കനേഡിയൻ ധനകാര്യസ്ഥാപനമായ ബ്രൂക്ക്ഫീൽഡ് അസറ്റ് മാനേജ്മെന്റിന് കീഴിലെ ഷ്ളോസ് ബാംഗ്ലൂരിന്റെ (Schloss Bangalore) ഉടമസ്ഥതയിലുള്ള ആഡംബര ഹോട്ടൽ ബ്രാൻഡായ ലീല ഹോട്ടൽസ് (Leela Hotels) ഓഹരി വിപണിയിലേക്ക്. ഇതിനു മുന്നോടിയായുള്ള പ്രാരംഭ ഓഹരി വിൽപന (IPO) മേയ് 26 മുതൽ 28 വരെ നടക്കും. ഓഹരിക്ക് 413 രൂപ മുതൽ 435 രൂപവരെയാണ് ഇഷ്യൂവില അഥവാ പ്രൈസ് ബാൻഡ്. താൽപര്യമുള്ളവർക്ക് മിനിമം 34 ഓഹരികൾക്കും തുടർന്ന് അതിന്റെ ഗുണിതങ്ങൾക്കും അപേക്ഷിക്കാം. അതായത്, മിനിമം ഇഷ്യൂവിലയായ 413 രൂപ കണക്കാക്കിയാൽ കുറഞ്ഞത് 14,042 രൂപയുടെ അപേക്ഷയാണ് സമർപ്പിക്കാനാവുക.
ലക്ഷ്യം 3,500 കോടി രൂപ
നേരത്തേ 5,000 കോടി രൂപയുടെ ഐപിഒയാണ് ലീല ഹോട്ടൽസ് സംഘടിപ്പിക്കുകയെന്ന് കരുതിയതെങ്കിലും ഇപ്പോൾ ലക്ഷ്യം 3,500 കോടി രൂപയായി കുറച്ചിട്ടുണ്ട്. ഇതിൽ 2,500 കോടി രൂപയുടേത് പുതിയ ഓഹരികളും (Fresh Issue) 1,000 കോടി രൂപയുടേത് ഓഫർ ഫോർ സെയിലുമാണ് (OFS).
നിലവിലെ ഓഹരി ഉടമകൾ കൈവശമുള്ള ഓഹരികളിൽ നിശ്ചിതവിഹിതം വിറ്റഴിക്കുന്നതാണ് ഓഫർ ഫോർ സെയിൽ. ഐപിഒയിൽ 75% ഓഹരികളും നീക്കിവച്ചിരിക്കുന്നത് യോഗ്യരായ നിക്ഷേപ സ്ഥാപനങ്ങൾക്കായാണ് (qualified institutional buyers /QIB). 15 ശതമാനം ഓഹരികൾ സ്ഥാപനേതര നിക്ഷേപകർക്കും ( non-institutional investors /NII) ബാക്കി 10 ശതമാനം ചെറുകിട നിക്ഷേപകർക്കുമാണ് (retail investors). 2024 മേയിലെ കണക്കുപ്രകാരം മാത്രം ലീല പാലസസ്, ഹോട്ടൽസ്, റിസോർ‌ട്സ് എന്നിവകളിലായി 3,382 മുറികളോടെ ഇന്ത്യയിലെ ഏറ്റവും വലിയ ആഡംബര ഹോട്ടൽ ശൃംഖലകളിലൊന്നാണ് ലീല ഹോട്ടൽസ്.
ലിസ്റ്റിങ് ജൂൺ 2ന്
ഐപിഒയിൽ അപേക്ഷിച്ചവരിൽ അർഹരായവർക്ക് മേയ് 29ന് ഓഹരികൾ അവരുടെ ഡിമാറ്റ് അക്കൗണ്ടിൽ ലഭ്യമാക്കിയേക്കും (allotment). ജൂൺ രണ്ടിന് ഓഹരികൾ ബിഎസ്ഇയിലും എൻഎസ്ഇയിലും ലിസ്റ്റും ചെയ്യും. ഐപിഒയിലൂടെ സമാഹരിക്കുന്ന തുകയിൽ 2,300 കോടി രൂപ കമ്പനി കടങ്ങൾ വീട്ടാനും ബാക്കിത്തുക മൂലധനച്ചെലവിനായുമാകും ഉപയോഗിക്കുക.
ഉത്തർപ്രദേശ്, ജമ്മു കശ്മീർ, രാജസ്ഥാൻ, തെലങ്കാന, മധ്യപ്രദേശ്, മഹാരാഷ്ട്ര എന്നിവിടങ്ങളിലായി 8 പുതിയ ഹോട്ടലുകൾ തുറക്കാനും കമ്പനിക്ക് ലക്ഷ്യമുണ്ട്. 2023-24ലെ കണക്കുപ്രകാരം 1,226 കോടി രൂപയുടെ വരുമാനമുള്ള കമ്പനിയാണ് ലീല ഹോട്ടൽസ്. 2021-22ൽ വരുമാനം 415 കോടി രൂപ മാത്രമായിരുന്നു. നഷ്ടം 319 കോടി രൂപയിൽ നിന്ന് 2.1 കോടി രൂപയായി കുറയ്ക്കാനും സാധിച്ചു. 2025 മാർച്ച് 31ന് അവസാനിച്ച വർഷം വരുമാനം 1,406 കോടി രൂപ. 48 കോടി രൂപയുടെ ലാഭത്തിലേക്കും കമ്പനി ഉയർന്നു.
ക്യാപ്റ്റൻ കൃഷ്ണൻ നായരുടെ ലീല
മലയാളിയായ ക്യാപ്റ്റൻ കൃഷ്ണൻ നായർ 1986ൽ സ്ഥാപിച്ച ഹോട്ടൽ ശൃംഖലയാണ് ലീല. ഹോട്ടൽ ലീല വെഞ്ച്വഴ്സ് ലിമിറ്റഡിൽ നിന്ന് 2019 ഒക്ടോബറിലാണ് 3,950 കോടി രൂപയ്ക്ക് ബ്രൂക്ക്ഫീൽഡ് ലീല ഹോട്ടൽസിനെ ഏറ്റെടുത്തത്. ലീലയുടെ ന്യൂഡൽഹി, ബെംഗളൂരു, ചെന്നൈ, ഉദയ്പുർ ഹോട്ടലുകളും ആഗ്രയിലെ ഭൂമിയുമാണ് ഇടപാട് പ്രകാരം ബ്രൂക്ക്ഫീൽഡ് വാങ്ങിയത്.
ഏറ്റെടുക്കലിന് ശേഷം ബ്രൂക്ക്ഫീൽഡ് വലിയ വിപുലീകരണങ്ങൾ നടത്തി. ഹോട്ടൽ മുറികളുടെ എണ്ണം 2,495ൽ നിന്ന് 3,382ലേക്ക് വർധിപ്പിച്ചു. ഓഹരി ലിസ്റ്റ് ചെയ്യുംമുമ്പ് അനൗദ്യോഗികമായി വ്യാപാരം നടക്കുന്ന ഗ്രേ മാർക്കറ്റിൽ 18 രൂപയുടെ അധികവിലയിലാണ് (ഗ്രേ മാർക്കറ്റ് പ്രീമിയം/GMP) ലീല ഹോട്ടൽസിന്റെ ഓഹരികളുള്ളത്. ഗ്രേ മാർക്കറ്റിൽ മികച്ച ട്രെൻ‌ഡ് നിലനിർത്താനായാൽ ഐപിഒ വിലയേക്കാളും ഉയർന്ന നേട്ടത്തിൽ ലിസ്റ്റ് ചെയ്യാൻ ലീല ഓഹരികൾക്ക് കഴിയും.
ബിസിനസ്, ഇക്കണോമി, സ്റ്റോക്ക് മാർക്കറ്റ്, പഴ്സനൽ ഫിനാൻസ്, കമ്മോഡിറ്റി, സമ്പാദ്യം വാർത്തകൾക്ക്:
(Disclaimer: ഈ ലേഖനം ഓഹരി/കടപ്പത്രം/മ്യൂച്വൽഫണ്ട്/ക്രിപ്റ്റോകറൻസി മുതലായവ വാങ്ങാനോ വില്‍ക്കാനോ ഉള്ള നിര്‍ദേശമോ ഉപദേശമോ അല്ല. ഓഹരി/കടപ്പത്രം/മ്യൂച്വൽഫണ്ട് മുതലായ നിക്ഷേപങ്ങൾ വിപണിയിലെ റിസ്കുകൾക്ക് വിധേയമാണ്. നിക്ഷേപം നടത്തുന്നതിന് മുമ്പ് നിങ്ങള്‍ സ്വയം പഠനങ്ങൾ നടത്തുകയോ ഒരു വിദഗ്ധന്‍റെ ഉപദേശം തേടുകയോ ചെയ്യുക)
