പുത്തൻ എംജി ആസ്റ്റർ എത്തി, പുതിയ വേരിയന്‍റും ഫീച്ചറുകളും

ചൈനീസ് വാഹന ബ്രാൻഡായ എംജി മോട്ടോർ ഇന്ത്യ അതിന്റെ ആസ്റ്റർ എസ്‌യുവിയുടെ 2024 മോഡൽ പതിപ്പിനെ വിപണിയിൽ അവതരിപ്പിച്ചു. വാഹനത്തിന് 9.98 ലക്ഷം രൂപ മുതൽ എക്സ്-ഷോറൂം വില ആരംഭിക്കുന്നു. പുതുക്കിയ ശ്രേണി സ്പ്രിന്റ്, ഷൈൻ, സെലക്ട്, ഷാർപ്പ് പ്രോ, പുതുതായി അവതരിപ്പിച്ച സാവി പ്രോ എന്നിങ്ങനെ അഞ്ച് ട്രിമ്മുകളിൽ ലഭ്യമാണ്. എല്ലാ വേരിയന്റുകളിലും 1.5 എൽ നാച്ചുറലി ആസ്പിറേറ്റഡ് പെട്രോൾ എഞ്ചിൻ അവതരിപ്പിക്കുന്നു. ഇത് ശക്തമായ 110 പിഎസും 144 എൻഎമ്മും നൽകുന്നു. പവർട്രെയിൻ ഓപ്ഷനുകളിൽ 5-സ്പീഡ് മാനുവൽ ട്രാൻസ്‍മിഷൻ അല്ലെങ്കിൽ എട്ട് സ്പീഡ് സിവിടി ഗിയർബോക്സ് ഉൾപ്പെടുന്നു.

സ്പ്രിന്‍റ്, ഷൈൻ, സെലക്ട്, ഷാർപ്പ് പ്രോ വകഭേദങ്ങളിൽ ലഭ്യമായ മാനുവൽ ട്രാൻസ്‍മിഷന് യഥാക്രമം 9.98 ലക്ഷം, 11.68 ലക്ഷം, 12.98 ലക്ഷം, 14.40 ലക്ഷം എന്നിങ്ങനെയാണ് വില. എൻഎ പെട്രോൾ-സിവിടി കോമ്പിനേഷൻ സെലക്ട്, ഷാർപ്പ് പ്രോ, സാവി പ്രോ എന്നീ വേരിയന്റുകളോടൊപ്പം വാഗ്ദാനം ചെയ്യുന്നു. ഇവയുടെ വില യഥാക്രമം 13.98 ലക്ഷം രൂപ, 15.68 ലക്ഷം രൂപ, 16.58 ലക്ഷം രൂപ എന്നിങ്ങനെയാണ്. സാംഗ്രിയ കളർ സ്കീമിലുള്ള സാവി പ്രോ സിവിടിക്ക് 16.68 ലക്ഷം രൂപയാണ് വില. കൂടാതെ, 6-സ്പീഡ് ഓട്ടോമാറ്റിക് ഗിയർബോക്‌സുള്ള 1.3 എൽ ടർബോ പെട്രോൾ എഞ്ചിൻ സാവി പ്രോ ട്രിമ്മിനായി മാത്രമായി നീക്കിവച്ചിരിക്കുന്നു. ഇത് 17.89 ലക്ഷം രൂപയ്ക്ക് ലഭ്യമാണ്. ഐവറി, സാങ്രിയ എന്നീ എക്സ്റ്റീരിയർ പെയിന്റ് സ്കീമുകൾ എല്ലാ വേരിയന്റുകളിലും ലഭ്യമാണ്, അതേസമയം ഡ്യുവൽ-ടോൺ കളർ സ്കീമിന് 20,000 രൂപ അധികമായി തിരഞ്ഞെടുക്കാം.

2024 എംജി ആസ്റ്റർ, ഓട്ടോ-ഡിമ്മിംഗ് ഐആർവിഎം, വെന്റിലേറ്റഡ് സീറ്റുകൾ എന്നിവ ഉൾപ്പെടെ നിരവധി ഫീച്ചർ അപ്‌ഗ്രേഡുകൾ ഉൾക്കൊള്ളുന്നു. അവ സാവി പ്രോ ട്രിമ്മിന് മാത്രമായി ലഭ്യമാണ്. സെലക്ട് ട്രിം മുതൽ, എസ്‌യുവി ഐ-സ്മാർട്ട് 2.0 കണക്റ്റഡ് ടെക്, വയർലെസ് സ്മാർട്ട്‌ഫോൺ കണക്റ്റിവിറ്റി, പനോരമിക് സൺറൂഫ്, വയർലെസ് ഫോൺ ചാർജർ എന്നിവ വാഗ്ദാനം ചെയ്യുന്നു.

14 നൂതന സുരക്ഷാ ഫീച്ചറുകളിലേക്ക് ആക്‌സസ് നൽകിക്കൊണ്ട് പുതിയ ആസ്റ്റർ ലെവൽ 2 എഡിഎഎസ് സാങ്കേതികവിദ്യ ലഭിക്കുന്നു. എസ്‌യുവിയിൽ 10.1 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം, 7 ഇഞ്ച് ഫുൾ ഡിജിറ്റൽ ഇൻസ്ട്രുമെന്റ് ക്ലസ്റ്റർ, ലെതർ അപ്‌ഹോൾസ്റ്ററി, ലെതർ പൊതിഞ്ഞ സ്റ്റിയറിംഗ് വീൽ, ബ്ലൈൻഡ്-സ്‌പോട്ട് ഡിറ്റക്ഷൻ, 360 ഡിഗ്രി സറൗണ്ട് വ്യൂ ക്യാമറ, റെയിൻ സെൻസിംഗ് വൈപ്പറുകൾ എന്നിവ സജ്ജീകരിച്ചിരിക്കുന്നു. 6-വേ പവർ അഡ്‍ജസ്റ്റ് ചെയ്യാവുന്ന ഡ്രൈവർ സീറ്റ്, 6-സ്പീക്കറും ട്വീറ്ററുകളും, ലെയ്ൻ ചേഞ്ച് അസിസ്റ്റ്, റിയർ ക്രോസ്-ട്രാഫിക് അലേർട്ട്, ഇലക്ട്രോണിക് സ്റ്റെബിലിറ്റി പ്രോഗ്രാം, ട്രാക്ഷൻ കൺട്രോൾ സിസ്റ്റം, ഹിൽ ഡിസന്റ് കൺട്രോൾ, ഹിൽ ഹോൾഡ് കൺട്രോൾ തുടങ്ങിയ ഫീച്ചറുകളും വാഹനത്തിന് ലഭിക്കുന്നു.

Last Updated Jan 15, 2024, 9:20 AM IST