ശമ്പളം, പെൻഷൻ, വിവിധ ക്ഷേമ, വികസനപദ്ധതികൾ എന്നിവയ്ക്ക് പണം ഉറപ്പാക്കാനായി കേരളം നാളെ 2,000 കോടി രൂപ കടമെടുക്കുന്നു. 26 വർഷത്തെ തിരിച്ചടവ് കാലാവധിയിലാണ് കേരളത്തിന്റെ കടമെടുപ്പെന്ന് റിസർവ് ബാങ്ക് (RBI) വ്യക്തമാക്കി.
റിസർവ് ബാങ്കിന്റെ ഇ-കുബേർ (E-kuber) പ്ലാറ്റ്ഫോം വഴി കടപ്പത്രങ്ങളിറക്കിയാണ് കടമെടുക്കുന്നത്. കേരളത്തിന് നടപ്പുവർഷം ഏപ്രിൽ മുതൽ ഡിസംബർ വരെ ആകെ 29,529 കോടി രൂപ കടമെടുക്കാൻ അർഹതയുണ്ടെന്ന് ധനമന്ത്രാലയം കഴിഞ്ഞദിവസം വ്യക്തമാക്കിയിരുന്നു. കഴി‍ഞ്ഞ സാമ്പത്തിക വർഷത്തെ (2024-25) ഏപ്രിൽ-ഡിസംബർ കാലയളവിൽ കടമെടുക്കാൻ അനുവദിച്ചത് 21,253 കോടി രൂപയായിരുന്നു.
അതിനേക്കാൾ 8,276 കോടി രൂപ അധികമാണ് ഇക്കുറി അനുവദിച്ചത്. എന്നാലും, കേരളത്തിന് അർഹമായ കടമെടുപ്പ് പരിധിയിൽ നിന്ന് കേന്ദ്രം 3,300 കോടി രൂപ വെട്ടിക്കുറച്ചിട്ടുണ്ട്.
ഓരോ സംസ്ഥാനത്തിനും അതത് സംസ്ഥാനങ്ങളുടെ മൊത്ത ആഭ്യന്തര ഉൽപാദനത്തിന്റെ (GSDP) 3% വരെ ഒരു സാമ്പത്തിക വർഷം കടമെടുക്കാം എന്നാണ് കേന്ദ്ര ചട്ടം. ഇതു പ്രകാരം കേരളത്തിന് ഈ വർഷം 39,800 കോടിയോളം രൂപ കടമെടുക്കാം.
എന്നാൽ കിഫ്ബി, പെൻഷൻ കമ്പനി എന്നിവ എടുത്ത കടം സർക്കാരിന്റെ കടമായി പരിഗണിച്ച് കേന്ദ്രം കടമെടുപ്പ് പരിധി വെട്ടിക്കുറയ്ക്കുകയാണ്. അതേസമയം, സംസ്ഥാനം കടക്കെണിയിലാണെന്ന ആരോപണങ്ങൾ അടുത്തിടെ ധനമന്ത്രി കെ.എൻ.
ബാലഗോപാൽ നിഷേധിച്ചിരുന്നു. ഓരോ 5 വർഷം കൂടുമ്പോഴും കടം ഇരട്ടിയാകുന്നതായിരുന്നു കേരളത്തിലെ ട്രെൻഡ്.
ഈ സർക്കാർ വരുമ്പോൾ കേരളത്തിന്റെ ആകെ കടം 3 ലക്ഷം കോടി രൂപയായിരുന്നു. അതായത്, പതിവു ട്രെൻഡ് അനുസരിച്ച് 2025-26 ആകുമ്പോഴേക്കും ആകെ കടം 6 ലക്ഷം കോടി രൂപയാകണം.
എന്നാൽ, 4.65 ലക്ഷം കോടിയ്ക്കപ്പുറം കടം പോകില്ലെന്ന് ഉറപ്പാണെന്ന് ധനമന്ത്രി പറഞ്ഞു. കേരളത്തിന് അർഹതപ്പെട്ട
വായ്പ എടുക്കാൻ കേന്ദ്രം അനുവദിക്കുന്നില്ലെന്ന വിമർശനവും അദ്ദേഹം വീണ്ടും ഉന്നയിച്ചിരുന്നു. അതേസമയം, നാളെ കേരളത്തിന് പുറമെ 9 സംസ്ഥാനങ്ങൾ കൂടി കടമെടുക്കുന്നുണ്ട്.
സംയോജിതമായി എടുക്കുന്നത് 15,800 കോടി രൂപ. അസം 500 കോടി, ഗോവ 150 കോടി, ഗുജറാത്ത് 1,500 കോടി, ഹരിയാന 3,000 കോടി, ജമ്മു കശ്മീർ 400 കോടി, മണിപ്പുർ 250 കോടി, പഞ്ചാബ് 1,000 കോടി, രാജസ്ഥാൻ 5,000 കോടി, തമിഴ്നാട് 2,000 കോടി എന്നിങ്ങനെയാണ് കടമെടുക്കുന്നത്.
ബിസിനസ്, ഇക്കണോമി, സ്റ്റോക്ക് മാർക്കറ്റ്, പഴ്സനൽ ഫിനാൻസ്, കമ്മോഡിറ്റി, സമ്പാദ്യം വാർത്തകൾക്ക്: manoramaonline.com/business
…
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
