യുഎഇയിലെ ഇന്ത്യൻ പ്രവാസികൾക്ക് ശ്രദ്ധയ്ക്ക്: പാസ്‌പോർട്ട് നിരക്കിലും സേവന സംവിധാനങ്ങളിലും വൻ മാറ്റങ്ങൾ വരുന്നു

യുഎഇയിലെ ഇന്ത്യൻ പ്രവാസികളെ ബാധിക്കുന്ന സുപ്രധാനമായ നാല് മാറ്റങ്ങൾ വരാനിരിക്കുന്ന ദിവസങ്ങളിൽ നടപ്പിലാകുന്നു. പാസ്‌പോർട്ട് സേവനങ്ങളുടെ നിരക്കുകളിലും വിതരണ സംവിധാനങ്ങളിലും വലിയ അഴിച്ചുപണികളാണ് വിദേശകാര്യ മന്ത്രാലയം പ്രഖ്യാപിച്ചിരിക്കുന്നത്.

പാസ്‌പോർട്ട് നിരക്ക് വർദ്ധനവ്
ജൂലൈ 1 മുതൽ പ്രാബല്യത്തിൽ വരുന്ന പുതിയ നിരക്കുകൾ പ്രകാരം, പാസ്‌പോർട്ട് ഫീസിൽ 75 ശതമാനം വരെ വർദ്ധനവാണ് ഉണ്ടാവുക. ജൂൺ 20-ന് ഇന്ത്യൻ വിദേശകാര്യ മന്ത്രാലയം പുറപ്പെടുവിച്ച ഗസറ്റ് വിജ്ഞാപനത്തെ തുടർന്നാണ് ഈ തീരുമാനം.

ഇതുപ്രകാരം 36 പേജുള്ള സാധാരണ പാസ്‌പോർട്ടിന് നിലവിലെ 1,500 രൂപയ്ക്ക് പകരം 2,500 രൂപ നൽകണം. 60 പേജുള്ള പാസ്‌പോർട്ടിന് ഫീസ് 2,000 രൂപയിൽ നിന്ന് 3,500 രൂപയായി ഉയരും.

തത്കാൽ അപേക്ഷകൾക്ക് 6,000 രൂപയും, പാസ്‌പോർട്ട് നഷ്ടപ്പെടുകയോ കേടുപാടുകൾ സംഭവിക്കുകയോ ചെയ്താൽ 7,500 രൂപയുമാണ് പുതിയ നിരക്ക്. ഇതിന്റെ ദിർഹത്തിലുള്ള കണക്കുകൾ ഇന്ത്യൻ മിഷനുകൾ വൈകാതെ വ്യക്തമാക്കും.

പുതിയ സേവന ദാതാക്കൾ
ജൂലൈ 1 മുതൽ പാസ്‌പോർട്ട്-വിസ സേവനങ്ങൾക്കായി പുതിയ സംവിധാനം നിലവിൽ വരും. നിലവിലെ സംവിധാനത്തിന് പകരം അൽഹിന്ദ് ടൂർസ് ആൻഡ് ട്രാവൽസ് ആയിരിക്കും ഇനി ഈ സേവനങ്ങൾ നിർവ്വഹിക്കുക.

പാസ്‌പോർട്ട് പുതുക്കൽ, ഒസിഐ കാർഡ്, വിസ അപേക്ഷ, പോലീസ് ക്ലിയറൻസ് തുടങ്ങിയ എല്ലാ സേവനങ്ങളും ഇനി ‘ഇന്ത്യൻ കോൺസുലാർ ആപ്ലിക്കേഷൻ സെന്ററുകൾ’ എന്ന പേരിൽ ഒരൊറ്റ പ്ലാറ്റ്‌ഫോമിന് കീഴിലായിരിക്കും ലഭ്യമാവുക. ഓരോ ഇടപാടിനും 19 ദിർഹം സർവീസ് ചാർജ് ഈടാക്കും.

അഞ്ച് പ്രവൃത്തി ദിവസങ്ങൾക്കുള്ളിൽ അപ്പോയിന്റ്മെന്റും, 30 മിനിറ്റിനുള്ളിൽ നടപടികളും പൂർത്തിയാക്കാനാണ് ലക്ഷ്യമിടുന്നത്. ഈ മാറ്റത്തിന്റെ ഭാഗമായി ജൂൺ 26 മുതൽ ജൂൺ 30 വരെ സാധാരണ കോൺസുലാർ സേവനങ്ങൾ ഉണ്ടായിരിക്കില്ല.

അടിയന്തര ആവശ്യങ്ങൾക്ക് എംബസിയെയോ കോൺസുലേറ്റിലെയോ നേരിട്ട് ബന്ധപ്പെടാം. പുതിയ കേന്ദ്രങ്ങൾ
യുഎഇയിലുടനീളമായി 16 പുതിയ കേന്ദ്രങ്ങളാണ് പ്രവർത്തനമാരംഭിക്കുന്നത്.

അബുദാബിയിൽ ആറും, ദുബായിൽ രണ്ടും, ഷാർജയിൽ രണ്ടും കേന്ദ്രങ്ങൾ ഉണ്ടാകും. കൂടാതെ അജ്മാൻ, ഫുജൈറ, റാസൽഖൈമ, ഉമ്മുൽ ഖുവൈൻ, ഖോർഫക്കാൻ, കൽബ എന്നിവിടങ്ങളിലും സേവന കേന്ദ്രങ്ങൾ പ്രവർത്തിക്കും.

യാത്രക്കാരുടെ ശ്രദ്ധയ്ക്ക്
ഇന്ത്യയിലേക്ക് യാത്ര ചെയ്യുന്നവർ 24 മണിക്കൂർ മുൻപ് ‘എയർ സുവിധ 2.0’ ഓൺലൈൻ ഫോം പൂരിപ്പിച്ചിരിക്കണം. വിമാനത്താവളങ്ങളിലെ നടപടിക്രമങ്ങൾ ലഘൂകരിക്കാനാണ് ഈ സംവിധാനം.

കൂടാതെ, പാസ്‌പോർട്ട് ഒരു യാത്രാ രേഖ മാത്രമാണെന്നും അത് പൗരത്വത്തിനുള്ള അന്തിമ തെളിവല്ലെന്നും അധികൃതർ വ്യക്തമാക്കിയിട്ടുണ്ട്. ഭരണഘടനയുടെയും 1955-ലെ പൗരത്വ നിയമത്തിന്റെയും അടിസ്ഥാനത്തിൽ മാത്രമാണ് പൗരത്വം നിർണ്ണയിക്കപ്പെടുന്നത്.