ലിസ്ബൺ
ഇറ്റലിയുടെ വഴിമുടക്കിയ നോർത്ത് മാസിഡോണിയൻ സംഘം ഇന്ന് ക്രിസ്റ്റ്യാനോ റൊണാൾഡോയ്ക്ക് മുന്നിൽ. യൂറോപ്പിലെ ലോകകപ്പ് പ്ലേ ഓഫ് ഫെെനലിൽ റൊണാൾഡോയുടെ പോർച്ചുഗലിനെ നേരിടുകയാണ് മാസിഡോണിയ. സെമിയിൽ തുർക്കിയെ 3–1ന് തകർത്തുവന്ന പോർച്ചുഗലിന് ഒരു ജയം കിട്ടിയാൽ ഖത്തറിലേക്ക് പറക്കാം. ഇറ്റലിയോടുള്ള വീറുറ്റ പോരാട്ടം മാസിഡോണിയ ആവർത്തിച്ചാൽ പോർച്ചുഗലിന് കടുക്കും.
മുപ്പത്തേഴുകാരനായ റൊണാൾഡോയ്ക്ക് ലോകകപ്പിലെ അവസാന അവസരമാണ്. ഏത് ടീമിനെയും കീഴടക്കാമെന്ന ആത്മവിശ്വാസത്തിലാണ് പോർച്ചുഗൽ ക്യാപ്റ്റൻ. പോർച്ചുഗലിന്റെ ലോകോത്തര നിരയ്ക്ക് മുന്നിൽ മാസിഡോണിയ ഒന്നുമല്ല. പക്ഷേ, ഇറ്റലിയെ തോൽപ്പിച്ച മാസിഡോണിയൻ സംഘത്തിന് സമ്മർദഭാരം തീരെയില്ല.
തുർക്കിക്കെതിരെ ടീമിൽ ഇല്ലാതിരുന്ന പെപെ, ജോയോ കാൻസെലോ എന്നിവർ തിരിച്ചെത്തുന്നത് പോർച്ചുഗലിന്റെ കരുത്ത് കൂട്ടും.
ലോകകപ്പ് യോഗ്യതാ റൗണ്ടിൽ ജർമനിയെയും തോൽപ്പിച്ച സംഘമാണ് മാസിഡോണിയയുടേത്.
സെമിയിൽ ചെക്ക് റിപ്പബ്ലിക്കിനെ ഒരു ഗോളിന് തോൽപ്പിച്ച സ്വീഡൻ മുന്നേറാനുള്ള ഒരുക്കത്തിലാണ്. പോളണ്ടാണ് എതിരാളികൾ. ആദ്യപാദത്തിൽ ഓസ്ട്രിയയെ തോൽപ്പിച്ച വെയ്ൽസിന് എതിരാളികൾക്കായി കാത്തിരിക്കണം. സ്കോട്-ലൻഡ്–ഉക്രയ്ൻ പ്ലേ ഓഫ് സെമി മാറ്റിവച്ചിരിക്കുകയാണ്. ഇതിലെ ജേതാക്കളെയാണ് വെയ്ൽസ് നേരിടുക.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
