കുടുംബത്തിനായി ഹെല്‍ത്ത് ഇൻഷുറൻസ് തിരഞ്ഞെടുക്കുമ്പോൾ പ്രസവാനുകൂല്യങ്ങളിൽ ശ്രദ്ധിക്കേണ്ട കാര്യങ്ങൾ

കുടുംബത്തിനായി പുതിയൊരു ഹെൽത്ത് ഇൻഷുറൻസ് പ്ലാൻ തെരഞ്ഞെടുക്കുമ്പോൾ പ്രസവാനുകൂല്യങ്ങളുമായി (Maternity Benefits) ബന്ധപ്പെട്ട് എന്തെല്ലാം പ്രധാന കാര്യങ്ങൾ ശ്രദ്ധിക്കണം എന്ന ആശങ്ക പല ദമ്പതികൾക്കുമുണ്ട്. മുൻകാലങ്ങളിൽ മെറ്റേണിറ്റി പരിരക്ഷ ലഭിക്കണമെങ്കിൽ പോളിസി എടുത്തതിന് ശേഷം രണ്ട് മുതൽ നാല് വർഷം വരെ കാത്തിരിക്കേണ്ടിയിരുന്നു.

ഈ ഉയർന്ന കാത്തിരിപ്പ് കാലാവധി മൂലം പലർക്കും ഇൻഷുറൻസ് ആനുകൂല്യം ലഭിക്കാതെ വരികയോ, വർഷങ്ങൾക്ക് മുൻപ് തന്നെ പോളിസി പ്ലാൻ ചെയ്യേണ്ടതായി വരികയോ ചെയ്തിരുന്നു. എന്നാൽ ഇന്നത്തെ സാഹചര്യത്തിൽ വലിയ മാറ്റങ്ങൾ വന്നിട്ടുണ്ട്.

വെറും മൂന്ന് മാസത്തെ കാത്തിരിപ്പ് കാലാവധിയിൽ മെറ്റേണിറ്റി കവറേജ് നൽകുന്ന ഇൻഷുറൻസ് പ്ലാനുകൾ ഇപ്പോൾ ലഭ്യമാണ്. അതിനാൽ തന്നെ ഗർഭധാരണത്തിന് തൊട്ടുമുമ്പ് തന്നെ ഇൻഷുറൻസ് എടുക്കാനും കാര്യങ്ങൾ എളുപ്പത്തിൽ ക്രമീകരിക്കാനും ദമ്പതികൾക്ക് സാധിക്കുന്നു.

പോളിസി തിരഞ്ഞെടുക്കുമ്പോൾ പരിശോധിക്കേണ്ട പ്രധാന ഘടകങ്ങൾ: കുറഞ്ഞ കാത്തിരിപ്പ് കാലാവധി (Waiting Period) ഉള്ള പ്ലാനുകൾ ആണെന്ന് കരുതി മാത്രം പോളിസികൾ തിരഞ്ഞെടുക്കരുത്.

താഴെ പറയുന്ന കാര്യങ്ങളും പ്രത്യേകം വിലയിരുത്തേണ്ടതുണ്ട്: ക്ലെയിം ലിമിറ്റ്: പ്രസവ ചെലവുകൾക്കായി ഇൻഷുറൻസ് കമ്പനി പരമാവധി എത്ര തുക നൽകുമെന്ന് കൃത്യമായി ഉറപ്പാക്കുക. പോളിസി കവറേജ് തുക മുഴുവനായും ഇതിനായി ലഭിക്കില്ല, മറിച്ച് ഒരു നിശ്ചിത തുക മാത്രമാകും ഇതിനായി അനുവദിക്കുക.

വിവിധ പോളിസികൾ അനുസരിച്ച് ഈ തുക 50,000 രൂപ മുതൽ 2 ലക്ഷം രൂപ വരെ വ്യത്യാസപ്പെടാം. കവറേജ് വിവരങ്ങൾ: സാധാരണ പ്രസവം (Normal Delivery), സിസേറിയൻ (Cesarean), പ്രസവത്തിന് മുൻപും പിൻപുമുള്ള ചികിത്സാ പരിചരണ ചെലവുകൾ എന്നിവ പോളിസിയിൽ ഉൾപ്പെടുന്നുണ്ടോ എന്ന് വിശദമായി പരിശോധിക്കണം.

കുഞ്ഞിനുള്ള പരിരക്ഷ: ജനിച്ച ഒന്നാം ദിവസം മുതൽ നവജാത ശിശുവിന് ലഭിക്കുന്ന കവറേജ്, ആവശ്യമായ വാക്സിനേഷനുകൾ, ജന്മനാ ഉള്ള ആരോഗ്യപ്രശ്നങ്ങൾക്കും വൈകല്യങ്ങൾക്കുമുള്ള ചികിത്സാ ചെലവുകൾ എന്നിവ ഉൾക്കൊള്ളുന്ന പ്ലാനുകൾ വേണം തെരഞ്ഞെടുക്കാൻ. തൊഴിലുടമ നൽകുന്ന ഇൻഷുറൻസ് മാത്രം മതിയോ? സ്ഥാപനങ്ങൾ നൽകുന്ന ഗ്രൂപ്പ് ഹെൽത്ത് കവർ മികച്ചൊരു പരിരക്ഷയാണെങ്കിലും, അതിനെ മാത്രം പൂർണ്ണമായി ആശ്രയിക്കുന്നത് ബുദ്ധിയല്ല.

കാരണം, ഇവ നാം ജോലി ചെയ്യുന്ന കാലയളവിൽ മാത്രം ലഭ്യമാകുന്നവയാണ്. തൊഴിൽ മാറ്റം ഉണ്ടാകുകയോ ജോലിയിൽ നിന്ന് വിരമിക്കുകയോ ചെയ്താൽ ഈ പരിരക്ഷ പൂർണ്ണമായും നഷ്ടപ്പെടും.