സ്വർണവിലയിൽ വീണ്ടും ‘നട്ടുച്ച’ കയറ്റം; 73,000വും ഭേദിച്ച് പവന്റെ മുന്നേറ്റം, 9 കാരറ്റ് സ്വർണത്തിനും ഇനി ഹോൾമാർക്കിങ്

കേരളത്തിൽ ഇന്ന് ഉച്ചയ്ക്ക് വീണ്ടും സ്വർണവിലയുടെ മുന്നേറ്റം. രാജ്യാന്തര വിപണിയുടെ ചുവടുപിടിച്ച് കേരളത്തിലും വില കുതിച്ചുയർന്നു.

ഗ്രാമിന് 40 രൂപ വർധിച്ച് വില 9,150 രൂപയും പവന് 320 രൂപ ഉയർന്ന് 73,200 രൂപയുമായി. ഇന്നു രാവിലെ ഗ്രാമിന് 5 രൂപയും പവന് 40 രൂപയും കൂടിയിരുന്നു.

രാവിലെ ഗ്രാമിന് 5 രൂപ വർധിച്ച 18 കാരറ്റ് സ്വർണവില ഉച്ചയ്ക്ക് 35 രൂപ ഉയർന്ന് 7,540 രൂപയിലെത്തി. വെള്ളിക്ക് ഇന്ന് കൂടിയത് ഒരു രൂപ; ഗ്രാമിന് വില 123 രൂപയായി.
ഔൺസിന് 3,332 ഡോളർ വരെ താഴ്ന്ന രാജ്യാന്തരവില ഉച്ചയോടെ 3,350 ഡോളർ മറികടന്ന പശ്ചാത്തലത്തിലാണ് കേരളത്തിലും വില മാറിയത്.

അമേരിക്കയിൽ ഈ മാസം തന്നെ അടിസ്ഥാന പലിശനിരക്ക് കുറച്ചേക്കുമെന്ന കേന്ദ്രബാങ്കായ ഫെഡറൽ റിസർവിന്റെ ഗവർണർ ക്രിസ്റ്റഫർ വോളറുടെ പ്രസ്താവനയാണ് രാജ്യാന്തര സ്വർണവിലയുടെ ഊർജം. യൂറോ, യെൻ, പൗണ്ട് തുടങ്ങി ലോകത്തെ 6 പ്രധാന കറൻസികൾക്കെതിരായ യുഎസ് ഡോളർ ഇൻഡക്സ് 0.40% ഇടിഞ്ഞ് 98.34 നിലവാരത്തിൽ എത്തിയതും സ്വർണത്തിന് ഗുണം ചെയ്തു.
∙ ഡോളർ തളരുന്നത് സ്വർണത്തിന് നേട്ടമാകും
∙ രാജ്യാന്തര സ്വർണ വ്യാപാരം നടക്കുന്നത് ഡോളറിലാണെന്നിരിക്കെ, ഡോളർ തളരുമ്പോൾ സ്വർണം വാങ്ങുന്നതിന്റെ ചെലവ് കുറയും, ഇതു ഡിമാൻഡ് കൂട്ടുകയും വിലയെ മുന്നോട്ട് നയിക്കുകയും ചെയ്യും.
∙ യുഎസിൽ ഈമാസം അടിസ്ഥാന പലിശനിരക്കിൽ 0.50% ബംപർ ഇളവുണ്ടാകുമെന്നാണ് വിലയിരുത്തൽ.
∙ പലിശ കുറയുന്നത് ഡോളറിനു തിരിച്ചടിയാകും.

സ്വർണവില കൂടുതൽ മുന്നേറുകയും ചെയ്യും.
9 കാരറ്റ് സ്വർണത്തിനും ഇനി ഹോൾമാർക്കിങ്
പരിശുദ്ധി താരതമ്യേന കുറഞ്ഞ 9 കാരറ്റ് സ്വർണത്തെയും ഹോൾമാർക്കിങ്ങിന്റെ പരിധിയിലാക്കാൻ ബ്യൂറോ ഓഫ് ഇന്ത്യൻ സ്റ്റാൻഡേർഡ്സ് (ബിഐഎസ്). നിലവിൽ 24 കെഎഫ്, 24 കെഎസ്, 23 കാരറ്റ്, 22 കാരറ്റ്, 20 കാരറ്റ്, 18 കാരറ്റ്, 14 കാരറ്റ് സ്വർണാഭരണങ്ങൾക്കാണ് ഹോൾമാർക്കിങ് ഉള്ളത്. 
∙ 99.9% സ്വർണം അടങ്ങിയതാണ് 24 കെഎഫ്.
∙ 24 കെഎസിൽ : 99.5%
∙ 22 കാരറ്റ് സ്വർണമാണ് വിപണിയിൽ വ്യാപകം; സ്വർണത്തിന്റെ അളവ് 91.6% (916 സ്വർണം)
∙ 20 കാരറ്റിൽ : 83.3%
∙ 18 കാരറ്റിൽ : 75%
∙ 14 കാരറ്റിൽ : 58.5%
∙ 9 കാരറ്റിൽ 37.5 ശതമാനമേ സ്വർണമുണ്ടാകൂ.

ബാക്കി ചെമ്പ്, വെള്ളി ഉൾപ്പെടെയുള്ള മറ്റ് ലോഹങ്ങളായിരിക്കും.
എന്താണ് 9 കാരറ്റിന്റെ ഗുണം?
പരിശുദ്ധി കുറവാണെങ്കിലും ഇതും സ്വർണം തന്നെയാണ്. ഉപഭോക്താക്കൾക്ക് ആഭരണമായി വാങ്ങി അണിയാം.

സമ്മാനം നൽകാൻ ഉപയോഗിക്കാം. 22, 18 കാരറ്റ് സ്വർണവുമായി വില താരതമ്യേന കുറവായിരിക്കും.

ഉയർന്ന വിലയ്ക്ക് സ്വർണം വാങ്ങാൻ പ്രയാസപ്പെടുന്നവർക്ക് 9 കാരറ്റിൽ തീർത്ത ആഭരണങ്ങളുടെ ലഭ്യത പ്രയോജനകരമാകും.
∙ മറ്റ് ലോഹങ്ങളുടെ അളവും കൂടുതലായിരിക്കുമെന്നതിനാൽ 9 കാരറ്റ് സ്വർണത്തിന് കൂടുതൽകാലം തിളക്കത്തോടെ ഈടുനിൽക്കാനാകും.
∙ ദിവസേന സ്വർണം അണിയുന്നവർക്ക് കൂടുതൽ സുരക്ഷിതമായി ഉപയോഗിക്കാം.
∙ അതേസമയം നിക്ഷേപം, ഭാവിയിലെ സാമ്പത്തികാവശ്യം എന്നീ ലക്ഷ്യത്തോടു കൂടിയാണ് സ്വർണം വാങ്ങുന്നതെങ്കിൽ 9 കാരറ്റ് അനുയോജ്യമല്ല. (Disclaimer: ഈ ലേഖനം ഓഹരി/കടപ്പത്രം/മ്യൂച്വൽഫണ്ട്/ക്രിപ്റ്റോകറൻസി മുതലായവ വാങ്ങാനോ വില്‍ക്കാനോ ഉള്ള നിര്‍ദേശമോ ഉപദേശമോ അല്ല.

ഓഹരി/കടപ്പത്രം/മ്യൂച്വൽഫണ്ട് മുതലായ നിക്ഷേപങ്ങൾ വിപണിയിലെ റിസ്കുകൾക്ക് വിധേയമാണ്. നിക്ഷേപം നടത്തുന്നതിന് മുമ്പ് നിങ്ങള്‍ സ്വയം പഠനങ്ങൾ നടത്തുകയോ ഒരു വിദഗ്ധന്റെ ഉപദേശം തേടുകയോ ചെയ്യുക) …