വെളിച്ചെണ്ണ: സബ്സിഡി നിരക്കിൽ‌ ഓണക്കാല വിൽപനയുമായി സപ്ലൈകോ; വില ഇങ്ങനെ

തിരുവനന്തപുരം ∙ ഓണക്കാലത്ത് സബ്സിഡി വെളിച്ചെണ്ണ ലീറ്ററിന് 349 രൂപയ്ക്കും അര ലീറ്റർ 179 രൂപയ്ക്കും സപ്ലൈകോ വിൽപനശാലകൾ വഴി ലഭിക്കും. പൊതുവിപണിയിൽ വിലക്കയറ്റമുള്ളതിനാൽ സപ്ലൈകോയിൽ അര ലീറ്റർ സബ്സിഡി വെളിച്ചെണ്ണയുടെ വില 75 രൂപയിൽനിന്നു 140 രൂപയായി കഴിഞ്ഞ ദിവസം വർധിപ്പിച്ചിരുന്നു.

മന്ത്രി ജി.ആർ.അനിൽ ജിഎസ്ടിയും പാക്കിങ് ചാർജും ഉൾപ്പെടെ പുതുക്കിയ വില പ്രഖ്യാപിരുന്നു.
സബ്സിഡിയില്ലാത്ത വെളിച്ചെണ്ണ ലീറ്ററിന് 429 രൂപയ്ക്കും അര ലീറ്റർ 219 രൂപയ്ക്കും ലഭിക്കും. വിതരണക്കാരുമായി വില സംബന്ധിച്ച് ധാരണയിലെത്തിയതായും ഒരാഴ്ചയ്ക്കു ശേഷം സ്റ്റോക്ക് എത്തുമെന്നും മന്ത്രി പറഞ്ഞു.

വിവിധ ബ്രാൻഡുകളുടെ വെളിച്ചെണ്ണ വിപണിയെക്കാൾ കുറഞ്ഞ വിലയ്ക്ക് നൽകുമെന്നും സൺഫ്ലവർ ഓയിൽ, പാം ഓയിൽ, റൈസ് ബ്രാൻ ഓയിൽ തുടങ്ങിയവയും ലഭിക്കുമെന്നും മന്ത്രി പറഞ്ഞു.
നിലവിൽ റേഷൻകാർഡ് ഒന്നിന് 8 കിലോഗ്രാം അരി സബ്സിഡി നിരക്കിൽ നൽകുന്നതിനു പുറമേ ഓണക്കാലത്ത് 20 കിലോഗ്രാം പച്ചരിയോ പുഴുക്കലരിയോ 25 രൂപ നിരക്കിൽ നൽകും വൻപയറിന്റെ സബ്സിഡി വില 75 രൂപയിൽനിന്നു 70 രൂപയായും തുവര പരിപ്പിന് 105 രൂപ 93 രൂപയായും കുറച്ചു. സബ്സിഡി നിരക്കിൽ നൽകുന്ന മുളക് അര കിലോഗ്രാം എന്നത് ഒരു കിലോഗ്രാമാക്കി.

കിലോയ്ക്ക് 115.5 രൂപയും അര കിലോയ്ക്ക് 57.50 രൂപയുമാണു വില.
ബിസിനസ്, ഇക്കണോമി, സ്റ്റോക്ക് മാർക്കറ്റ്, പഴ്സനൽ ഫിനാൻസ്, കമ്മോഡിറ്റി, സമ്പാദ്യം വാർത്തകൾക്ക്:
…