ഗാസ:ഗാസയിലേക്കുള്ള ജലവിതരണം നിർത്തി ഇസ്രായേൽ. ആക്രമണത്തെ തുടർന്ന് ജലവിതരണം നിർത്തിവക്കാൻ ഇസ്രായേൽഊർജ മന്ത്രി ഇസ്രായേൽ കാറ്റ്‌സ് ഉത്തരവിട്ടു.
ഹമാസ് ഭരിക്കുന്ന ഗാസ മുനമ്പിൽ “സമ്പൂർണ ഉപരോധം” നടത്താൻ ഇസ്രായേൽ പ്രതിരോധ മന്ത്രി യോവ് ഗാലന്റ് ഉത്തരവിട്ടതിന് തൊട്ടുപിന്നാലെയാണ് കാറ്റ്സിന്റെ ഉത്തരവ് വന്നത്.
“ഞാൻ ഒരു ഉത്തരവ് നൽകി – ഗാസ പൂർണമായും ഉപരോധിക്കും. വൈദ്യുതിയോ ഭക്ഷണമോ ഇന്ധനമോ ഗാസയിൽ ഉണ്ടാകില്ല. ഞങ്ങൾ പോരാടുകയാണ്, അതിനനുസരിച്ച് പ്രതികരിക്കും,” ഗാലന്റിനെ ഉദ്ധരിച്ച് മാധ്യമം റിപ്പോർട്ട് ചെയ്തു.
ഗാസ അതിന്റെ അടിസ്ഥാന സാധനങ്ങൾക്കായി പ്രധാനമായും ഇസ്രായേലിനെയാണ് ആശ്രയിക്കുന്നതെന്നും ജനസാന്ദ്രതയുള്ള പ്രദേശത്ത് താമസിക്കുന്ന 2.3 ദശലക്ഷം ആളുകൾക്ക് ഇത്തരമൊരു തീരുമാനം ദൂരവ്യാപകമായ പ്രത്യാഘാതങ്ങൾ ഉണ്ടാക്കുമെന്നും റിപ്പോർട്ടിൽ പറയുന്നു.
ഏതാണ്ട് 500 ഫലസ്തീനികൾ കൊല്ലപ്പെട്ടതായി കരുതപ്പെടുന്ന ഇസ്രായേൽ വ്യോമാക്രമണങ്ങൾക്കിടയിലാണ് ഗാസ മുനമ്പിലെ “സമ്പൂർണ ഉപരോധം”.
കഴിഞ്ഞ രണ്ട് ദിവസമായി ഗാസയിലെ തെരുവുകൾ പൂർണ്ണമായും വിജനമായി കാണപ്പെട്ടു.
ശനിയാഴ്ച ആരംഭിച്ച ആക്രമണത്തിൽ നൂറിലധികം ഇസ്രായേലികളും പ്രായമായവരും ചെറുപ്പക്കാരും കുട്ടികളും അടങ്ങുന്ന സംഘത്തെ ഹമാസും ഇസ്ലാമിക് ജിഹാദും ബന്ദികളാക്കിയിരുന്നു.
ശനിയാഴ്ച മുതൽ നീണ്ടുനിൽക്കുന്ന പോരാട്ടത്തെക്കുറിച്ച് ഇസ്രായേൽ പ്രതിരോധ മന്ത്രി ഗാലന്റ് കർശനമായ മുന്നറിയിപ്പ് നൽകി.
“ഇന്ന് നമ്മൾ തിന്മയുടെ മുഖം കണ്ടു.ഹമാസ് ഇസ്രായേൽ രാഷ്ട്രത്തിലെ പൗരന്മാർക്ക് നേരെ ക്രൂരമായ ആക്രമണം ആരംഭിച്ചു – പുരുഷന്മാരെയും സ്ത്രീകളെയും കുട്ടികളെയും പ്രായമായവരെയും വിവേചനരഹിതമായി ആക്രമിക്കുന്നു. ഹമാസിന് തെറ്റ് പറ്റിയെന്ന് വളരെ വേഗം മനസ്സിലാകും – ഗുരുതരമായ തെറ്റ്, അതിന് കനത്ത വില നൽകേണ്ടി വരും”, ക്രൂരമായ ആക്രമണത്തിന് ശേഷം ഗാലന്റ് പറഞ്ഞു
