സ്മാർട്ട്ഫോൺ വിപണിയിൽ വൻ മാറ്റങ്ങൾക്ക് തുടക്കം കുറിച്ചുകൊണ്ട് സാംസങ്ങിന്റെ പുതിയ ഗാലക്സി ഇസഡ് (Z) ഫോൾഡബിൾ ഫോൺ ശ്രേണി അടുത്ത മാസം പുറത്തിറങ്ങുമെന്ന് സൂചന. ഔദ്യോഗിക സ്ഥിരീകരണം വന്നിട്ടില്ലെങ്കിലും, കമ്പനി സംഘടിപ്പിക്കുന്ന വരാനിരിക്കുന്ന ഇവന്റിൽ പുതിയ ഗാലക്സി ഇസഡ് ഫോൾഡ്, ഇസഡ് ഫ്ലിപ്പ് മോഡലുകൾ അവതരിപ്പിക്കുമെന്നാണ് ടെക് ലോകത്തെ റിപ്പോർട്ടുകൾ നൽകുന്ന വിവരം.
ഇത്തവണത്തെ പതിപ്പുകളിൽ വലിയ മാറ്റങ്ങളാണ് ഉപയോക്താക്കൾ പ്രതീക്ഷിക്കുന്നത്. നിലവിലെ ലീകുകൾ പ്രകാരം, സാംസങ് ഗാലക്സി ഇസഡ് ഫോൾഡ് 8 എന്ന പേരിൽ പുതിയൊരു മോഡൽ വിപണിയിലേക്ക് എത്തുന്നുണ്ട്.
മുൻകാലങ്ങളിൽ നിന്ന് വ്യത്യസ്തമായി, കൂടുതൽ വീതിയുള്ളതും എന്നാൽ ഉയരം കുറഞ്ഞതുമായ ഡിസൈനിലാണ് ഈ ഫോൺ രൂപകൽപ്പന ചെയ്തിരിക്കുന്നത്. 4:3 എന്ന അനുപാതത്തിലുള്ള ഡിസ്പ്ലേ മൾട്ടിമീഡിയ അനുഭവങ്ങൾക്കും വായനയ്ക്കും ഏറെ അനുയോജ്യമായിരിക്കും.
ഉയരം കുറവായതിനാൽ ഒറ്റക്കൈ കൊണ്ട് ഫോൺ ഉപയോഗിക്കുന്നവർക്ക് ഇത് ഏറെ സൗകര്യപ്രദമായിരിക്കും. അതേസമയം, പ്രീമിയം വിഭാഗത്തിൽ സാംസങ് ഗാലക്സി ഇസഡ് ഫോൾഡ് 8 അൾട്രാ എന്നൊരു മോഡലും കമ്പനി പുറത്തിറക്കുന്നുണ്ട്.
ഇത് നിലവിലെ ഫോൾഡബിൾ ഫോണുകളിൽ നിന്ന് വേറിട്ടുനിൽക്കുന്ന ഒന്നായിരിക്കും. സാംസങ്ങിന്റെ ഈ പുതിയ പരീക്ഷണം ഫോൾഡബിൾ സ്മാർട്ട്ഫോണുകളുടെ പ്രചാരത്തിൽ വലിയ സ്വാധീനം ചെലുത്തുമെന്നാണ് വിലയിരുത്തൽ.
ഭാവിയിൽ ആപ്പിൾ ഉൾപ്പെടെയുള്ള വമ്പൻമാർ ഫോൾഡബിൾ സാങ്കേതികവിദ്യയിലേക്ക് ചുവടുവെക്കുമെന്ന അഭ്യൂഹങ്ങൾക്കിടയിൽ, സാംസങ്ങിന്റെ ഈ നീക്കം വിപണിയിൽ നിർണ്ണായകമാകും. 2,000 ഡോളറിന് മുകളിൽ വില പ്രതീക്ഷിക്കുന്ന ഈ ഫോണുകൾ ഉയർന്ന സൗകര്യങ്ങളോടു കൂടിയാണ് വിപണിയിലെത്തുക.
എങ്കിലും, വ്യത്യസ്തമായ ഫോം ഫാക്ടറും ക്യാമറ സാങ്കേതികവിദ്യയും ഉപയോക്താക്കളെ എത്രത്തോളം ആകർഷിക്കുമെന്നത് കാത്തിരുന്ന് കാണേണ്ടിയിരിക്കുന്നു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
