റെഡ്മിയുടെ പുതിയ K100 ഫ്ലാഗ്ഷിപ്പ് സ്മാർട്ട്ഫോൺ നിര ആഗസ്റ്റ് 11-ന് വിപണിയിൽ എത്തും

സാങ്കേതികലോകം ഏറെ പ്രതീക്ഷയോടെ കാത്തിരുന്ന റെഡ്മിയുടെ പുതിയ ഫ്ലാഗ്ഷിപ്പ് സ്‍മാർട്ട്ഫോൺ നിരയായ K100 സീരീസ് ആഗസ്റ്റ് 11-ന് ചൈനയിൽ ഔദ്യോഗികമായി അവതരിപ്പിക്കുമെന്ന് കമ്പനി പ്രഖ്യാപിച്ചു. നിരവധി ആഴ്ചകളായി സജീവമായിരുന്ന അഭ്യൂഹങ്ങൾക്ക് വിരാമമിട്ടുകൊണ്ടാണ് ലോഞ്ച് തീയതി സംബന്ധിച്ച ഔദ്യോഗിക സ്ഥിരരണം പുറത്തുവന്നിരിക്കുന്നത്.

ഇതിനോടൊപ്പം തന്നെ പരമ്പരയിലെ പ്രധാന മോഡലായ റെഡ്‍മി K100 പ്രോ മാക്സിന്റെ പ്രാരംഭ ഡിസൈൻ വിവരങ്ങളും നിർമ്മാതാക്കൾ പുറത്തുവിട്ടിട്ടുണ്ട്. ആദ്യഘട്ട

വിപണി അവതരണത്തിൽ റെഡ്‍മി K100 പ്രോ, റെഡ്‍മി K100 പ്രോ മാക്സ് എന്നീ രണ്ട് പതിപ്പുകളാണ് പ്രധാനമായും പുറത്തിറക്കുന്നത്. എന്നാൽ സ്റ്റാൻഡേർഡ് റെഡ്‍മി K100 ഈ ലോഞ്ച് ചടങ്ങിൽ ഉൾപ്പെടുത്തില്ല.

എങ്കിലും ഈ മോഡൽ ഒഴിവാക്കപ്പെട്ടിട്ടില്ലെന്നും, വരും ദിവസങ്ങളിൽ പ്രത്യേകമായി അവതരിപ്പിക്കുമെന്നും കമ്പനി വ്യക്തമാക്കിയിട്ടുണ്ട്. മികച്ച പ്രകടനവും ദൈനംദിന ഉപയോഗത്തിന് അനുയോജ്യമായ സമഗ്ര അനുഭവവും ആഗ്രഹിക്കുന്ന ഉപയോക്താക്കളെയാണ് സ്റ്റാൻഡേർഡ് K100 ലക്ഷ്യമിടുന്നതെന്ന് ഷവോമി പ്രസിഡന്റ് ലു വെയ്‌ബിംഗ് വ്യക്തമാക്കി.

മെമ്മറി ചിപ്പുകളുടെ വില വർധിച്ചതും മറ്റ് ഘടകങ്ങളുടെ നിർമ്മാണച്ചെലവ് ഉയർന്നതുമാണ് പ്രോ മോഡലുകൾ ആദ്യഘട്ടത്തിൽ പുറത്തിറക്കാൻ കാരണമെന്നും അദ്ദേഹം കൂട്ടിച്ചേർത്തു. കഴിഞ്ഞ വർഷം ഒക്ടോബറിലായിരുന്നു റെഡ്‍മി K90 സീരീസ് കമ്പനി വിപണിയിലെത്തിച്ചത്.

തുടർന്ന് K90 അൾട്ര മോഡലും അവതരിപ്പിക്കപ്പെട്ടിരുന്നു. എന്നാൽ ഇത്തവണ പതിവ് റിലീസ് ഷെഡ്യൂളിൽ മാറ്റങ്ങൾ വരുത്തിക്കൊണ്ടാണ് പ്രോ മോഡലുകൾ ആദ്യം പുറത്തിറക്കുന്നത്.

ലോഞ്ച് പ്രഖ്യാപനത്തോടൊപ്പം കാബർനെറ്റ് റെഡ് നിറത്തിലുള്ള റെഡ്മി K100 പ്രോ മാക്സിന്റെ ഔദ്യോഗിക ചിത്രങ്ങളും കമ്പനി പുറത്തുവിട്ടു. ഫോണിന് അനുയോജ്യമായ മെറ്റൽ ഫ്രെയിം, നൂതനമായ ക്യാമറ മോഡ്യൂളിന് ചുറ്റുമുള്ള ഫ്ലോട്ടിംഗ് ലൈറ്റ് റിംഗ് ഡിസൈൻ എന്നിവയാണ് പ്രധാന ദൃശ്യ ആകർഷണങ്ങൾ.

കൂടാതെ 6.9 ഇഞ്ച് ഓഎൽഇഡി ഡിസ്പ്ലേ ഈ പുതിയ മോഡലിൽ സജ്ജീകരിച്ചിട്ടുണ്ടെന്ന് കമ്പനി സ്ഥിരീകരിച്ചിട്ടുണ്ട്. ഫോണിന്റെ പിൻഭാഗത്തായി ‘Sound by Bose’ ബ്രാൻഡിംഗും ഉൾപ്പെടുത്തിയിരിക്കുന്നത് ശ്രദ്ധേയമാണ്.

ലഭ്യമായ പ്രാഥമിക വിവരങ്ങൾ അനുസരിച്ച് K100 പ്രോ ഏകദേശം 4,000 യുവാൻ വില വിഭാഗത്തിലായിരിക്കും എത്തുക. അതേസമയം K100 പ്രോ മാക്സ് പ്രകടനത്തിലും ഗെയിമിങ്ങിലും കൂടുതൽ ശ്രദ്ധ കേന്ദ്രീകരിച്ചുകൊണ്ടുള്ള ഫീച്ചറുകളോടെയാകും വിപണിയിലെത്തുക.

ഔദ്യോഗികമായ കൃത്യമായ വില വിവരങ്ങൾ ലോഞ്ച് ചടങ്ങിൽ പ്രഖ്യാപിക്കുമെന്നാണ് പ്രതീക്ഷിക്കുന്നത്. ആഗോള വിപണിയിൽ റെഡ്മി K100 പ്രോയും K100 പ്രോ മാക്സും യഥാക്രമം പോക്കോ F9 പ്രോ, പോക്കോ F9 അൾട്ര എന്നീ പേരുകളിലാകും അവതരിപ്പിക്കപ്പെടുകയെന്ന് റിപ്പോർട്ടുകൾ സൂചിപ്പിക്കുന്നുണ്ടെങ്കിലും, ഇതുസംബന്ധിച്ച് ഔദ്യോഗിക സ്ഥിരീകരണം ഇതുവരെ ലഭ്യമായിട്ടില്ല.