ഉടമകൾക്ക് അപ്രതീക്ഷിത പ്രഹരം നൽകി കാർ ഭീമൻ! വില കൂടുന്നത് ലക്ഷങ്ങൾ, വാങ്ങുന്നെങ്കിൽ ഉടൻ വേണം!

പ്രമുഖ ജർമ്മൻ ആഡംബര കാർ നിർമ്മാതാക്കളായ മെഴ്‌സിഡസ് ബെൻസ്, ഇന്ത്യൻ വിപണിയിലെ വാഹന നിരയിലെ വിലയിൽ ഒരു വലിയ അപ്‌ഡേറ്റ് പ്രഖ്യാപിച്ചു. മെഴ്‌സിഡസ്-ബെൻസ് ഇന്ത്യ തങ്ങളുടെ മുഴുവൻ മോഡൽ ശ്രേണിയിലും വില വർദ്ധനവ് പ്രഖ്യാപിച്ചു. കമ്പനി പങ്കിട്ട വിവരങ്ങൾ അനുസരിച്ച്, മെഴ്‌സിഡസ് ബെൻസ് ഇന്ത്യയിൽ തങ്ങളുടെ കാറുകളുടെ വില രണ്ട് ഘട്ടങ്ങളായി വർധിപ്പിക്കും. ഇതിൽ ആദ്യ വർധന ജൂൺ 1 മുതലും രണ്ടാമത്തെ വർധന സെപ്റ്റംബർ 1 മുതലും നടപ്പിലാക്കും. മെഴ്‌സിഡസ് ബെൻസിന്റെ ഈ തീരുമാനത്തിനുശേഷം കാറുകളുടെ വില 90,000 രൂപയിൽ നിന്ന് ഏകദേശം 12 ലക്ഷം രൂപയായി ഉയരുമെന്നാണ് റിപ്പോർട്ടുകൾ. 

ആദ്യ ഘട്ടത്തിൽ, അതായത് ജൂൺ 1 മുതൽ, കമ്പനിയുടെ പോർട്ട്‌ഫോളിയോയിൽ ഉൾപ്പെടുത്തിയിട്ടുള്ള സി-ക്ലാസ്, ഇ-ക്ലാസ്, ജിഎൽസി, ജിഎൽഇ, ജിഎൽഎസ്, ഇക്യുഎസ്, മേബാക്ക് എസ്-ക്ലാസ് എന്നിവയുടെ തിരഞ്ഞെടുത്ത വകഭേദങ്ങളുടെ വില വർദ്ധിപ്പിക്കുമെന്ന് മെഴ്‌സിഡസ് ബെൻസ് പ്രസ്താവനയിൽ പറഞ്ഞു. ഇതിൽ കമ്പനിയുടെ എൻട്രി ലെവൽ മോഡൽ സി-ക്ലാസ് മുതൽ ഉയർന്ന മോഡൽ എസ്-ക്ലാസ് വരെ ഉൾപ്പെടുന്നു. 2025 സെപ്റ്റംബർ 1 മുതൽ രണ്ടാം ഘട്ടത്തിൽ എല്ലാ മോഡലുകളുടെയും വില വർധിപ്പിക്കുമെന്ന് കമ്പനി പ്രഖ്യാപിച്ചു. കാർ വാങ്ങുന്നവർക്ക് പുതിയ കാർ വാങ്ങാൻ സമയം ലഭിക്കുന്നതിനായി കമ്പനി ഘട്ടം ഘട്ടമായി വില വർധിപ്പിക്കുന്നുവെന്നും അതിനാൽ ഉപഭോക്താക്കൾക്ക് പെട്ടെന്നുള്ള വിലവർദ്ധനവ് നേരിടേണ്ടിവരില്ല എന്നും മെഴ്‌സിഡസ്-ബെൻസ് പറയുന്നു.

ചെലവ് വർദ്ധനവിന്റെ ഒരു ചെറിയ ഭാഗം മാത്രമേ ഉപഭോക്താക്കൾക്ക് കൈമാറുന്നുള്ളൂവെന്നും മെഴ്‌സിഡസ് ബെൻസ് പറയുന്നു. സി-ക്ലാസിനാണ് ഏറ്റവും കുറഞ്ഞ വില വർദ്ധനവ്,  90,000 രൂപയോളം ഈ മോഡലിന് കൂടും. ഈ മോഡലിന്‍റെ വില ഇനി 60.3 ലക്ഷം മുതൽ ആരംഭിക്കും. മെഴ്‌സിഡസ്-മേബാക്ക് എസ്-ക്ലാസിന് പരമാവധി വില വർദ്ധനവ് 12.2 ലക്ഷം രൂപയാണ്. ഇപ്പോൾ വില 3.60 കോടി രൂപയാണ്. എല്ലാ വിലകളും എക്സ്-ഷോറൂം വിലകൾ ആണ്. 

ചെലവിലെ വർദ്ധനവാണ് വില കൂടുന്നതിന്‍റെ കാരണമായി കമ്പനി പറയുന്നത്. കഴിഞ്ഞ നാല് മാസത്തിനിടെ യൂറോയ്‌ക്കെതിരായ ഇന്ത്യൻ രൂപയുടെ വിദേശനാണ്യ മൂല്യം ഏകദേശം 10 ശതമാനം കുറഞ്ഞു. ഇതുമൂലം കംപ്ലീറ്റ് ബിൽറ്റ് യൂണിറ്റ് (CUB) മോഡലും കംപ്ലീറ്റ് നോക്ക്ഡ് ഡൗൺ (CKD) റൂട്ടും വഴി ഇന്ത്യയിലേക്ക് കൊണ്ടുവരുന്ന കാറുകളുടെ അസംബ്ലിയുടെയും ഘടകങ്ങളുടെയും ഇറക്കുമതി ചെലവ് വർദ്ധിച്ചുവെന്നും കമ്പനി പറയുന്നു. ഇന്ത്യയിൽ പ്രാദേശിക ഉൽപ്പാദനം വർദ്ധിപ്പിച്ചുകൊണ്ട് കാറുകളുടെ വില കുറയ്ക്കാൻ കമ്പനി എല്ലാ ശ്രമങ്ങളും നടത്തിയിട്ടുണ്ടെന്നും എന്നാൽ ഉപഭോക്താക്കളിൽ ചില അധിക ഭാരം ചുമത്തേണ്ടത് അത്യാവശ്യമായിത്തീർന്നിരിക്കുന്നുവെന്നും മെഴ്‌സിഡസ്-ബെൻസ് പറയുന്നു.

അതേസമയം മെഴ്‌സിഡസ്-ബെൻസ് ഫിനാൻഷ്യൽ സർവീസസിന് കീഴിൽ, കുറഞ്ഞ പലിശ നിരക്കുകൾ, കുറഞ്ഞ ഇഎംഐകൾ, ഭാഗിക ഉടമസ്ഥാവകാശം തുടങ്ങി നിരവധി സൌകര്യങ്ങൾ കമ്പനി വാഗ്‍ദാനം ചെയ്യുന്നു.

…