മലപ്പുറം: നിപ രോഗലക്ഷണമുള്ള പത്തുപേരുടെ സ്രവ സാമ്പിളുകൾ ശേഖരിച്ചു. മഞ്ചേരി മെഡിക്കൽ കോളേജ് ആശുപത്രിയിൽ നിന്നാണ് സാമ്പിളുകളെടുത്തത്. കോഴിക്കോട് ലാബിലേക്ക് അയച്ച സാമ്പിളുകളുടെ ഫലം ഇന്ന് വൈകിട്ടോടെ പുറത്തുവരും.
വണ്ടൂരിനടുത്ത് നടുവത്ത് നിപ ബാധിച്ച് മരിച്ച യുവാവുമായി ബന്ധപ്പെട്ടവരുടെ സമ്പർക പട്ടിക ആരോഗ്യവകുപ്പ് ഇന്നലെ പുറത്തുവിട്ടിരുന്നു. ഇതുവരെ 151 പേരാണ് പ്രാഥമിക സമ്പർക്ക പട്ടികയിൽ ഉള്ളത്. ഇതിൽ രോഗലക്ഷണമുള്ള പത്ത് പേരുടെ സാമ്പിളുകളാണ് ഇപ്പോൾ എടുത്തിരിക്കുന്നത്.
കൂടാതെ, ബൊബൈൽ ലൊക്കേഷൻ കേന്ദ്രീകരിച്ച് യുവാവിന്റെ കോൺടാക്‌ട് ലിസ്റ്റ് തയ്യാറാക്കിയിട്ടുണ്ട്. ബംഗളൂരുവിൽ നിന്നെത്തിയ ശേഷം യുവാവ് എവിടെയൊക്കെ പോയിരുന്നു എന്നും ആരോഗ്യവകുപ്പ് പരിശോധിക്കുന്നുണ്ട്. ബംഗളൂരുവിൽ വച്ച് രണ്ടുമാസം മുമ്പ് മഞ്ഞപ്പിത്തം ബാധിച്ച യുവാവ് നാട്ടിലെത്തി ചികിത്സ തേടിയിരുന്നു. രോഗം ഭേദമായി മടങ്ങിയെങ്കിലും കാലിന് പരിക്കേറ്റതിനെ തുടർന്നാണ് കഴിഞ്ഞയാഴ്‌ച വീണ്ടും നാട്ടിലെത്തിയത്. പിന്നീട് പനി ബാധിച്ച് ചികിത്സ തേടുകയായിരുന്നു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
യുവാവിന്റെ മരണം നിപ ബാധിച്ചാണെന്ന് സ്ഥിരീകരിച്ചതോടെ മലപ്പുറം ജില്ലയിലെ വിവിധയിടങ്ങളിൽ നിയന്ത്രണങ്ങൾ ഏർപ്പെടുത്തിയിട്ടുണ്ട്. മലപ്പുറം ജില്ലയിൽ ആളുകൾ പുറത്തിറങ്ങുമ്പോൾ നിർബന്ധമായും മാസ്‌ക് ധരിക്കണമെന്ന് ജില്ലാ കളക്‌ടർ ഉത്തരവിറക്കി. തിരുവാലി പഞ്ചായത്തിലെ നാല്, അഞ്ച്, ആറ്, ഏഴ് വാർഡുകൾ, മമ്പാട് പഞ്ചായത്തിലെ ഏഴാം വാർഡ് എന്നിവ കണ്ടെയ്‌ൻമെന്റ് സോണായി ജില്ലാ കളക്‌ടർ വി ആർ വിനോദ് പ്രഖ്യാപിച്ചു.
