ടോം ആൻഡ് ജെറി കോമഡിയല്ല, വയലൻസ്; ഈ കാർട്ടൂണാണ് തന്റെ പല ആക്ഷൻരം​ഗങ്ങൾക്കും പ്രചോദനമെന്ന് അക്ഷയ്

പിങ്ക് വില്ലയ്ക്ക് നൽകിയ അഭിമുഖത്തിൽ ഖേൽ ഖേൽ മേം എന്ന ചിത്രത്തിലെ മറ്റൊരു പ്രധാനവേഷത്തിലെത്തുന്ന ഫർദീൻ ഖാനും അക്ഷയ് കുമാറിനൊപ്പമുണ്ടായിരുന്നു. അഭിമുഖം പുരോ​ഗമിക്കുന്നതിനിടെ ടോം ആൻഡ് ജെറിയോടുള്ള തന്റെ ഇഷ്ടം ഫർദീൻ ഖാൻ തുറന്നുപറഞ്ഞു. ഈ അവസരത്തിലാണ് ടോം ആൻഡ് ജെറിയിലുള്ളത് തമാശയല്ല, മറിച്ച് അക്രമമാണെന്ന് അക്ഷയ് കുമാർ അഭിപ്രായപ്പെട്ടത്. തന്റെ പല സംഘട്ടനരം​ഗങ്ങളും ടോം ആൻഡ് ജെറിയിൽനിന്ന് പ്രചോദനംകൊണ്ടിട്ടുണ്ടെന്നും അക്ഷയ് കുമാർ പറഞ്ഞു.

“ടോം ആൻഡ് ജെറി ഒരിക്കലും തമാശയല്ല. അത് അക്രമമാണ്. ഇന്ന് ഞാൻ നിങ്ങളോടൊരു രഹസ്യം പറയാം. കരിയറിൽ എത്രയോ സംഘട്ടനരം​ഗങ്ങളിൽ ഞാൻ അഭിനയിച്ചിരിക്കുന്നു. അതിൽ പലതും ടോം ആൻഡ് ജെറിയിൽനിന്ന് കടംകൊണ്ടതാണ്. മുൻപ് ഒരു ചിത്രത്തിൽ ചെയ്ത ഹെലികോപ്റ്റർ രം​ഗം മുഴുവൻ ആ കാർട്ടൂണിൽനിന്നെടുത്തതാണ്. നാഷണൽ ജ്യോ​ഗ്രഫിക്കിൽനിന്ന് മറ്റൊരാശയമെടുത്ത് ചെയ്തിരുന്നു. എന്തൊക്കെ പറഞ്ഞാലും ടോം ആൻഡ് ജെറിയിൽ ചെയ്യുന്നതുപോലെ അവിശ്വസനീയമായ ആക്ഷൻ രം​ഗങ്ങൾ വേറെവിടേയും കാണാൻ കഴിയില്ല.” അക്ഷയ് കുമാർ വ്യക്തമാക്കി.

മുദാസർ അസീസാണ് ഖേൽ ഖേൽ മേം സംവിധാനംചെയ്യുന്നത്. വാണി കപൂർ, പ്ര​ഗ്യാ ജയ്സ്വാൾ, ആമി വിർക്ക്, ആദിത്യ സീൽ എന്നിവരാണ് മറ്റുപ്രധാനവേഷങ്ങളിൽ. ടി സീരീസ് ഫിലിംസ്, വക്കാവൂ ഫിലിംസ്, വൈറ്റ് വേൾഡ് പ്രൊഡക്ഷൻസ് എന്നിവർ ചേർന്നാണ് ചിത്രത്തിന്റെ നിർമാണം.