കാണാൻ അത്ര ഭം​ഗിയില്ലാത്തതുകൊണ്ട് ആദ്യസിനിമയ്ക്കുശേഷം നല്ല അവസരങ്ങൾ ലഭിച്ചില്ല -അല്ലു അർജുൻ

2003-ൽ കെ.രാഘവേന്ദ്ര റാവു സംവിധാനംചെയ്ത ​ഗം​ഗോത്രി എന്ന ചിത്രത്തിലൂടെയാണ് അല്ലു അർജുൻ വെള്ളിത്തിരയിൽ അരങ്ങേറ്റംകുറിച്ചത്. കേരളത്തിൽ ആര്യ എന്ന ചിത്രത്തിലൂടെയാണ് അല്ലു അർജുൻ സുപരിചിതനാവുന്നത്. സുകുമാർ സംവിധാനംചെയ്ത ഈ ചിത്രത്തിന്റെ 20-ാം വാർഷികം അടുത്തിടെ ഹൈദരാബാദിൽ ആഘോഷിച്ചിരുന്നു. ഈ ചടങ്ങിൽവെച്ച് ആദ്യചിത്രം ഹിറ്റായിട്ടും നല്ല സിനിമകൾ തന്നെ തേടിവന്നില്ലെന്ന അല്ലുവിന്റെ വാക്കുകൾ ചർച്ചയായിരിക്കുകയാണ്.

“എന്റെ ആദ്യസിനിമ ​ഗം​ഗോത്രി ഹിറ്റായിരുന്നു. പക്ഷേ കാണാൻ അത്ര ഭം​ഗിയില്ലാത്തതുകൊണ്ട് നല്ല സിനിമകളൊന്നും എന്നെ തേടി വന്നില്ല. ആ ചിത്രം ഒരു ബ്ലോക്ക്ബസ്റ്റർ ആയിരുന്നെങ്കിലും ഒരു കലാകാരനെന്ന നിലയിൽ സ്വയം അടയാളപ്പെടുത്താൻ കഴിയാതിരുന്നത് എൻ്റെ പരാജയമാണ്.“ അല്ലു അർജുൻ പറഞ്ഞു. ​ഗം​ഗോത്രി റിലീസിന് ശേഷം ഹൈദരാബാദിലെ ആർ.ടി.സി ക്രോസ് റോഡിൽ പുതിയ സിനിമകളും കണ്ട് കറങ്ങിനടക്കും. ഇതിനിടയിൽ തിരക്കഥകൾ കേൾക്കുന്നുണ്ടായിരുന്നെങ്കിലും ഒന്നും ശരിയായില്ലെന്നും അല്ലു അർജുൻ കൂട്ടിച്ചേർത്തു.

“ഒരു മാസത്തിനുശേഷം നടനും സുഹൃത്തുമായ തരുണിനൊപ്പം ദിൽ എന്ന നിതിൻ നായകനായ ചിത്രം കാണാൻ പോയിരുന്നു. അവിടെവെച്ചാണ് സുകുമാർ എന്ന നവാ​ഗത സംവിധായകൻ ആര്യ എന്ന ചിത്രത്തിനായി എന്നെ സമീപിച്ചത്. ആര്യ സുകുമാറിന്റെ ആദ്യചിത്രമായിരുന്നെങ്കിലും ആ തിരക്കഥയിൽ അദ്ദേഹം എഴുതിവെച്ചിരിക്കുന്നത് എന്നെ വല്ലാതെ ആകർഷിച്ചു. അമ്മാവനായ ചിരഞ്ജീവിയും ആ തിരക്കഥ കേട്ടിരുന്നു. ആര്യയുടെ 125-ാം ദിനാഘോഷവേളയിൽ ചിരഞ്ജീവിയിൽനിന്ന് ആദരമേറ്റുവാങ്ങാനുമായി. രവി തേജ നായകനായ ഇഡിയറ്റ് എന്ന ചിത്രം കണ്ടപ്പോൾ അതുപോലൊന്ന് ചെയ്യണമെന്ന് വളരെയേറെ ആ​ഗ്രഹിച്ചിരുന്നു. ‘എന്റെ ഇഡിയറ്റാ’ണ് ആര്യ. നന്നായി നൃത്തം ചെയ്യാനാവുമെന്ന് എനിക്ക് ബോധ്യമുണ്ടായിരുന്നു. അത് തെളിയിക്കാൻ ഒരവസരമാണ് വേണ്ടിയിരുന്നത്. തകധിമി തോം എന്ന ​ഗാനത്തിലൂടെ അത് ഞാൻ തെളിയിച്ചു.“ അല്ലു അർജുൻ കൂട്ടിച്ചേർത്തു.

2004-ൽ പുറത്തിറങ്ങിയ ആര്യ വൻ ഹിറ്റായതോടെ 2006-ൽ ഇതേ പേരിൽ ചിത്രം കേരളത്തിലുമെത്തി. മലയാളികളും ഇരുകയ്യും നീട്ടി ചിത്രത്തേയും അല്ലു അർജുനേയും സ്വീകരിച്ചു. അല്ലു അർജുന്റേതായി പിന്നീടുവന്ന ഹാപ്പി, ഹീറോ, കൃഷ്ണ, ബണ്ണി തുടങ്ങിയ ചിത്രങ്ങൾ കേരളത്തിലും ഹിറ്റായതോടെ 2009-ൽ ​ഗം​ഗോത്രി എന്ന ചിത്രം സിംഹക്കുട്ടി എന്ന പേരിൽ മലയാളത്തിലേക്ക് മൊഴിമാറ്റിയെത്തി. പുഷ്പ 2 ആണ് അല്ലു അർജുന്റേതായി വരാനിരിക്കുന്ന ചിത്രം. ഈ വരുന്ന ആ​ഗസ്റ്റ് 15-നാണ് പുഷ്പ 2-ന്റെ റിലീസ് നിശ്ചയിച്ചിരിക്കുന്നത്.