'മനസിൽ അഹങ്കാരത്തിന്റെ ചെറുകണികയെങ്കിലും ഉണ്ടെങ്കിൽ ​ഗം​ഗേട്ടനെ കണ്ടാൽ മതി മാഞ്ഞുപോവാൻ'

ഒരു നിർമാതാവ് എന്ന നിലയ്ക്ക് തന്നെ ഏറ്റവുമധികം വിശ്വസിച്ചിരുന്ന, വിശ്വസിച്ചിട്ടുള്ളയാളായിരുന്നു പി.വി. ​ഗം​ഗാധരനെന്ന് സത്യൻ അന്തിക്കാട് അനുസ്മരിച്ചു. ഒരാശയം പറഞ്ഞാൽ സിനിമ മാത്രമേ അദ്ദേഹം പിന്നെ മനസിൽ കാണൂ. അതുകൊണ്ടാണ് വീണ്ടും ചില വീട്ടുകാര്യങ്ങളും അച്ചുവിന്റെ അമ്മയും കൊച്ചു കൊച്ചു സന്തോഷങ്ങളും എന്നും നന്മകളുമെല്ലാം അദ്ദേഹത്തിനുവേണ്ടി ചെയ്യാൻ സാധിച്ചതെന്നും അദ്ദേഹം പറഞ്ഞു.

ഇത്രയും സിമ്പിളായ, ലാളിത്യം എന്താണെന്ന് നമ്മെ പഠിപ്പിക്കുന്ന ഒരു മനുഷ്യനാണ് അദ്ദേഹം. ഒരു മനുഷ്യന് എത്രത്തോളം വിനയാന്വിതനാവാം, എളിയവനാവാം എന്ന് നമ്മളെ പഠിപ്പിക്കുന്ന ഒരാളാണ് പി.വി. ​ഗം​ഗാധരൻ. മനസിൽ അഹങ്കാരത്തിന്റെ ചെറുകണികയെങ്കിലും ഉണ്ടെങ്കിൽ ​ഗം​ഗേട്ടനെ കണ്ടാൽ മതി മാഞ്ഞുപോവാൻ. ഇന്നുവരെ ഒരാളെക്കുറിച്ചുപോലും കുറ്റം പറയുകയോ പരദൂഷണം പറയുകയോ ചെയ്തിട്ടില്ല. നിറഞ്ഞ സ്നേഹനിലാവ് എന്ന് പറയാം ​ഗം​ഗേട്ടനെ. ​

ഗം​ഗേട്ടൻ പോവുന്നു എന്നുപറഞ്ഞാൽ, മലയാളസിനിമയിലെ നമ്മുടെ ആത്മാവിനോടു ചേർന്നുനിൽക്കുന്ന ഒരു വ്യക്തി നഷ്ടപ്പെടുകയാണ്. നമ്മുടെ തന്നെ ഒരു ഭാ​ഗമില്ലാതാവുകയാണ്. നമുക്കെന്തെങ്കിലും പ്രയാസമുണ്ടെങ്കിൽ വിളിച്ചുപറയാൻ, എന്തെങ്കിലും പുതിയ തമാശ തോന്നിയാൽ പങ്കുവെയ്ക്കാൻ, ഒരു നല്ല സിനിമ കണ്ടാൽ അതിനേക്കുറിച്ച് ചർച്ച ചെയ്യാൻ, വ്യക്തിപരമായ കാര്യങ്ങൾ പറയാനുള്ള ഒരാളാണ് ഇല്ലാതാവുന്നത്. അതൊരു വലിയ ശൂന്യതയാണ്. ആ ശൂന്യത അങ്ങനെതന്നെ അവശേഷിപ്പിച്ചിട്ടാണ് ​ഗം​ഗേട്ടൻ പോവുന്നത്. സത്യൻ അന്തിക്കാട് അനുസ്മരിച്ചു.