ഇന്ത്യയുടെ പരമാധികാരത്തിനെതിര്, ബ്രിട്ടീഷ് ഹൈ കമ്മീഷണർ പാക് അധിന കശ്മീരിലെത്തിയതിൽ പ്രതിഷേധമറിയിച്ച് ഇന്ത്യ

ദില്ലി: പാക്കിസ്ഥാനിലെ ബ്രിട്ടീഷ് ഹൈ കമ്മീഷണർ പാക് അധിന കശ്മീർ സന്ദർശിച്ചതിൽ ശക്തമായ പ്രതിഷേധം അറിയിച്ച് ഇന്ത്യ. വിദേശ കാര്യ സെക്രട്ടറി ഇന്ത്യയിലെ ബ്രിട്ടീഷ ഹൈ കമ്മീഷണറെയാണ് ശക്തമായ പ്രതിഷേധം അറയിച്ചത്. പാക് അധീന കശ്മീർ ഇന്ത്യയു‍ടെ ഭാഗമെന്നും സന്ദർശനം ഇന്ത്യയുടെ പരമാധികാരത്തിന് എതിരെന്നും വിദേശ കാര്യ സെക്രട്ടറി വ്യക്തമാക്കി. ജനുവരി 10 നാണ് ഇസ്ലാമാബാദിലെ ബ്രിട്ടീഷ് ഹൈക്കമ്മീഷണറും യു കെ വിദേശകാര്യ ഓഫീസ് ഉദ്യോഗസ്ഥനും പാക് അധീന കശ്മീരിൽ സന്ദർശനം നടത്തിയത്. ഈ നടപടി വളരെ പ്രതിഷേധാർഹമാണെന്നും ഇന്ത്യൻ വിദേശകാര്യ മന്ത്രാലയം വാർത്താക്കുറിപ്പിലൂടെ വ്യക്തമാക്കി.

അതിനിടെ പാകിസ്ഥാനിൽ നിന്നും പുറത്തുവരുന്ന മറ്റൊരു വാ‍ർത്ത  അയൽരാജ്യങ്ങൾ തമ്മിലുള്ള സംഘർഷത്തിൽ ഇറാന് പാകിസ്ഥാൻ മുന്നറിയിപ്പ് നൽകി എന്നതാണ്. ഇറാൻ സംയമനം കാണിക്കണമെന്നും സംഘർഷം ഒഴിവാക്കണമെന്നും പാകിസ്ഥാൻ ആവശ്യപ്പെട്ടു. ഇറാനിയൻ പ്രവിശ്യയായ സിയസ്താൻ – ഒ – ബലൂചിസ്ഥാനിൽ ഭീകരരുടെ ഒളിത്താവളങ്ങൾക്കെതിരെ ആക്രമണം നടത്തിയതിന് പിന്നാലെയാണ് പാകിസ്ഥാന്റെ സന്ദേശം. ഇറാൻ പാകിസ്ഥാനിലെ ഭീകര കേന്ദ്രങ്ങൾ ആക്രമിച്ചതിന് ദിവസങ്ങൾക്ക് ശേഷമാണ് പാകിസ്ഥാന്റെ ഭാ​ഗത്തുനിന്ന് പ്രതികാര ആക്രമണം ഉണ്ടായത്. സംയമനം പാലിക്കണമെന്നും സ്ഥിതിഗതികൾ വഷളാക്കുന്ന തുടർനടപടികൾ സ്വീകരിക്കരുതെന്നും പാകിസ്ഥാൻ ഇറാനോട് ആവശ്യപ്പെട്ടതായി  വൃത്തങ്ങൾ അറിയിച്ചു. പാകിസ്ഥാൻ പ്രദേശത്തെ ബലൂചി ഗ്രൂപ്പായ ജെയ്‌ഷ് അൽ – അദ്‌ലിന്റെ ആസ്ഥാനത്തിന് നേരെ നടത്തിയ ആക്രമണത്തിൽ ഗുരുതരമായ പ്രത്യാഘാതങ്ങൾ ഉണ്ടാകുമെന്ന് ടെഹ്‌റാന് മുന്നറിയിപ്പ് നൽകിയതിന് തൊട്ടുപിന്നാലെ ഇറാനിലെ തീവ്രവാദ കേന്ദ്രങ്ങൾക്ക് നേരെ പാകിസ്ഥാനും ആക്രമണം നടത്തിയിരുന്നു. ഓപ്പറേഷനിൽ നിരവധി ഭീകരർ കൊല്ലപ്പെട്ടതായി പാകിസ്ഥാൻ വിദേശകാര്യ മന്ത്രാലയം പ്രസ്താവനയിൽ പറഞ്ഞു. പാകിസ്ഥാൻ ആക്രമണത്തിൽ നാല് കുട്ടികളും മൂന്ന് സ്ത്രീകളും ഉൾപ്പെടെ ഏഴ് പേർ കൊല്ലപ്പെട്ടതായി ഇറാൻ മാധ്യമങ്ങൾ റിപ്പോർട്ട് ചെയ്തു. ഇറാനെ സഹോദര രാജ്യം എന്ന് വിശേഷിപ്പിച്ച ഇസ്ലാമാബാദ്, എല്ലാ ഭീഷണികളിൽ നിന്നും ദേശീയ സുരക്ഷയെ സംരക്ഷിക്കാനും സംരക്ഷിക്കാനുമുള്ള പാകിസ്ഥാന്റെ അചഞ്ചലമായ ദൃഢനിശ്ചയത്തിന്റെ പ്രകടനമാണ് നടപടിയെന്നാണ് ആക്രമണത്തെ വിശേഷിപ്പിച്ചത്.

Last Updated Jan 23, 2024, 9:48 PM IST