'മുംബൈയിലെ കണ്ണായ ഭൂമി അദാനി കമ്പനിക്ക്'; എതിർപ്പുമായി കോൺ​ഗ്രസ് എംപി, ദേവനാറിലെ മാലിന്യം നീക്കാൻ 2368 കോടിയുടെ ടെണ്ടർ

<p><strong>മുംബൈ: </strong>ധാരാവി പുനർവികസന പദ്ധതിക്കായി അദാനി ​ഗ്രൂപ്പിന് കുർളയിലെ മദർ ഡയറി ഭൂമി അനുവദിക്കാനുള്ള മഹാരാഷ്ട്ര സർക്കാരിന്റെ തീരുമാനത്തിനെതിരെ കോൺഗ്രസ് എംപി വർഷ ഗെയ്ക്‌വാദ് കുർളയിൽ പ്രതിഷേധ മാർച്ച് സംഘടിപ്പിച്ചു. അഭ്യുദയ ബാങ്ക് ചൗക്കിൽ നിന്ന് മദർ ഡയറി പരിസരത്തേക്ക് നടത്താൻ നിശ്ചയിച്ചിരുന്ന മാർച്ച് മുംബൈ പൊലീസ് അനുമതി നിഷേധിച്ചതിനെ തുടർന്ന് പാതിവഴിയിൽ നിർത്തി. തുടർന്ന് പ്രകടനക്കാർ പ്രധാന ജംഗ്ഷനിൽ കുത്തിയിരിപ്പ് സമരം നടത്തി. മുംബൈയിലുടനീളം വ്യാപകമായ എതിർപ്പ് നിലനിൽക്കുന്നുണ്ടെങ്കിലും സംസ്ഥാന സർക്കാർ അദാനി ഗ്രൂപ്പിന് അനുകൂലമായി പ്രവർത്തിക്കുകയാണെന്ന് എംപി ഗെയ്ക്‌വാദും കോൺഗ്രസ് എംഎൽഎ ജ്യോതി ഗെയ്ക്‌വാദും ആരോപിച്ചു.&nbsp;</p><p>ധാരാവിയുടെ പുനരധിവാസത്തിന്റെ മറവിൽ മുംബൈയിലുടനീളമുള്ള ഭൂമി എന്തിനാണ് അദാനിക്ക് കൈമാറുന്നതെന്ന് ഇവർ ചോദിച്ചു. പ്രദേശവാസികൾക്കൊപ്പം ഉറച്ചുനിൽക്കുമെന്ന് അവർ ഉറപ്പ് നൽകുകയും തുടർപ്രക്ഷോഭം നടത്തുമെന്നും മുന്നറിയിപ്പ് നൽകി. കുർളയിലെ 8 ഹെക്ടർ വിസ്തൃതിയുള്ള മദർ ഡയറി ഭൂമി കൈമാറാനുള്ള തീരുമാനം സംസ്ഥാന മന്ത്രിസഭാ യോഗത്തിലാണ് എടുത്തത്. ഭരണകക്ഷിയായ ശിവസേനയുടെ എംഎൽഎ മംഗേഷ് കുടാൽക്കർ, എംപി വർഷ ഗെയ്ക്‌വാദ് തുടങ്ങിയ പ്രദേശവാസികളുടെയും നേതാക്കളുടെയും നേതൃത്വത്തിൽ മനുഷ്യച്ചങ്ങലകളും റാലികളും ഉൾപ്പെടെയുള്ള പ്രതിഷേധങ്ങൾ ഉണ്ടായിരുന്നിട്ടും, മഹായുതി സർക്കാർ ഭൂമി കൈമാറ്റവുമായി മുന്നോട്ട് പോയി.</p><p>ധാരാവിയുടെ പുനർവികസനത്താൽ കുടിയിറക്കപ്പെട്ട താമസക്കാരെ മാറ്റിപ്പാർപ്പിക്കുന്നതിനായി അദാനി ഗ്രൂപ്പ് മുംബൈയിലുടനീളമുള്ള പ്രധാന പ്ലോട്ടുകളായ കുർളയിലെ മദർ ഡയറി ഭൂമി, ദേവനാർ ഡമ്പിംഗ് ഗ്രൗണ്ട്, മലാഡിന്റെ ചില ഭാഗങ്ങൾ, മുളുന്ദ് എന്നിവയുൾപ്പെടെ ആവശ്യപ്പെട്ടിരുന്നു. പുനരധിവാസ ആവശ്യങ്ങൾക്ക് ഈ പ്ലോട്ടുകൾ നിർണായകമാണെന്ന് കണക്കിലെടുത്ത് സംസ്ഥാന സർക്കാർ ഈ ആവശ്യം അംഗീകരിച്ചു. മുംബൈയിലെ ഇത്രയും മികച്ച ഭൂമി ഒരൊറ്റ സ്വകാര്യ സ്ഥാപനത്തിന് അനുവദിക്കേണ്ടതിന്റെ ആവശ്യകതയെ എംപി ഗെയ്‌ക്‌വാദ് ചോദ്യം ചെയ്തു.&nbsp;</p><p>ധാരാവിയിലെ ദുരിതബാധിത സമൂഹങ്ങളെ പിന്തുണയ്ക്കുന്നതിനുള്ള തന്റെ പ്രതിബദ്ധത ആവർത്തിക്കുകയും ചെയ്തു. അതിനിടെ, ദേവ്നാർ ഡമ്പിംഗ് ഗ്രൗണ്ടിൽ 2,368 കോടി രൂപയിലധികം വിലമതിക്കുന്ന മാലിന്യ സംസ്കരണ പദ്ധതിക്കായി ബിഎംസി ബുധനാഴ്ച ടെൻഡർ ക്ഷണിച്ചു. 185 ലക്ഷം ടൺ മാലിന്യങ്ങളുടെ ജൈവ സംസ്കരണവും വേർതിരിച്ച വസ്തുക്കളുടെ സംസ്കരണവും ഉൾപ്പെടുന്നതാണ് പദ്ധതി. സൈറ്റിലെ ഏകദേശം 110 ഹെക്ടർ ഭൂമിയുടെ പുനരുദ്ധാരണവും ഇതിൽ ഉൾപ്പെടുന്നു. ഖരമാലിന്യ സംസ്കരണത്തിനായി ബിഎംസി സമീപ വർഷങ്ങളിൽ അവതരിപ്പിച്ച ഏറ്റവും വലിയ ടെൻഡറുകളിൽ ഒന്നാണിത്. ദേവ്നാറിലെ ഈ സ്ഥലം ധാരാവി പുനർവികസന പദ്ധതിക്കായി (ഡിആർപി) ഉപയോഗിക്കും. 311 ഏക്കർ ഭൂമിയിൽ 136 ഏക്കർ മാത്രമേ ബിഎംസി കൈവശം വച്ചിട്ടുള്ളൂ.</p>



…