

ഫ്രീ-ലുക്ക് കഴിഞ്ഞാൽ ഇത് ഗുണകരമാകില്ല.
മൾട്ടി-വർഷ പ്ലാനുകൾ (ഒറ്റത്തവണ പലവർഷത്തേക്കുള്ള പ്രീമിയം അടച്ചവ) എടുത്തവർക്ക് മാറ്റമൊന്നും ഉണ്ടായിരിക്കില്ല. ഒഴിവാക്കൽ സെപ്റ്റംബർ 22ന് ശേഷമുള്ള ഇടപാടുകൾക്കാണ് ബാധകമായത്.
മുതിർന്നവർക്കും വലിയ കവറേജിനും കൂടുതൽ പ്രാധാന്യം
സീനിയർ സിറ്റിസൺ ഹെൽത്ത് ഇൻഷുറൻസ് എടുക്കുന്ന മുതിർന്നവർക്കും, 1 കോടി രൂപയുടെ ഹെൽത്ത് കവറേജ് എടുക്കുന്ന കുടുംബങ്ങൾക്കും ഇത് വലിയ ഗുണമാണ്.

കാരണം പ്രീമിയം തുക കൂടുതലായതിനാൽ, 18% ലാഭം വലിയ സാമ്പത്തിക സഹായമാകും.
ചുരുക്കത്തിൽ
ആരോഗ്യ–ടേം ഇൻഷുറൻസ് പോളിസികളുടെ ജിഎസ്ടി ഒഴിവാക്കിയത് ഉപഭോക്താക്കൾക്ക് വലിയ ഗുണമാണ്. എന്നാൽ, 18% എന്ന മുഴുവൻ ലാഭവും നേടാൻ പോളിസി ആരംഭിക്കുന്നത്, റിസ്‌ക് ആരംഭിക്കുന്നത്, റിന്യൂവൽ സമയം എപ്പോഴാണെന്നത് ഇവയെല്ലാം പൊരുത്തപ്പെടണം.

ഇപ്പോൾ തന്നെ റിന്യൂ ചെയ്യണോ, കാത്തിരിക്കണോ, പോളിസി പുനഃസംഘടിപ്പിക്കണോ എന്ന് ആശയക്കുഴപ്പം ഉണ്ടെങ്കിൽ ഒരു വിദഗ്ധന്റെ ഉപദേശം വാങ്ങുന്നത് നല്ലതാണ്. അങ്ങനെ ചെയ്താൽ സാമ്പത്തിക പദ്ധതികളിൽ ആത്മവിശ്വാസവും ഉറപ്പും നേടാനും, ഈ അവസരം പരമാവധി പ്രയോജനപ്പെടുത്താനും കഴിയും.

… FacebookTwitterWhatsAppTelegram