ലോകനേതാക്കളുടെ ആഹ്വാനങ്ങൾ അവഗണിച്ച് യുദ്ധം കത്തുന്നു; ക്രൂഡോയിൽ വില കുതിച്ചുയരുന്നു, ഒപ്പം ഇന്ത്യൻ ഓഹരി വിപണിയിൽ ഐടി കുതിപ്പ്

ലോകനേതാക്കളുടെ ഇടപെടലുകളെയും സമാധാനാഹ്വാനങ്ങളെയും പൂർണമായി തഴഞ്ഞു കൊണ്ടുള്ള ഇറാൻ, ഹൂതി, യുക്രെയ്ൻ സംഘർഷങ്ങൾ ആഗോള വിപണിയിൽ കനത്ത ആഘാതമാണ് സൃഷ്ടിക്കുന്നത്. ക്രൂഡോയിൽ വിപണിയിൽ വലിയ രീതിയിലുള്ള വിലക്കയറ്റമാണ് ഇതിന്റെ ഫലമായി ഉണ്ടായിരിക്കുന്നത്.

അന്താരാഷ്ട്ര വിപണിയിൽ ബ്രെന്റ് ക്രൂഡോയിൽ വില വീണ്ടും ബാരലിന് 110 ഡോളർ കടന്നു. അമേരിക്കൻ ഡബ്ല്യുടിഐ ക്രൂഡോയിൽ നിരക്കാകട്ടെ ഒരാഴ്ചയ്ക്കിടെ ഏകദേശം 10 ശതമാനം വർധിച്ച് 101 ഡോളറിലെത്തിയിട്ടുണ്ട്.

ഹോർമുസ് കടലിടുക്കിൽ വാണിജ്യ കപ്പലുകൾക്ക് നേരെ ഇറാൻ സേനയുടെ ആക്രമണങ്ങൾ ഇപ്പോഴും തുടരുകയാണ്. ഇതിനു പുറമെ സൗദി അറേബ്യയിലെ വിവിധ തന്ത്രപ്രധാന കേന്ദ്രങ്ങൾ ലക്ഷ്യമിട്ട് ഹൂതികളും ആക്രമണങ്ങൾ ശക്തമാക്കിയിട്ടുണ്ട്.

അമേരിക്കൻ പ്രസിഡന്റ് ഡോണൾഡ് ട്രംപ് മുന്നോട്ടുവെച്ച ഊർജ വെടിനിർത്തൽ അഭ്യർത്ഥനകൾ പൂർണമായും തള്ളിക്കളഞ്ഞുകൊണ്ട് റഷ്യൻ എണ്ണശുദ്ധീകരണ ശാലകൾക്ക് നേരെ യുക്രെയ്നും വ്യോമാക്രമണങ്ങൾ തുടരുകയാണ്. എണ്ണവില യാതൊരു നിയന്ത്രണവുമില്ലാതെ കുതിച്ചുയരുന്നതിന്റെ പ്രധാന കാരണവും ഈ സൈനിക നടപടികളാണ്.

യാൻബുവിലെ പ്രധാന ഓയിൽ ടെർമിനൽ ലക്ഷ്യമാക്കി എത്തിയവ ഉൾപ്പെടെ നിരവധി ഹൂതി മിസൈലുകളെയും ഡ്രോണുകളെയും വിജയകരമായി പ്രതിരോധിച്ചതായി സൗദി അറേബ്യ വ്യക്തമാക്കിയിട്ടുണ്ട്. ഈ സംഭവവികാസങ്ങൾ സൗദിയിൽ നിന്നുള്ള എണ്ണ വിതരണത്തെ പ്രതികൂലമായി ബാധിക്കുമോ എന്ന ആശങ്ക നിക്ഷേപകർക്കിടയിൽ ശക്തമാണ്.

ഇതിനിടയിലാണ് ഹോർമുസിലൂടെയുള്ള ചരക്കുനീക്കത്തിന് ഭീഷണിയായി ഇറാൻ ആക്രമണങ്ങൾ തുടരുന്നത്. കഴിഞ്ഞ ഒരു ആഴ്ചയ്ക്കിടെ മാത്രം ഒമ്പത് എണ്ണ ടാങ്കറുകൾക്ക് നേരെയാണ് ആക്രമണം നടന്നത്.

യുദ്ധത്തിന് മുൻപുള്ള സാധാരണ നിലയിലേക്ക് എണ്ണക്കടത്ത് തിരികെ എത്തിക്കൊണ്ടിരിക്കുന്ന ഘട്ടത്തിലാണ് ഇറാന്റെ ഭാഗത്തുനിന്നും പുതിയ നീക്കങ്ങൾ ഉണ്ടായിരിക്കുന്നത്. അമേരിക്കയിൽ ഇടക്കാല തിരഞ്ഞെടുപ്പ് അടുത്തുവരുന്ന പശ്ചാത്തലത്തിൽ, രാജ്യാന്തര വിപണിയിൽ കൃത്രിമമായി എണ്ണവില ഉയർത്താനുള്ള ഇറാന്റെ തന്ത്രപരമായ നീക്കമാണിതെന്ന് വിദഗ്ധർ വിലയിരുത്തുന്നു.

എന്നാൽ, സൗദി അറേബ്യയ്ക്ക് നേരെ ഹൂതികൾ നടത്തുന്ന ആക്രമണങ്ങളിൽ തങ്ങൾക്ക് യാതൊരു പങ്കുമില്ലെന്നാണ് ഇറാന്റെ ഔദ്യോഗിക നിലപാട്. ഹൂതികളും സൗദിയും തമ്മിലുള്ള പ്രശ്നങ്ങളിൽ മധ്യസ്ഥത വഹിക്കാൻ തങ്ങൾ സന്നദ്ധമാണെന്നും അവർ അറിയിക്കുന്നു.

ഇറാന് ആണവായുധങ്ങൾ സ്വന്തമാക്കാൻ യാതൊരു ആഗ്രഹവുമില്ലെന്നും സമാധാന ചർച്ചകൾക്ക് രാജ്യം പൂർണമായും തയ്യാറാണെന്നും പ്രസിഡന്റ് മസൂദ് പെസഷ്കിയാൻ വ്യക്തമാക്കിയിട്ടുണ്ട്. ജോർജിയൻ പ്രധാനമന്ത്രിയുമായി നടത്തിയ ഉഭയകക്ഷി ചർച്ചയിലാണ് അദ്ദേഹം ഈ നയം വ്യക്തമാക്കിയത്.

അതേസമയം, അമേരിക്കയിലെ ഡീസൽ വില പിടിച്ചുനിർത്താൻ ലക്ഷ്യമിട്ട് റഷ്യൻ പ്രസിഡന്റ് വ്ളാദിമിർ പുട്ടിനുമായി നടത്തിയ ഊർജ വെടിനിർത്തൽ ധാരണ തുടക്കത്തിൽ തന്നെ പരാജയപ്പെട്ടു. റഷ്യയും യുക്രെയ്നും പരസ്പരം ഊർജ നിലയങ്ങൾക്ക് നേരെ തുടർച്ചയായി ആക്രമണങ്ങൾ അഴിച്ചുവിടുകയാണ്.

പുട്ടിന്റെ സമാധാന ശ്രമങ്ങൾ വെറും കപടനാടകമാണെന്ന് ആരോപിച്ചാണ് യുക്രെയ്ൻ തിരിച്ചടിക്കുന്നത്. ഇതിനുള്ള കൃത്യമായ മറുപടിയാണ് തങ്ങൾ നൽകുന്നതെന്ന് റഷ്യയും വാദിക്കുന്നു.

ഈ സംഘർഷങ്ങളുടെ പശ്ചാത്തലത്തിൽ അമേരിക്കയിലെ ഡീസൽ വില ഗാലന് ശരാശരി 6.33 ഡോളർ എന്ന നിലയിലേക്ക് ഉയർന്നു. കഴിഞ്ഞ വർഷം ഇതേ കാലയളവിലുണ്ടായിരുന്ന വിലയേക്കാൾ 70 ശതമാനത്തോളം വർധനവാണിത്.

ഐടി വിപ്ലവത്തിന്റെ കുതിപ്പിൽ ഇന്ത്യൻ വിപണി ആഗോള വിപണികളിൽ ആർട്ടിഫിഷ്യൽ ഇന്റലിജൻസ് അഥവാ എഐ സാങ്കേതികവിദ്യയുമായി ബന്ധപ്പെട്ട ആശങ്കകൾ വ്യാപകമായപ്പോൾ, പരമ്പരാഗത ഐടി മേഖലയുടെ കരുത്തിൽ ഇന്ത്യൻ ഓഹരി വിപണി തുടർച്ചയായ രണ്ടാമത്തെ ആഴ്ചയും മികച്ച നേട്ടമാണ് രേഖപ്പെടുത്തിയത്.

നിക്ഷേപകർ എഐ ഓഹരികളിൽ നിന്ന് പിന്മാറി പരമ്പരാഗത സോഫ്റ്റ്‌വെയർ കമ്പനികളിലേക്ക് ചേക്കേറിയത് ഇന്ത്യൻ ഐടി മേഖലയ്ക്ക് കഴിഞ്ഞ 18 വർഷത്തിനിടയിലെ ഏറ്റവും മികച്ച നേട്ടമുള്ള ആഴ്ചയായി മാറി. വെള്ളിയാഴ്ച മാത്രം നിഫ്റ്റി ഐടി സൂചിക ഏകദേശം 4 ശതമാനത്തോളമാണ് മുന്നേറിയത്.

ആഗോളതലത്തിലെ കണക്കുകൾ പരിശോധിക്കുമ്പോൾ 11.72 ശതമാനത്തിന്റെ നേട്ടമാണ് ഈ ആഴ്ച രേഖപ്പെടുത്തിയിട്ടുള്ളത്. മികച്ച രണ്ടാം പാടഫലം പുറത്തുവിട്ട

ടെക് മഹീന്ദ്രയാണ് ഈ ആഴ്ചയിൽ ഏറ്റവും കൂടുതൽ നേട്ടമുണ്ടാക്കിയത് (7%). ഇതിനു പുറമെ ടിസിഎസ് ഓഹരികൾ 3.26 ശതമാനവും ഇൻഫോസിസ് 4 ശതമാനവും വീതം മുന്നേറി.

എഐ മേഖലയിൽ പ്രതിസന്ധികൾ രൂപപ്പെടുമ്പോൾ ആ ആഘാതങ്ങളിൽ നിന്ന് ഇന്ത്യൻ ഐടി മേഖലയ്ക്ക് സംരക്ഷണം നൽകാൻ സാധിക്കുമെന്ന് അടുത്തിടെ ജെപി മോർഗൻ അടക്കമുള്ള പ്രമുഖ സാമ്പത്തിക സ്ഥാപനങ്ങൾ പ്രവചിച്ചിരുന്നു. ഈ വിലയിരുത്തലുകളെ പൂർണമായും ശരിവയ്ക്കുന്ന തരത്തിലുള്ള കുതിപ്പാണ് വിപണിയിൽ ദൃശ്യമായത്.

പതിവിന് വിപരീതമായി വിദേശ നിക്ഷേപകർ ഇന്നലെ ശക്തമായ വാങ്ങലുകാരായി മാറുന്ന കാഴ്ചയാണ് കണ്ടത്. 1,166 കോടി രൂപയുടെ അറ്റവാങ്ങലാണ് വിദേശ നിക്ഷേപകർ നടത്തിയത്.

എന്നാൽ, അമേരിക്ക, കൊറിയ, ചൈന തുടങ്ങിയ രാജ്യങ്ങൾ എഐ മേഖലയിൽ വലിയ മുന്നേറ്റം നടത്തിയപ്പോൾ ഇന്ത്യയിലെ ഐടി കമ്പനികൾ ആ രംഗത്ത് പിന്നിലായിപ്പോയതുകൊണ്ടാണ് ഇത്തരം നേട്ടങ്ങൾ ഉണ്ടാകുന്നത് എന്ന വിമർശനവും ഒരു വിഭാഗം സാമ്പത്തിക വിദഗ്ധർ ഉന്നയിക്കുന്നുണ്ട്. എഐ ഓഹരികളിൽ കനത്ത തിരിച്ചടി അമേരിക്കയിലെ പണപ്പെരുപ്പ കണക്കുകൾ പ്രതീക്ഷിച്ചതിലും വളരെ അധികം വർധിച്ചതായി കണ്ടെത്തിയതിനെ തുടർന്ന് ബുധനാഴ്ച മുതലാണ് എഐ ഓഹരികളിൽ വൻതോതിലുള്ള വിൽപന ആരംഭിച്ചത്.

എഐ കമ്പനികൾ കനത്ത കടബാധ്യതയിലേക്ക് നീങ്ങിക്കൊണ്ടിരിക്കുകയാണെന്നും, നിക്ഷേപകർ പ്രതീക്ഷിച്ച രീതിയിലുള്ള വരുമാനം ഉണ്ടാക്കാൻ ഇത്തരം കമ്പനികൾക്ക് സാധിക്കുന്നില്ലെന്നുമുള്ള ആശങ്കകൾ ശക്തമായതോടെ വിൽപന കൂടുതൽ രൂക്ഷമായി. സാങ്കേതികവിദ്യ വികസിപ്പിക്കുന്നതിനായി ഇത്തരം കമ്പനികൾ പരിധിയിൽ കവിഞ്ഞ വായ്പകൾ വാരിക്കൂട്ടുന്നുവെന്നാണ് നിക്ഷേപകരുടെ പ്രധാന പരാതി.

ഇതിന്റെ പ്രതിഫലനമെന്നോണം ബുധനാഴ്ച മാത്രം അമേരിക്കൻ നാസ്ഡാക് സൂചിക 1.8 ശതമാനമാണ് ഇടിഞ്ഞത്. വ്യാഴാഴ്ചയോടെ ഈ ആഘാതം കൊറിയൻ വിപണിയിലെ ചിപ്പ് നിർമ്മാതാക്കളെയും ബാധിച്ചു.

കോസ്പി സൂചിക 7.57 ശതമാനമാണ് കൂപ്പുകുത്തിയത്. ജപ്പാനിലെ നിക്കെയ് സൂചിക 5 ശതമാനവും തായ്‌വാൻ സൂചിക 3.5 ശതമാനവും നഷ്ടത്തിലാണ് വ്യാപാരം അവസാനിപ്പിച്ചത്.

നിക്ഷേപകർ എഐ, ടെക് ഓഹരികളിൽ നിന്ന് കൂട്ടത്തോടെ പിന്മാറിയതോടെ യുഎസ് വിപണി സൂചികകൾ സമീപകാലത്തെ ഏറ്റവും മോശമായ പ്രതിവാര നഷ്ടമാണ് നേരിട്ടത്. എസ് ആൻഡ് പി സൂചിക കഴിഞ്ഞ ആഴ്ചയിൽ 2 ശതമാനം നഷ്ടം രേഖപ്പെടുത്തി.

നാസ്ഡാകിന്റെ നഷ്ടം 4 ശതമാനമായിരുന്നു. കഴിഞ്ഞ ജൂണിനു ശേഷമുള്ള ഏറ്റവും വലിയ ഇടിവാണിത്.

അതേസമയം, ഡോ ജോൺസ് സൂചിക 0.7% ചെറിയ നേട്ടത്തിലാണ് വ്യാപാരം അവസാനിപ്പിച്ചത്. എന്നാൽ, വ്യാഴം, വെള്ളി ദിവസങ്ങളിൽ ഐടി ഓഹരികളുടെ കരുത്ത് മാത്രം ഉപയോഗപ്പെടുത്തിയാണ് ഇന്ത്യൻ വിപണി ഈ പ്രതിസന്ധികളെയും അതിജീവിച്ച് മുന്നേറിയത്.

അവസാന വ്യാപാര ദിനത്തിൽ മുഖ്യ ഓഹരി സൂചികയായ സെൻസെക്സ് 413.66 പോയിന്റ് നേട്ടത്തോടെ 74,729.27ൽ എത്തിവ്യാപാരം അവസാനിപ്പിച്ചു. നിഫ്റ്റി ആകട്ടെ 148.80 പോയിന്റ് മുന്നേറി 23,146.15ലും ക്ലോസ് ചെയ്തു.

ഈ ആഴ്ചയിലെ മൊത്തത്തിലുള്ള കണക്കുകൾ എടുത്താൽ സെൻസെക്സ് 3 ശതമാനവും നിഫ്റ്റി 2.8 ശതമാനവും നേട്ടമുണ്ടാക്കിയിട്ടുണ്ട്. വരാനിരിക്കുന്ന നിർണായക ഘട്ടങ്ങൾ വരുന്ന ആഴ്ച ഇന്ത്യൻ ഓഹരി വിപണിയെ സംബന്ധിച്ചിടത്തോളം അതിശയകരമായ വഴിത്തിരിവുകൾ നിറഞ്ഞതായിരിക്കും.

രാജ്യത്തെ പ്രമുഖ കമ്പനികളുടെ രണ്ടാം പാദ ഫലങ്ങൾ വരും ദിവസങ്ങളിൽ ഒന്നിന് പിറകെ ഒന്നായി പുറത്തുവരും. എച്ച്ഡിഎഫ്സി ബാങ്ക്, ഐസിഐസിഐ ബാങ്ക്, ആക്സിസ് ബാങ്ക് തുടങ്ങിയ മുൻനിര ബാങ്കിങ് കമ്പനികളുടെ പാദഫലങ്ങൾ ഇന്ന് തന്നെ പുറത്തുവിടും.

ഫിനാൻഷ്യൽ മേഖലയിലെ ഓഹരികളുടെ ഭാവി പ്രകടനത്തെ ഈ ഫലങ്ങൾ നിർണായകമായി സ്വാധീനിക്കും. കൂടാതെ, വരുന്ന 21-ാം തീയതി ആരംഭിക്കുന്ന ജിയോ പ്ലാറ്റ്‌ഫോംസിന്റെ ഐപിഒയും വിപണിയുടെ ശ്രദ്ധാകേന്ദ്രമാണ്.

പൂർണ്ണമായും പുതിയ ഓഹരികൾ (ഫ്രഷ് ഇഷ്യൂ) വഴി 30,213 കോടി രൂപയാണ് ജിയോ ഇതിലൂടെ സമാഹരിക്കുന്നത്. ഈ ഐപിഒ പൂർണ്ണമായി സബ്‌സ്‌ക്രൈബ് ചെയ്യപ്പെടുകയാണെങ്കിൽ, ഹ്യുണ്ടായ് ഐപിഒയുടെ സർവ്വകാല റെക്കോർഡുകൾ ഭേദിച്ച് ഇന്ത്യയിലെ ഏറ്റവും വലിയ പ്രാരംഘ ഓഹരി വിൽപ്പനയായി ഇത് മാറുമെന്നുറപ്പാണ്.

ഉൽപ്പാദനച്ചെലവ് വൻതോതിൽ വർധിച്ചതിനാൽ എഫ്എംസിജി കമ്പനികളുടെ രണ്ടാം പാദ ഫലങ്ങൾ അത്ര മികച്ചതായിരിക്കില്ലെന്ന ആശങ്കയും നിക്ഷേപകർക്കിടയിലുണ്ട്. കമ്പനികളുടെ മൊത്തത്തിലുള്ള വരുമാനത്തിൽ വലിയ ഇടിവ് സംഭവിച്ചില്ലെങ്കിലും, അറ്റലാഭത്തിന്റെ ശതമാനക്കണക്കിനെ ഇത് പ്രതികൂലമായി ബാധിക്കുമെന്നാണ് വിലയിരുത്തപ്പെടുന്നത്.

ഇതുകൂടാതെ, രാജ്യാന്തര തലത്തിലെ ക്രൂഡോയിൽ വിലയിലെ വ്യതിയാനങ്ങൾ, സങ്കീർണ്ണമായ ഭൗമരാഷ്ട്രീയ സാഹചര്യങ്ങൾ, അമേരിക്കൻ കടപ്പത്രങ്ങളിലെ ആദായം തുടങ്ങിയ വിവിധ ഘടകങ്ങളും വരും ദിവസങ്ങളിൽ ഇന്ത്യൻ വിപണിയുടെ ഗതിയെ നിർണയിക്കുന്നതിൽ നിർണായക പങ്ക് വഹിക്കും.