കങ്കണയും ആലിയയുമല്ല, 2024-ൽ ഇന്ത്യയിൽ ഏറ്റവും ഉയർന്ന പ്രതിഫലം വാങ്ങിയ നടി ദീപികയെന്ന് റിപ്പോർട്ട്

ഒരു സിനിമയ്ക്ക് 15 മുതൽ 30 കോടി രൂപവരെയാണ് ദീപികയുടെ പ്രതിഫലമെന്നാണ് റിപ്പോർട്ട്. കങ്കണയാണ് പട്ടികയിൽ രണ്ടാമത്. 15 മുതൽ 27 കോടിവരെയാണ് എംപി കൂടിയായ താരത്തിന്റെ ഫീസ്. 15 മുതൽ 25 കോടി വരെയാണ് മൂന്നാം സ്ഥാനത്തുള്ള പ്രിയങ്കാ ചോപ്ര വാങ്ങിയ പ്രതിഫലം. പട്ടികയിൽ നാലും അഞ്ചും സ്ഥാനത്തുള്ളത് യഥാക്രമം കത്രീന കൈഫും ആലിയാ ഭട്ടുമാണ്. കത്രീന കൈഫ് ഒരു സിനിമയ്ക്ക് 25 കോടി പ്രതിഫലമായി വാങ്ങുമ്പോൾ ആലിയയുടേത് 20 കോടിയാണ്.

18 കോടി വാങ്ങുന്ന കരീന കപുർ, 15 കോടി വാങ്ങുന്ന ശ്രദ്ധ കപുർ, 14 കോടി പ്രതിഫലം പറ്റുന്ന വിദ്യാ ബാലൻ എന്നിവരാണ് ഇവർക്ക് പിന്നിലുള്ളത്. ഈ ലിസ്റ്റിലെ അവസാന രണ്ട് സ്ഥാനക്കാർ 12 കോടി പ്രതിഫലമുള്ള അനുഷ്ക ശർമയും ഒരു സിനിമയ്ക്ക് 10 കോടി വാങ്ങുന്ന ഐശ്വര്യാ റായിയുമാണെന്നും റിപ്പോർട്ട് പറയുന്നു.

ദീപികയ്ക്കും ആലിയയ്ക്കും വലിയ പ്രോജക്റ്റുകളാണ് കയ്യിലുള്ളത്. നാ​ഗ് അശ്വിൻ സംവിധാനംചെയ്ത് പ്രഭാസ് നായകനാവുന്ന കൽക്കി 2898 എ.ഡി എന്ന ചിത്രമാണ് അതിലൊന്ന്. ചിത്രം ഈ മാസം റിലീസ് ചെയ്യും. ഇതിനുപിന്നാലെ രോഹിത് ഷെട്ടിയുടെ സിങ്കം സീരീസിലെ പുതിയചിത്രം, ഒരു ഹോളിവുഡ് ചിത്രം എന്നിവ താരത്തിന്റേതായി വരാനിരിക്കുന്നു. ജി​ഗ്ര, രൺബീർ കപൂറും വിക്കി കൗശലും ഒന്നിക്കുന്ന ലവ് ആൻഡ് വാർ, സഞ്ജയ് ലീല ഭൻസാലി ചിത്രം എന്നിവയാണ് ആലിയയുടേതായി വരാനിരിക്കുന്നത്.