.news-body p a {width: auto;float: none;}
തിരുവനന്തപുരം: കേരള നിയമസഭാ അന്താരാഷ്ട്ര പുസ്‌തകോത്സവത്തിന്റെ മൂന്നാം പതിപ്പ് 2025 ജനുവരി എഴ് മുതൽ 13 വരെയുള്ള തീയതികളിലായി നടക്കും. പുസ്‌തകോത്സവത്തിന്റെ ഉദ്ഘാടനം ജനുവരി എഴ് രാവിലെ 10.30ന് ആർ. ശങ്കരനാരായണൻ തമ്പി മെമ്പേഴ്സ് ലോഞ്ചിൽ മുഖ്യമന്ത്രി പിണറായി വിജയൻ നിർവ്വഹിക്കും. പ്രസ്തുത ചടങ്ങിൽ കർണ്ണാടക സ്പീക്കർ യു.ടി. ഖാദർ, പ്രശസ്ത സാഹിത്യകാരൻ ദേവദത്ത് പട്നായിക് എന്നിവർ മുഖ്യാതിഥികളായിരിക്കും. വിവിധ വകുപ്പുമന്ത്രിമാർ, ഡെപ്യൂട്ടി സ്പീക്കർ ചിറ്റയം ഗോപകുമാർ, പ്രതിപക്ഷ നേതാവ് വി. ഡി. സതീശൻ, പ്രതിപക്ഷ ഉപനേതാവ് പി. കെ. കുഞ്ഞാലിക്കുട്ടി, തിരുവനന്തപുരം ജില്ലാ കളക്ടർ അനുകുമാരി ഐ.എ.എസ് എന്നിവരും പങ്കെടുക്കും.
കല, സാഹിത്യം, സാംസ്‌കാരികം തുടങ്ങിയ മേഖലകളിലെ സമഗ്രസംഭാവനയ്ക്ക് നിയമസഭ നൽകുന്ന നിയമസഭാ അവാർഡ് പ്രശസ്ത സാഹിത്യകാരൻ എം.മുകുന്ദന് സമ്മാനിക്കും. രാഷ്ട്രീയ കലാ സാഹിത്യ സാംസ്‌കാരിക സിനിമാ മേഖലകളിലെ പ്രമുഖ വ്യക്തിത്വങ്ങളെ പങ്കെടുപ്പിച്ചുകൊണ്ടാണ് ഇത്തവണത്തെ കേരള നിയമസഭാ അന്താരാഷ്ട്ര പുസ്‌തകോത്സവം സംഘടിപ്പിക്കുന്നതെന്ന് സംഘാടകർ അറിയിച്ചു.
വിവിധ സെഗ്‌മെന്റുകളിലായി പി. സായിനാഥ്, യൂസഫ് തരിഗാമി, ബൃന്ദ കാരാട്ട്, സോയ ഹസ്സൻ, ഡോ. ശ്രീനിവാസ റാവു, ഡോ. സി. മൃണാളിനി, ആദിത്യ മുഖർജി, ദേവൻ രാമചന്ദ്രൻ, ടി. പത്മനാഭൻ, ശശി തരൂർ, ജോസി ജോസഫ്, എം. മുകുന്ദൻ, മധുസൂദനൻ നായർ, പ്രഭാവർമ്മ, എം.വി. ഗോവിന്ദൻ മാസ്റ്റർ, പി. കെ. പാറക്കടവ്, സുനിൽ പി. ഇളയിടം, വിദ്യാധരൻ മാഷ്, സന്തോഷ് ജോർജ് കളങ്ങര, ടി. ഡി. രാമകൃഷ്ണൻ, എൻ. എസ്. മാധവൻ, ബെന്യാമിൻ, എസ്. ഹരീഷ്, സുഹാരു നുസൈബ കണ്ണനാരി, ഹോർമിസ് തരകൻ, ജോസി ജോസഫ്, വി. കെ. ശ്രീരാമൻ, സുഭാഷ് ചന്ദ്രൻ, മനു എസ്. പിള്ള, മേതിൽ ദേവിക, ദിവ്യ. എസ്. അയ്യർ, അഷ്ടമൂർത്തി, കെ. വി. മോഹൻകുമാർ, അശോകൻ ചരുവിൽ, ഒ. വി. ഉഷ, ബീന ചന്ദ്രൻ, ഫാ. ബോബി ജോസ് കട്ടിക്കാട്, കെ. സി. നാരായണൻ, ജി. ആർ. ഇന്ദുഗോപൻ, വിനിൽ പോൾ, എ. എം. ഷിനാസ്, ഇ. സന്തോഷ് കുമാർ, അംബികസുതൻ മാങ്ങാട്, പ്രിയ എ. എസ്, മുഹമ്മദ് അബ്ബാസ്, അഖിൽ പി. ധർമ്മജൻ, വസന്തകുമാർ സാംബശിവൻ, ഫ്രാൻസിസ് നൊറോണ, ജിസ ജോസ്, ജോസഫ് അന്നംകുട്ടി ജോസ്, സി. ജെ. കുട്ടപ്പൻ, ബിനീഷ് പുതുപ്പണം, സുസ്‌മേഷ് ചന്ദ്രോത്ത്, അശ്വതി ശ്രീകാന്ത്, ബിപിൻ ചന്ദ്രൻ, രമേഷ് പിഷാരടി, രഞ്ജു രഞ്ചിമാർ, എ. എം. ബഷീർ തുടങ്ങിയ ഒട്ടേറെ ശ്രദ്ധേയരായ എഴുത്തുകാരും രാഷ്ട്രീയ സാംസ്‌കാരികപ്രവർത്തകരും പങ്കെടുക്കും.
250ലധികം സ്റ്റോളുകളിലായി 150ലധികം ദേശീയ അന്തർദേശീയ പ്രസാധകരാണ് ഇത്തവണ പുസ്‌തകോത്സവത്തിൽ പങ്കെടുക്കുക. പാനൽ ചർച്ചകൾ , KLIBE DIALOGUES, KLIBF TALK, എന്റെ എഴുത്തിന്റെയും വായനയുടെയും ജീവിതം, MEET THE AUTHOR, കവിയരങ്ങ്, കഥാപ്രസംഗം, കവിയും കവിതയും, കഥ പറയും പാട്ടുകൾ, കഥയരങ്ങ്, ഏകപാത്രനാടകം, ഭാവിയുടെ വാഗ്ദാനം, സിനിമയും ജീവിതവും തുടങ്ങിയ പല സെഗ്‌മെന്റുകളിലായി എഴുപതിലധികം പരിപാടികൾ സംഘടിപ്പിക്കും. 350ഓളം പുസ്തകപ്രകാശനങ്ങളും 60 ൽ അധികം പുസ്തകചർച്ചകളും നടക്കും.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
പുസ്‌തകോത്സവദിനങ്ങളിൽ വൈകുന്നേരം 7.00 മണി മുതൽ വിവിധ മാദ്ധ്യമസ്ഥാപനങ്ങളുടെ നേതൃത്വത്തിൽ മെഗാഷോ, കുട്ടികൾക്കായി ‘സ്റ്റുഡന്റ്സ് കോർണർ’ എന്നിവയും ഒരുക്കുന്നുണ്ട്. വിദ്യാർത്ഥികൾക്ക് അവർ രചിച്ച പുസ്തകങ്ങൾ പ്രകാശനം ചെയ്യാനുള്ള വേദിയാണ് ‘സ്റ്റുഡന്റ്സ് കോർണർ’. വിദ്യാർത്ഥികൾക്ക് ചെറിയ സറ്റേജ് പ്രോഗ്രാമുകൾ ചെയ്യാൻ ഇടവേളകളിൽ അവസരം നൽകും. ഇതിനായുള്ള രജിസ്‌ട്രേഷൻ നടപടികൾ പുരോഗമിച്ചുവരികയാണെന്ന് സംഘാടകർ അറിയിച്ചു.
ഇത്തവണ ഒരു ലക്ഷത്തോളം വിദ്യാർത്ഥികളെയാണ് പുസ്തകോത്സവത്തിന് പ്രതീക്ഷിക്കുന്നത്. മാജിക് ഷോ, പപ്പറ്റ് ഷോ, തത്സമയ ക്വിസ് മത്സരങ്ങൾ, ഗെയിമുകൾ തുടങ്ങിയ പരിപാടികൾ കൂടി കുട്ടികൾക്കായി ഒരുക്കുന്നുണ്ട്. പുസ്‌തകോത്സവം സന്ദർശിക്കാൻ എത്തുന്ന വിദ്യാർത്ഥികൾക്ക് നിയമസഭാഹാൾ, മ്യൂസിയങ്ങൾ, മൃഗശാല തുടങ്ങിയവ സൗജന്യമായി സന്ദർശിക്കാനുള്ള പാക്കേജും ഒരുക്കും. കൂടാതെ കെ.എസ്.ആർ.ടി.സി. യുടെ ഡബിൾ ഡെക്കർ ബസ്സിൽ സിറ്റി റൈഡും ക്രമീകരിച്ചിട്ടുണ്ട്. പുസ്‌തകോത്സവത്തിന്റെ സ്റ്റാളുകളിൽ നിന്നും വാങ്ങുന്ന 100 രൂപയിൽ കുറയാത്ത ഓരോ പർച്ചേസിനും നൽകുന്ന സമ്മാന കൂപ്പണുകൾ നറുക്കിട്ട് എല്ലാദിവസവും 20 വിജയികൾക്ക് 500 രൂപയുടെ പുസ്തകകൂപ്പൺ നൽകും. ജനുവരി 13ന് സമാപനചടങ്ങിൽ ചലച്ചിത്ര താരങ്ങളായ പ്രകാശ് രാജ്, ഇന്ദ്രൻസ് എന്നിവർ മുഖ്യാതിഥികളാകും.
