വിവാഹം നേരത്തെയാക്കിയ വാശി,അമിതാഭ് ബച്ചൻ്റെ 'നിബന്ധനകൾ'; സിനിമയിൽനിന്ന് വിട്ടുനിന്നതിനെപ്പറ്റി ജയ

തങ്ങൾ ഒരുമിച്ച് ചെയ്ത ”സഞ്ജീർ” എന്ന സിനിമയുടെ വിജയത്തിന് ശേഷം ഒരു യാത്ര പോകേണ്ടതുണ്ടായിരുന്നു എന്നും വിവാഹത്തിന് മുൻപ് അവധിയാഘോഷിക്കാൻ ഹരിവംശ് റായ് ബച്ചൻ അനുവദിക്കാത്തതിനാൽ വിവാഹം നേരത്തെയാക്കാൻ താനും അമിതാഭ് ബച്ചനും തീരുമാനിച്ചുവെന്നും ജയാ ബച്ചൻ പറഞ്ഞു. വിവാഹശേഷം ജോലിയിലും കരിയറിലും താൻ ഏറെ സമയം ചെലവിടുന്നതിൽ അമിതാഭ് ബച്ചന് ഇഷ്ടക്കേടുണ്ടായിരുന്നുവെന്നും എല്ലാ ദിവസവും ഒമ്പത് മുതൽ അഞ്ച് മണി വരെ ജോലി ചെയ്യുന്ന ഒരു ഭാര്യയെ തനിക്ക് വേണ്ടെന്ന് വിവാഹത്തിന് മുൻപേ അമിതാഭ് ബച്ചൻ പറഞ്ഞിരുന്നതായും ജയാ ബച്ചൻ വെളിപ്പെടുത്തി. തനിക്ക് താരതമ്യേന ഷൂട്ടിങ് തിരക്ക് കുറവുള്ള സമയത്താണ് കല്യാണം നടത്താൻ പദ്ധതിയിട്ടിരുന്നതെന്നും എന്നാൽ അമിതാഭ് ബച്ചന്റെ വീട്ടുകാരുടെ എതിർപ്പ് മൂലം ചടങ്ങുകൾ നീണ്ടുപോയി എന്നും ജയാ ബച്ചൻ പറഞ്ഞു. ജോലിക്ക് പോകണമെന്നും എന്നാൽ എല്ലാ ദിവസവും വേണ്ടെന്ന് അമിതാഭ് ബച്ചൻ പറഞ്ഞതായും ജയാ ബച്ചൻ കൂട്ടിച്ചേർത്തു.

ചെറുമകൾ നവ്യ നന്ദയുടെ പോഡ്‌കാസ്റ്റായ ‘വാട്ട് ദ ഹെൽ നവ്യ’യിലൂടെയായിരുന്നു താരത്തിൻ്റെ പ്രതികരണം. വിവാഹശേഷം അമിതാഭ് ബച്ചൻ സിനിമയിൽ പുതിയ ഉയരങ്ങൾ കീഴടക്കി. ജയാ ബച്ചൻ സിനിമയിൽ നിന്നും ഇടവേളയുമെടുത്തു.

ശ്വേത ബച്ചൻ, അഭിഷേക് ബച്ചൻ എന്നിവരാണ് മക്കൾ. നിഖിൽ നന്ദയാണ് ശ്വേതയുടെ ഭർത്താവ്. ഇവർക്ക് അ​ഗസ്ത്യ നന്ദ, നവ്യ നവേലി നന്ദ എന്നിവരാണ് മക്കൾ. നടി ഐശ്വര്യ റായിയാണ് അഭിഷേക് ബച്ചന്റെ ഭാര്യ. ആരാധ്യയാണ് ഇവരുടെ മകൾ.