മികച്ച ശബ്ദമിശ്രണത്തിന് സംസ്ഥാന ചലച്ചിത്രപുരസ്കാരം നേടിയതിലെ സന്തോഷം പങ്കുവെച്ച് റസൂൽ പൂക്കുട്ടി. ആടുജീവിതം എന്ന ചിത്രത്തിലൂടെയാണ് റസൂലിന് ഈ പുരസ്കാരം സ്വന്തമായത്. ശരത് മോഹനുമായാണ് അദ്ദേഹം ആടുജീവിതത്തിലെ പുരസ്കാരം നേടിയത്. പുരസ്കാരലബ്ദിയിൽ റസൂൽ പൂക്കുട്ടി സോഷ്യൽ മീഡിയയിലൂടെ നന്ദി പ്രകടിപ്പിച്ചു.
തന്റെ കരിയറിലുടനീളം പിടിതരാതിരുന്ന ഒരു പുരസ്കാരത്തെ ഒടുവിൽ കൈപ്പിടിയിലൊതുക്കിയിരിക്കുന്നു എന്നാണ് അദ്ദേഹം കുറിച്ചത്. സൗണ്ട് എന്‍ജിനിയർ വിജയകുമാറിനെ റസൂൽ പൂക്കുട്ടി പോസ്റ്റിൽ എടുത്തുപറഞ്ഞിട്ടുണ്ട്. ‘നിങ്ങളില്ലായിരുന്നെങ്കിൽ ഇതൊന്നും സാധ്യമാവുമായിരുന്നില്ല’ എന്നാണ് അദ്ദേഹത്തേക്കുറിച്ച് റസൂൽ പൂക്കുട്ടി പറഞ്ഞത്. പുരസ്കാര ജേതാക്കളായ പൃഥ്വിരാജ്, ബ്ലെസി, കെ.ആർ. ഗോകുൽ, സുനിൽ കെ.എസ്., രഞ്ജിത് അമ്പാടി എന്നിവരെ പോസ്റ്റിൽ മെൻഷൻ ചെയ്തിട്ടുമുണ്ട് പൂക്കുട്ടി.
മികച്ച നടനും സംവിധായകനുമുൾപ്പെടെയുള്ള സംസ്ഥാന ചലച്ചിത്ര പുരസ്കാരങ്ങളാണ് ആടുജീവിതം നേടിയത്. സുനിൽ കെ.എസ്. (ഛായാഗ്രഹണം), ബ്ലെസി (അവലംബിത തിരക്കഥ), രഞ്ജിത് അമ്പാടി (മേക്കപ്പ്), കെ.ആർ. ഗോകുൽ (പ്രത്യേക ജൂറി പരാമർശം) എന്നിവയാണ് ആടുജീവിതം കരസ്ഥമാക്കിയ മറ്റുപുരസ്കാരങ്ങൾ.
പൃഥ്വിരാജിന്റെ കരിയറിലെ തന്നെ ഏറ്റവും വലിയ സിനിമയാണ് ആടുജീവിതം. 2008-ൽ ആരംഭിച്ച ‘ആടുജീവിതം’ വർഷങ്ങളുടെ തയ്യാറെടുപ്പുകൾക്കൊടുവിൽ 2018-ലായിരുന്നു ചിത്രീകരണം ആരംഭിച്ചത്. ഏറ്റവുമധികം നാളുകൾ നീണ്ടുപോയ ചിത്രത്തിന്റെ ഷൂട്ടിങ് കഴിഞ്ഞ വർഷം ജൂലായ് 14-നാണ് പൂർത്തിയായത്. ജോർദാനിലായിരുന്നു ചിത്രത്തിന്റെ മുഖ്യപങ്കും ഷൂട്ട് ചെയ്തത്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
