ഫ്ളക്സിൽ എൻടിആറിന്റെ ചിത്രത്തിനൊപ്പം ജൂനിയർ എൻടിആറിന്റെ ചിത്രവും; രോഷാകുലനായി ബാലകൃഷ്ണ

എൻ.ടി. രാമറാവുവിന്റെ മകനും തെലുങ്കിലെ സൂപ്പർതാരവുമാണ് ബാലകൃഷ്ണ. പിതാവിന്റെ ഓർമകൾ പുതുക്കി പ്രാർഥിക്കാൻ എൻ.ടി.ആർ ​ഘട്ടിൽ എത്തിയതായിരുന്നു അദ്ദേഹം. ​ഈ വേദിക്ക് പുറത്ത് ആരാധകരും ടി.ഡി.പി അണികളുമെല്ലാം ഫ്ളക്സുകൾ സ്ഥാപിച്ചിരുന്നു. ഇതിൽ ഒരു ഫ്ളക്സിൽ എൻ.ടി. രാമറാവുവിന്റെ ചിത്രത്തിനൊപ്പം കൊച്ചുമകനും നടനുമായ ജൂനിയർ എൻ.ടി.ആറിന്റെ ചിത്രവും ഉൾപ്പെട്ടതാണ് ബാലകൃഷ്ണയെ കോപാകുലനാക്കിയത്.

രാജമൗലി സംവിധാനം ചെയ്ത യമ ദൊങ്ക എന്ന ചിത്രത്തിലെ ഒരു രം​ഗത്തിൽ യമധർമന്റെ വേഷത്തിൽ ജൂനിയർ എൻ.ടി.ആർ എത്തുന്നുണ്ട്. യമധർമന്റെ ലുക്കിലുള്ള ജൂനിയർ എൻ.ടി.ആറിന്റെ ചിത്രത്തിനൊപ്പമാണ് അതേ ലുക്കിലുള്ള എൻ.ടി.ആറിന്റെ ചിത്രവും ഒരേ ഫ്ളക്സിൽ ഉൾപ്പെടുത്തി ഘാട്ടിന് പുറത്ത് സ്ഥാപിച്ചിരുന്നത്. ഈ ചിത്രമാണ് ബാലകൃഷ്ണയെ ചൊടിപ്പിച്ചത്. കാറിൽ നിന്നിറങ്ങിയ ബാലകൃഷ്ണ ഈ ഫ്ലക്സ് കാണുകയും ഉടനടി നീക്കംചെയ്യാൻ ആവശ്യപ്പെടുകയുമായിരുന്നു.

തുടർന്ന് ടി.ഡി.പി പ്രവർത്തകർ ഈ ഫ്ളക്സ് ഘട്ടിൽ നിന്ന് ദൂരേയ്ക്ക് മാറ്റുകയും ചെയ്തു. ഇതിന്റെ ദൃശ്യങ്ങൾ ഇപ്പോൾ എക്സ് ഉൾപ്പെടെയുള്ള സോഷ്യൽ മീഡിയാ പ്ലാറ്റ്ഫോമുകളിൽ വൈറലായിരിക്കുകയാണ്. സഹോദരൻ ഹരികൃഷ്ണയുടെ മകനാണ് ജൂനിയർ എൻ.ടി.ആർ എങ്കിലും ബാലകൃഷ്ണയും ആർ.ആർ.ആർ താരവും തമ്മിലുള്ള സ്വരച്ചേർച്ചയില്ലായ്മ തെലുങ്ക് സിനിമാലോകത്ത് ഏവർക്കും അറിയുന്ന കാര്യമാണ്. ഇതിന് ആക്കംകൂട്ടുന്ന പുതിയ സംഭവമാണ് രാമറാവുവിന്റെ 28-ാം ചരമവാർഷികദിനത്തിൽ അരങ്ങേറിയത്.