തമിഴ്നാട്ടിലെ വിവിധ ഭാഗങ്ങളിൽ നിന്ന് എത്തുന്ന വിനോദസഞ്ചാരികളുടെ യാത്രാസൗകര്യം മെച്ചപ്പെടുത്തുന്നതിന്റെ ഭാഗമായി തേനി റെയിൽവേ സ്റ്റേഷനിൽ നിന്ന് മൂന്നാറിലേക്ക് പുതിയ ഗതാഗത സംവിധാനം നിലവിൽ വന്നു. തമിഴ്നാട് ട്രാൻസ്പോർട്ട് കോർപറേഷന്റെ നേതൃത്വത്തിലാണ് പുതിയ ബസ് സർവീസ് ആരംഭിച്ചിട്ടുള്ളത്.
മൂന്നാർ ഉൾപ്പെടെയുള്ള പ്രദേശങ്ങളിലെ പ്രധാന വിനോദസഞ്ചാര കേന്ദ്രങ്ങളിലേക്ക് അയൽ സംസ്ഥാനങ്ങളിൽ നിന്ന് എത്തുന്ന യാത്രികരുടെ എണ്ണത്തിൽ വർധനവുണ്ടാകുന്ന പശ്ചാത്തലത്തിലാണ് ഈ നടപടി. പുതിയ സർവീസിന്റെ ഭാഗമായി രാവിലെ 8.05 ന് തേനിയിൽ നിന്ന് ബസ് മൂന്നാറിലേക്ക് യാത്ര തിരിക്കുന്ന രീതിയിലാണ് ക്രമീകരണങ്ങൾ ഏർപ്പെടുത്തിയിരിക്കുന്നത്.
മുൻപ് ചെന്നൈയിൽ നിന്ന് ബോഡിനായ്ക്കന്നൂർ വരെ ട്രെയിൻ സർവീസുകൾ ആരംഭിച്ചിരുന്നു. ഇതിനുപുറമേ, താംബരത്തു നിന്ന് വില്ലുപുരം, ചിദംബരം, മയിലാടുതുറൈ, തഞ്ചാവൂർ, ട്രിച്ചി വഴി ബോഡിനായ്ക്കന്നൂരിലേക്ക് ആഴ്ചയിൽ ഒരു ദിവസം പ്രത്യേക ട്രെയിൻ സർവീസും നിലവിലുണ്ട്.
റെയിൽ മാർഗ്ഗമെത്തുന്ന യാത്രക്കാർക്ക് ഉയർന്ന നിരക്കിലുള്ള ടാക്സി വാഹനങ്ങളെ ആശ്രയിക്കുന്നത് ഒഴിവാക്കി കുറഞ്ഞ ചെലവിൽ നേരിട്ട് മൂന്നാറിലെത്താൻ ഈ പുതിയ സർവീസ് ഏറെ സഹായകരമാകും. തേനി– മൂന്നാർ റൂട്ടിലെ ടിക്കറ്റ് നിരക്ക് 130 രൂപയായി നിശ്ചയിച്ചിട്ടുണ്ട്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
