തൃശൂരിൽ വീടിനുള്ളിൽ പെരുമ്പാമ്പ് ശല്യം; 22 മുട്ടത്തോടുകൾ കണ്ടെത്തി, ആശങ്ക ഒഴിയുന്നു

തൃശൂർ പൂങ്കുന്നം എംജി നഗറിലെ ശ്രീകൃഷ്ണനിലയം എന്ന വീട്ടിൽ കഴിഞ്ഞ ഏതാനും ദിവസങ്ങളായി നിലനിന്നിരുന്ന ഭീതിക്ക് വിരാമമാകുന്നു. ബി.

കാർത്തിക്കിന്റെ കുടുംബം താമസിക്കുന്ന വീടിന് പരിസരത്ത് തുടർച്ചയായി പെരുമ്പാമ്പിൻകുഞ്ഞുങ്ങളെ കണ്ടെത്തിയതിനെത്തുടർന്ന് പ്രദേശവാസികൾ വലിയ ആശങ്കയിലായിരുന്നു. സംഭവത്തിൽ അടിയന്തര നടപടിയെന്ന നിലയിൽ വീടിന്റെ തറയോടു ചേർന്നുള്ള ഭാഗം ജെസിബി ഉപയോഗിച്ച് പൊളിച്ചു നീക്കാൻ തീരുമാനിക്കുകയായിരുന്നു.

വെള്ളിയാഴ്ച രാവിലെ രണ്ട് പാമ്പിൻകുഞ്ഞുങ്ങളെ കൂടി പിടികൂടിയതിന് പിന്നാലെ നടത്തിയ പരിശോധനയിൽ തറയ്ക്കടിയിൽ നിന്ന് 22 പാമ്പിൻമുട്ടകളുടെ തോടുകൾ കണ്ടെടുത്തു. വനംവകുപ്പിന്റെ പാമ്പുപിടിത്തക്കാർ കഴിഞ്ഞ ദിവസം ഉച്ചവരെ 18 പാമ്പിൻകുഞ്ഞുങ്ങളെ പിടികൂടിയിരുന്നു.

ഇതിനുപുറമെ, വീട്ടുകാർ പിടികൂടിയവയും വെള്ളിയാഴ്ച ലഭിച്ചവയും ഉൾപ്പെടെ ആകെ 22 പാമ്പിൻകുഞ്ഞുങ്ങളെയാണ് ഇതുവരെ കണ്ടെത്തിയത്. പിടികൂടുന്നതിനിടയിൽ രണ്ട് പാമ്പുകൾ തോട്ടിലേക്ക് ഇഴഞ്ഞുപോവുകയും ചെയ്തിരുന്നു.

കണ്ടെത്തിയ മുട്ടത്തോടുകളുടെ എണ്ണവും കുഞ്ഞുങ്ങളുടെ എണ്ണവും തുല്യമായതിനാൽ മുട്ട വിരിഞ്ഞു കഴിഞ്ഞെന്നും ഇനി പ്രദേശത്ത് പാമ്പുകളുടെ സാന്നിധ്യം ഉണ്ടാകില്ലെന്നുമാണ് കരുതപ്പെടുന്നത്.

സാധാരണയായി 20 മുതൽ 40 വരെ മുട്ടകളാണ് പെരുമ്പാമ്പുകൾ ഇടാറുള്ളത്. 60 മുതൽ 70 ദിവസം വരെയാണ് മുട്ട

വിരിയാൻ എടുക്കുന്ന സമയം. കാലാവസ്ഥാ വ്യതിയാനത്തിനനുസരിച്ച് ഇതിൽ മാറ്റങ്ങൾ വരാം.

പെരുമ്പാമ്പുകൾ മുട്ടയ്ക്ക് കാവലിരിക്കാറുണ്ടെങ്കിലും വിരിയുന്നതിന് തൊട്ടുമുമ്പ് അവ ഉപേക്ഷിച്ചു പോവുകയാണ് പതിവ്. ഇതിനു മുൻപ്, മൂന്നാഴ്ച മുമ്പ് ഈ വീടിന് സമീപത്തുനിന്നും ഒരു പെരുമ്പാമ്പിനെ പിടികൂടിയിരുന്നു.